38. Yesuusa Sayisse Uyitu

Ayihude diru dirunkunni Agure Sa”ate Ayyaana ayirrissanno. Kuni ayyaani lowo haammatu xibbii dirira albaanni Maganu awurransa Gibitsete borojjimmanni asse gatisinonsa gara qaagate ayirrinsanniho. Yesuus balaxe faajjetenni kulanna rosiisa hanafihunni sasu diri gedensaanni, Agure Sa”ate Ayyaana insa ledo ayirrisate hasi’ri; hakkiicho shinannisitano rosaanosira kulinonsa.

Yesuusi rosaano giddo mittu Yihuda yinanni manchi no. Yihudu soqqamaasinete woxe worranni ogoro agaranno. Woxe baxanno daafira ogoru giddonni baca hige woxe mooranno. Yesuusinna rosaanosi Yerusaalame iillituta, Yihudu Ayihudete sooreeyyewa mare Yesuusa woxe adhe sayise aansara sumuu yii. Yesuusi Buuramino Moote ikkinota Ayihudete sooreeyye ammana gibbe shitasira ma’litanni noota afi.

Ayihudte sooreeyye Qeesootu Roorrichi albinsannansa, Yesuusa sayise aannonsa gede Yihudira sajjoo birra baattu. Kuni coyi himanaano himantino gede ikkino. Yihudi konne coye sumuu yii. Yesuusa sayise aannota injiitino yanna hasanni agari.

Yerusaalamete, Yesuusi rosaanosi ledo Agure Sa”ate Ayyaana ayirrisi. Agure Sa”ate Ayyaani sagale yannara buddeena tayise hinkotenni qase, <<Hii’e konne itte. Kuni ki’nera aamamino maala’yaati. Konne qaaggote assidhe>> yii. Kunni garinni Yesuusi maalisi insa daafira kakkalamannota kulinsa.

Hakkunni gedensaanni Yesuusi finiincho haa’re gotti asse, <<Konne agge. Cubbo agursiisate du’nantannoti haaru gondoori mundee’yaati. Konne qaaggote assidhe>> yii.

Hakkunni gedensaanni rosaanosi, <<Ki’ne giddonni mittu ane sayise aannoe>> yiinsa. Rosaano massu. <<Togoo coye assannoju ayeti>> yitanni mimmito Xa’mitu. Yesuusi, <<Konne buddeencho tayise eemmosihu sayise aannoe>> yii. Hakkunni gedensaanni Yihudira buddeena uyisi.

Yihudi beddeena adhihu gedensaanni Sheexaanu eisi. Yihudu Yesuusa Amaddanno gede Ayihudete sooreeyyera kulara ha’ri. Yannano hawarrooti.

Yesuusinna rosaanosi hurbaate ittuhu gedensaanni Ejedhete Ilaala hadhu. Yesuusi, <<Techo hawarro baalunku agurtinannie. <Allaalaancho ganeemmo, ge’reewuno billaallanno> yine borreessinoonni>> yii.

Pheexiroosi, <<Wolootu agurtuhero nafa ani badhe wodheemmohe!>> yee dawari. Yesuusi Pheexiroosira, <<Sheexaanu baalanka adha’nera hasi’ranno; ikkollana ammanakki daafurtannokki gede huuccoommohe. Hatto ikkirono konne hashshalukkichu ganara albaanni sase higge <<Diegennoommosi>> yaattoe yii.

Hatte yannara Pheexiroosi Yesuusira, <<Reyo nafa ikkiteenna horo badhe diwodheemmohe>> yiisi. Wolootuno hattonni yitino. .

Hakkunni gedensaanni Yesuusi rosaanosi ledo Geetesemaani yinanniwa ha’rino. Yesuusi jifotenni gatate huuccidhanno gede rosaanosira kulinsa. Hakkunni gedensaanni Yesuusi callisi huucci’rara ha’ri.

Yesuusi sase hige huucci’rino; <<Anna’ya, dandaamiro konne qarra adheemmokki gede assi. Manna gatinsanniti wole doogo hoogguro kayinni, Ati yootto gede ikkona>> yii. Yesuusi lowo geeshsha yaadi. Hunkuu mundeete gede ikke coccoi. Maganu jawaachishannosi sokkaasincho soyi.

Mitte mittente huuccattote yanna gedensaanni, Yesuusi rosaanosiwa marro marrohige marino. Insa kayinni maranno woyite goxxe no. Sayikkimeeshsho higitera kayinni, <<Ka’e! Sayise aannoehu kune dayino>> yii.

Yihudi Ayihudetesooreeyye, gaaddotenna wolu lowo manni ledo kae day. Bisenna dulla anga adhite no. Yihudu Yesuusiwa shiqqi yee, <<Rosiisaancho, keeru ledokki hee’ro>> yee sunqisi. Hatto assinohu Ayihudete gashshaana ewelumma Afate qarrantannokki gede malaatisateeti. Hakkunni gedensaanni Yesuusi, <<Yihuda, sanqite sayisse aattoe?>> yii.

Gaaddo Yesuusa amaddanni heedheennanni, Pheexiroosi bise fushshe Qeesootu Roorrichi soqqamaancho gane macca tayisi. Yesuusi, <<Bisekki kou giddora qoli! Woleteemmero gargartannoe gede sokkaasine soyaera Anna’ya xa’mi’ra dandeemmo>> yiisi. Hakkunni gedensaanni Yesuusi manchoho macca hursi.