8. Allah Nyelametke Yusup samo Kluargonyo

Betaon-taon abes tu, pas Yakob la tuo, dio ngongkon anak kesayangannyo, Yusup, ontok ngawasi dolor-dolornyo yang lagi ngoros ternak.

Dolor-dolornyo benci nian samo Yusup karno ubak dio wong lebe nyayangi Yusup, jugo karno Yusup ni bemimpi amen dio bakal nguasoi dio wong. Pas Yusup nemuke dolor-dolornyo, dio wong nyolek tros ngejual Yusup ke tukang budak.

Dolor-dolornyo ngoyakke bajunyo Yusup, tros dicelopkenyo baju tu ke dara kambeng, abes tu balek ke ruma. Dio wong ngolai ubaknyo, ditonjokkenyola baju tu ke ubaknyo tros ngomong amen Yusup la mati karno diserang binatang buas. Laju Yakob sede nian.

Tukang-tukang budak ngawak Yusup ke Mesir. Mesir ni negaro yang besak jugo kuat yang ado di pengger Sungi Nil. Yusup dijual ke pejabat pemrento yang kayo. Dio ngelayani tuannyo dengen baek, tros Allah ngeberkati Yusup.

Bini tuannyo nak nyubo tedok samo Yusup, tapi Yusup dak galak bebuat duso ke Allah. Laju betino tu jadi mara tros nudu Yusup, tros dio ditangkep ontok dimasokke ke penjaro. Di jero penjaro Yusup tetep stio samo Allah, tros Allah ngeberkati Yusup.

Pas la duo taon, Yusup mase di penjaro, padahal dio dak besala. Rajo Mesir, sebotannyo Piraun, punyo duo mimpi yang nganggu dio nian. Dak katek antaro penasehatnyo yang pacak ngartike mimpi-mimpinyo.

Allah la ngenjok Yusup kemampuan ontok ngartike mimpi, jadi Piraun ngongkon wong gawak Yusup dari penjaro. Yusup ngartike mimpinyo Piraun, ujinyo, “Allah bakal ngerem tojo taon panen yang bagus abes tu tojo taon kelaperan.”

Piraun kagom nian samo Yusup, laju dio jadike Yusup wong keduo yang bekuaso di sloro Mesir!

Yusup ngongkon wong-wong ontok nyimpen banyak makanan pas tojo taon panen yang bagus, tros pas tojo taon waktu kelaperan. Yusup ngejual makanan ke wong-wong supayo dio wong punyo cokop makanan ontok dimakan!

Kelaperan besak tu idak cuman tejadi di Mesir bae, tapi jugo di Kanaan, di mano Yakob samo kluargonyo tinggal.

Laju Yakob ngongkon anak-anaknyo ke Mesir ontok beli makanan. Pas dolornyo Yusup tegak di depannyo ontok beli makanan, dio wong dak keciren samo Yusup. Tapi Yusup keciren samo dio wong.

Yusup ngetes dio wong la beruba apo belom, abes tu uji Yusup ke dio wong, “Aku ni dolor kau, Yusup! Dak usa takot. Kau ngelakuke kejahatan pas kau ngejual aku jadi budak, tapi Allah makek kejahatan tu ontok kebaekan! Payo sinila! tinggalla di Mesir, supayo aku pacak nyedioke makanan ontok kau samo kluargo kau.”

Pas dolor-dolornyo balek ke ruma tros dio wong nyritoke kejadian ni ke Yakob amen Yusup mase edop, Yakob seneng nian.

Mugola Yakob la tuo, dio pinda ke Mesir samo sanak kluargonyo, tros dio wong tinggal di sano galo. Sebelom Yakob mati, dio ngeberkati sloro anaknyo.

Pejanjian yang la dijanjike Allah samo Ibrahim diteroske ke Ishak, abes tu ke Yakob, tros ke sloro ketoronannyo Yakob. Ketoronan dari duo blas anak lanang ni jadi duo blas suku Israel.