37. Yesuusi Aliaazaari Reyotenni Kayisi

Mitto barra Yesuusi Aliaazaari lowo geeshsha dhiwaminota duduwo macciishshi. Aliaazaari roduuwi lamenti Maariyaaminna Maarta Yesuusiwa aananno. Yesuusi konne duduwo macciishshe, <<Kuni dhibbi Maganu ayirrinyiraati ikkinnina reyonniha di”ikkino>> yii. Yesuusi aantannosire baxanno; ikkollana noowa lame barra keeshshi.

Lamu barri gedensaanni, Yesuusi rosaanosi, <<Ka’e Yihuda ha’nona>> yiinsa. Insa qolte, <<Rosiisaancho, shiimu barrira albaanni hakko noo manni shaahera hasanni noowe!>> yitu. Yesuusi, <<Baxillaanchinke Aliaazaari mugino; muganotenni kayisammosira ha’reemmo>> yiinsa.

Yesuusi rosaano, <<Mooticha, Aliaazaari goxe nooha ikkiro higannosi>> yite yite dawartusi. Hatte yannara xawise, <<Aliaazaari reyino. Ki’ne ane ammantinanni gede hakkiicho hee’ra hooga’yara hagiidhoommo>> yee kulinsa.

Yesuusi Aliaazaari ilamino katama iilli yannara, Aliaazaari reyinkunni shoole barra ikke no. Maarta Yesuusinni xaaddara flute, <<Mooticha, ati konniicho hee’roottoro rodii’ya reyannokkihu baino. Maganu kayinni huucci’roottore baala aannoheta ammaneemma>> yitu.

Yesuusi qole, <<Ani kaotenna heeshshote. Ane ammanannohu baalu reyiro nafa heeshshonniha ikkanno. Ane ammanannohu baalu horonta direyanno. Konne ammanatta?>> yiise. Maarta dawarte, <<Mooticha! Ati Buuramootto Moote Maganu Beetto ikkoottota ammanoomma>> yitu.

Hakkunni gedensaanni Maariyaamino fultu. Yesuusi lekka hunda ubbe, <<Mooticha, ati konniicho hee’roottoro, rodii’ya reyannokkihu baino>> yitu. Yesuusi, <<Aliaazaari hiikko wortinoonni?>> yee xa’minsa. <<Madaarroonni. Amo dagge lai!>> yitusi. Hakkunni gedensaanni Yesuusi wi’li.

Waamma godaho; afooho kincho tu’noonni. Yesuusi waammanniwa shiqqi yee, <<Kincho gongo’mishshine hoolle>> yee coyi’rinsa. Maarta kayinni, <<Reyinkunni shoole barra ikkino. Xa bowanno>> yitu.

Yesuusi, <<Ane ammanittaro Maganu ayirrinye la”attata dikuloommohe?>> yiise. Kunnira kincho gongo’mishshe hooltu.

Hakkunni gedensaanni Yesuusi iima hige lae, <<Anna, macciishshattoe daafira galaxxeemmohe. Ati wo’manka woyite macciishshattoeta afoommo; kayinnilla ati soottoeta ammantanno gede konne uurre noo manni daafira yeti>> yii. Hakkunni gedensaanni Yesuusi, <<Aliaazaari, amo fuli!>> yee qoonqosi naggi asse coyi’ri.

Kunnira Aliaazaari fuli. Kafannoonnisi garinni no. Yesuusi <<Ha’rona tirtine agurresi!>> yiinsa. Ayihudete giddonni haammatu tenne maalalenni kainohunni Yesuusa ammantu.

Ayihudete amma’no sooreeyye kayinni hinaassu; kunnira Yesuusanna Aliaazaari shitanno gara ma’late mitteenni gamba yitu.