10. Sepolo Bencano

Musa samo Harun ni pegi nemui Piraun. Dio wong ngomong cak ini, “Inila omongan Tuhan wong Israel, ‘Biarkela umat Aku pegi!’” Tapi Piraun dak ngedengerke dio wong. Bukannyo ngebebasi wong Israel, malahan dienjokkenyo gawean yang lebe saro.

Piraun tetep nolak wong-wong tu pegi, jadinyo Allah ngerem sepolo Bencano. Liwat Hokoman-hokoman ni, Allah nonjokke ke Piraun amen Dio lebe kuat dari Piraun samo segalo dewa-dewa Mesir.

Allah nguba Sungi Nil jadi dara, tapi Piraun ni tetep bae dak ngebiarke wong Israel pegi.

Allah ngeremke kodok-kodok ke sloro Mesir. Piraun melas ke Musa supayo ngilangi kodok-kodok tu. Tapi pas kodok-kodok tu la mati, Piraun ni ngeraske atinyo, tros dak ngebiarke wong Israel ni ninggalke Mesir.

Laju Allah ngeremke Bencano seranggo. Abes tu Allah ngeremke Bencano lalet. Piraun manggel Musa samo Harun tros ngomong ke dio wong, amen dio wong pacak ngebrentike Bencano ni, wong Israel pacak pegi dari Mesir. Pas Musa ni bedoa, Allah ngilangke lalet dari Mesir. Tapi Piraun ni ngeraske atinyo tros dak ngebiarke wong Israel pegi.

Abes tu, Allah ngebeken segalo binatang ternak di Mesir ni jadi saket tros mati. Tapi Piraun ni tetep dikeraske atinyo tros dak ngebiarke wong Israel ni pegi.

Laju Allah ngongkon Musa ontok nguntalke abu ke udaro di depan Piraun. Pas dio ngelakuke tu, penyaket besol tejadi di sloro Mesir, tapi wong Israel dak keno besol ni. Allah ngeraske atinyo Piraun, tros Piraun ni dak ngebiarke wong Israel pegi.

Abes tu, Allah ngeremke ujan es sebesak batu yang pacak ngancori taneman di Mesir, tros ngebunu siapo bae yang metu dari ruma. Piraun manggel Musa samo Harun tros ngomong ke dio wong cak ni, “Aku la beduso. Kamu pacak pegi dari sini.” Abes tu Musa bedoa. Tros ujan es brenti.

Tapi Piraun buat duso tros ngeraske atinyo lagi. Dio dak bakal ngebiarke wong Israel pegi.

Jadi Allah ngebeken segrombolan belalang dateng ke Mesir. Belalang ni makan taneman apo bae yang tesiso, yang dak ancor karno ujan es tadi.

Laju Allah ngeremke Bencano kegelepan selamo tigo ari. Itu tu gelep nian sampe-sampe wong Mesir dak pacak metu dari ruma dio wong. Tapi ado cahayo di mano wong Israel tinggal.

Mugola la ngalami sembilan ikok Bencano, Piraun tetep nolak ngebiarke wong Israel pegi. Karno Piraun ni nekak, Allah ngerencanoke ontok ngerem sikok Bencano teaker. Kejadian ni bakal nguba pekerannyo Piraun.