9. Allah Manggel Musa

Pas Yusup mati, sloro kluargonyo tinggal di Mesir. Dio wong samo ketoronannyo tinggal di sano selamo betaon-taon tros punyo banyak anak. Dio wong disebot wong Israel.

Pas la beratos-ratos taon, wong Israel jadi banyak nian. Wong-wong Mesir la ngelupoke Yusup samo segalo yang la Yusup lakuke ontok nolong dio wong. Wong Mesir jadi takot samo wong Israel karno wong Israel ni banyak nian. Laju, Piraun yang bekuaso di Mesir pas jaman tu jadike wong Israel budaknyo wong Mesir.

Wong Israel dipakso beken banyak bangunan, sampe-sampe haros ngebangun kota. Gawe berat tu ngebuat dio wong sengsaro. Tapi Allah ngeberkati wong Israel, tros ketoronan dio wong malahan betamba banyak.

Piraun jingok amen wong Israel ngelaerke banyak kupek, laju dio mrentoke ontok ngebunu sloro kupek lanang wong Israel dengen caro dibuang ke jero Sungi Nil.

Sala sikok betino Israel ngelaerke kupek lanang. Dio samo lakinyo nyingiti kupek tu sebisonyo.

Pas wong tuo kupek tu dak pacak lagi nyingitinyo, dio wong narok kupek tu di keranjang yang ngapong di pengger Sungi Nil supayo dio dak tebunu. Ayuknyo kupek tu ngawasinyo supayo tau apo yang bakal tejadi samo dio.

Sikok anak betinonyo Piraun jingok keranjang yang ado kupek dijeronyo. Dio ngangkat kupek tu jadi anaknyo dewek. Dio nyewo betino Israel ontok jadi inang kupek tu. Dio dak sadar amen betino tu umak kupek tu dewek. Pas budak tu la besak tros dak perlu susu lagi, dibalekkenyola budak tu ke anak betinonyo Piraun. Anak Piraun tu namoi budak tu Musa.

Kapan ari, pas Musa la besak, dio nyingok wong Mesir ngeboki budak Israel. Musa nyubo nyelametke wong sebangsonyo.

Pas dio ngeraso dak katek yang nyingok, dio ngebunu wong Mesir tu tros ngoborke mayatnyo. Tapi ternyato ado wong yang nyingok kejadian tu.

Pas Piraun tau kejadian tu, dio nak ngebunu Musa. Musa lari dari Mesir ke padang goron di mano dio pacak aman dari tentaro Mesir.

Musa jadi pengoros domba di padang goron yang jao dari Mesir. Dio ngaweni betino dari tempat tu, tros punyo duo anak lanang.

Pas Musa lagi ngoros domba-dombanyo, dio nyingok sikok semak yang bekobar-kobar, tapi semaknyo idak kebakar. Laju Musa maraki semak tu supayo pacak jingok lebe jelas, tapi Allah ngomong, “Musa, lepaskela selop kau. Kau tu lagi tegak di tana yang suci.”

Uji Allah, “Aku la nyingok pendritoan umat Aku. Aku bakal ngerem kau ke Piraun supayo kau pacak gawak wong Israel metu dari pebudakan dio wong di Mesir. Aku bakal ngenjok dio wong tana Kanaan, iola tana yang Aku janjike ke Ibrahim, Ishak, samo Yakob.”

Tanyo Musa, “Cak mano amen dio wong nak tau siapo yang ngerem aku, apo yang haros aku omongke.” Uji Allah, “Aku ni iola Yang Kekal. Omongi bae ke dio wong, ‘Yang Kekal la ngerem aku ke kau.’ Omongke jugo ke dio wong, ‘Aku ni YHWH, Tuhan Ibrahim, Ishak, samo Yakub, lelohor kau.' Inila namo Aku selamonyo.” (Namo YHWH tu mongken diucapke “Yawe” tros retinyo “Yang Kekal”.)

Musa dak galak pegi ke Piraun karno dio takot. Dio peker dio dak pinter ngomong. Jadi Allah ngerem Harun dolor lanangnyo Musa ontok ngerewangi dio. Allah ngingetke Musa jugo Harun amen Piraun bakal nekak.