6. Allah Mliaro Ishak

Pas Ibrahim la tuo nian, Ishak anaknyo tu la bujang. Laju Ibrahim ngongkon sikok babunyo ontok balek ke tana di mano kluargonyo tinggal, supayo pacak nemuke bini ontok Ishak.

Abes ngelakuke pejalanan yang jao nian nojo ke tempat sanak kluargo Ibrahim, Allah nonton babunyo Ibrahim ke Ribka. Ribka tu iola cocong dari dolornyo Ibrahim.

Ribka stuju ninggalke kluargonyo tros melok samo babu tu ke ruma Ishak. Pas la nyampe, Ishak langsong ngaweni dio.

Betaon-taon abes tu, Ibrahim mati tros sloro janji-janji yang la dibeken Allah samo dio diteroske ke Ishak. Allah la bejanji amen Ibrahim bakal punyo ketoronan yang dak pacak dietong jumlanyo, tapi bininyo Ishak ni dak pacak punyo anak.

Ishak bedoa ke Allah pasal Ribka, jadi Allah ngejeni Ribka supayo bonteng tros punyo kupek kembar. Duo ikok kupek tu besaeng sikok dengen laennyo waktu mase di perotnyo Ribka. Jadi Ribka ni nanyo ke Allah apo yang lagi tejadi.

Allah ngomong ke Ribka cak ini, “Duo ikok bangso bakal dateng dari duo anak lanang yang ado di dalem perot kau tu. Dio wong bakal besaeng sikok dengen yang laennyo. Anak lanang yang lebe tuo agek bakal ngelayani yang lebe mudo.”

Pas kupek Ribka la laer, budak lanang yang lebe tuo metu dengen kolet abang tros bebulu, dio wong namoi dio Esau. Tros anak lanang yang keduo ni metu sambel megang tometnyo Esau. Dio wong namoi dio Yakob.