7. Allah Berkati Yakob

Pas budak-budak tu la besak, Esau ni kesenengannyo beburu, amen Yakob lebe seneng mendep di ruma. Ribka lebe nyayangi Yakob, tapi amen Ishak ni lebe sayang samo Esau.

Kapan ari, pas balek dari beburu, Esau kelaperan nian. Uji Esau ke Yakob, “Tolong enjokla aku masakan yang la kau beken tu.” Uji Yakob, “Sebelom tu, kau enjokke dulu hak-hak anak petamo kau ke aku.” Laju dienjokkenyola hak-hak anak petamonyo tu ke Yakob. Abes tu Yakob ngenjok dio masakannyo.

Pas Ishak la tuo nian tros matonyo la buto, Ishak nak ngeberkati Esau. Tapi, Ribka samo Yakob ngolai dio dengen caro Yakob ecak-ecak jadi Esau. Yakob makek bajunyo Esau, tros makek kolet kambeng di leher samo tangannyo.

Yakob dateng ke Ishak, ujinyo, “Aku Esau. Aku dateng supayo kau pacak ngeberkati aku.” Pas Ishak ngeraba kolet kambeng tros nyium bauk bajunyo tu, Ishak ngiro amen dio iola Esau tros ngeberkatinyo.

Esau jadi benci nian samo Yakob karno la maleng hak anak petamo samo berkatnyo. Laju dio berencano nak ngebunu Yakob pas ubaknyo la mati.

Tapi Ribka ngedenger rencanonyo Esau. Laju dio samo Ishak ngongkon Yakob pegi jao ontok tinggal di ruma sanak kluargonyo Ribka.

Selamo betaon-taon Yakob tinggal samo sanak kluargo Ribka. Dio kawen tros punyo duo blas anak lanang samo sikok anak betino. Allah jadike dio kayo rayo.

Pas la duo polo taon, Yakob balek lagi ke Kanaan, dio gawak sloro kluargonyo, babu-babunyo, jugo ternak-ternaknyo.

Yakob mati ketakotan, dio peker Esau mase nak ngebunu dio. Laju dio ngongkon babu-babunyo gawak banyak ternaknyo ontok dienjokke ke Esau. Uji babu-babunyo, “Hamba kau, Yakob, nak ngenjok kau ternak-ternak ni. Denget lagi dio dateng.”

Ternyato Esau la maapke Yakob, tros dio wong seneng nian pacak ketemu lagi. Yakob edop tenang di Kanaan. Tros Ishak mati, Yakob samo Esau yang ngobori dio. Pejanjian yang la Allah janjike ke Ibrahim diteroske dari Yakob ke Ishak.