32. Yesuusi Battete Ayyaani Amadino Manchonna Dhiwantino Mancho Hursi

Mitto barra Yesuusinna rosaanosi yowolotenni baara tayisse Gergesenooni manni hee’ranno qacha martu

Baara widoonni fultuta battete ayyaani amadinosi manchi dodanni Yesuusiwa dayi.

Kuni manchi ayino ittisasira dandiinokki wolqaataamooti. Mannu angasinna lekkasi cagaagetenni usurino; cagaage kayinni tattayise hunanni qarrisino.

Kuni manchi hakko qachira noo moogga giddo hee’ranno. Hashsha barra raaranni gale hosanna. Imaana diuddi’ranno; bisosi sammi yee ginnatenni huduuxxanno.

Kuni manchi Yesuusiwa dayi yannara, alba hige uwe kumbuuli. Yesuusi Kiristoosi konne ayyaana, <<Manchu giddonni fuli!>> yii.

Battete ayyaani noosi manchi qoonqosi naggi asse, <<Wo’munkura Aliidi Magani Beetto Yesuusa, ane ledo mayi noohe? Eeggatena shetissootie!>> yee raari. Hakkunni gedensaanni Yesuusi battete ayyaana, <<Su’mikki ayiti?>> yee xa’mi. Isi daware, <<Haammantoommona, su’mi’ya Legewooniiti>> yii. (Legewooni, Roomunnita lowo kume olanto amaddino gaamooti.)

Battete ayyaani, <<Eeggatena kawiinni xeertissootinke!>> yite huuccidhusi. Hakko mule noo gaarira allaalloonni manchaame no. Kunnira battete ayyaani Yesuusa, <<Eeggatena tenne manchaamewa soyinke!>> yee huucci’ri. Yesuusino, <<Hadhe!>> yiinsa.

Battete ayyaani Manchu giddonni fule manchaamete ei. Manchaame gaaru gaminni eela higge bitintirtaanni marte baaru giddo itantu. Manchaame kiiro 2000 geeshsha ikkitanno.

Manchaamete allaalaasine konne coye la’e katama dodanni hadhe Yesuusi assinore manna baalaho hasaabbu. Katamu manni daye battete ayyaani fulisi mancho lai. Imaana uddi’re fayyo mancho ikke sammi yee ofolle no.

Mannu lowo geeshsha waajjino daafira, Yesuusi hakkiinni ha’ranno gede xa’mitu.Kunnira Yesuusi yowolote ofolle ha’rara kai. Battete ayyaani fulinosi manchino Yesuusi ledo ha’rara huucci’ri.

Yesuusi kayinni, <<Dee’nina, qaekki hadhe Maganu assinohere baalanna maarinohe gara jaallakkiranna ayiddikkira kuli>> yiisi.

Kunnira manchu ha’re Yesuusi assinosire manna baalaho hasaawi. Konne coye macciishshinohu baalu dhaggenna maalale assi’ri.

Yesuusi galagale baara widoonni fuli. Hakkiira iilli yannara lowo manni doyisse millo ho’lisi. Mannu mereero 12 diro mundee lalakkanna heedhino mancho no.Hursitannoe yite woxese baala xagisaanote baaxxite guddino; lexxinota ikkinnina dhibbu diwoyyinose.

Yesuusi lowo dhiwamaasine hursinota macciishshitinohura, <<Yesuusi imaana kisummaro hureemma!>> yite heddino. Kunnira Yesuusira badheenni higge dagge uddanosi amaddino. Uddanosi amaddanni heedheennanni hakkawoyintenni mundeese uurritino!

Hakkawoyintenni, Yesuusi giddosinni wolqa fultinota afi. Kunnira wirri yee lae, <<Kisiehu ayeti?>> yee xa’mi. Rosaanosi, <<Gaangeesse noohehunna xiiwanni noohe manni lowoho. <Ayi kisie?> mayira yaatto?>> yite dawartusi.

Mancho lowo geeshsha waajjite huxidhanni dagge Yesuusi albaanni diriirtu. Hakkunni gedensaanni assitinorenna hurtinota kultusi. Yesuusi, <<Ammanakki gatissinohena ha’ri!>> yiise.