30. Yesuusi Onte Kume Manna Itisi

Yesuusi batinyu addi addi qachira kultanno gedenna manna rosiissanno gede Soqqamaasinesi soyi. Insa Yesuusi noowa higgu yannara, assitinore kultusi. Hakkunni gedensaanni Yesuusi baara tayisse ga’labbicha darga ledosi hadhanno gedenna shiima geeshsha fooliishshidhanno gede kulinsa. Kunnira yowolote giddora e’e baara widoonni fultu.

Ikkollana yowolotenni hadhanni heedheenna Yesuusanna rosaanosi afinohu lowo manni no. Kuni manni insa balaxe sa”ara baaru gamira dodi. Kunnira Yesuusinna rosaanosi widoonni fultanno woyite, lowo manna balaxe sae hakkiicho insa agare no.

Mannu meentonna ooso kiirrikkinni 5000 sa”anno labballooti. Yesuusi manna lowo geeshsha marari. Allaalaanchu nookkiha ballehino ge’reewi gede ikke no. Kunnira rosiisi kae giddonsa noo dhiwamaanono hursinsa.

Hakko hashsha rosaanosi, <<Yanna hashshitinona muleno katamma dino. Itannore hidhanno gede manna ha’risi>> yite kultusi.

Yesuusi kayinni rosaanosi, <<Itannore ki’ne uyiyyensa!>> yii. Insa qolte, <<Hatto assa maminni dandiinanni? Noonkehu onte buddeenchootinna lame qulxu’micho callaho>> yite dawartu.

Yesuusi, <<Ontaa ontaa ikke hayissote aana ofollanno gede mannaho kulle>> yee rosaanosira kuli.

Yesuusi onte buddeenchonna lame qulxu’micho haa’re gordo hige lae, sagaletedaafira Magano huucci.

Hakkunni gedensaanni Yesuusi buddeenanna qulxu’micho haa’re hinkotenni qaserosaanosi mannaho uyitanno gede uyi. Rosaanosi sagale mannaho iillishshu; sagale horonta digooffino! Mannu baalunku ite duuwi.

Rosaano gatino giggilo gamba assitu; gamba assitinohu tonaa lame soro kai!Kageeshsha baala ka’u sagale onte buddeenchootinna lame qulxu’michooti.