49. Pejanjian Baru Allah

Sikok malekat ngenjoktauke ke gades benamo Mariam amen dio bakal ngelaerke Anak Allah. Jadi sementaro dio mase gades, Ro Suci nodongi dio, tros dio jadi bonteng. Dio beranakke kupek lanang tros ngenamoi Dio Yesus. Karno itula, Yesus iola Tuhan sekalegos manusio.

Banyak nian mujijat yang Yesus beken. Dio bejalan di pocok banyu, nenangke badai, nyemboke banyak wong saket, ngoser setan, bangketke wong mati, tros ngenjok makan limo ribu wong pakek limo roti samo duo iwak kecik.

Yesus jugo iola guru yang agong, tros Dio ngomong dengen kuaso karno Dio iola Anak Allah. Dio ngajari amen kau perlu ngasei sesamo manusio pecak kau ngasei diri kau dewek.

Dio jugo ngajari amen kau haros ngasei Allah lebe dari apo bae, temasok jugo harto kau.

Yesus ngajarke amen kerajaan Allah lebe berego dari apo bae yang ado di dunio ni. Yang paleng penteng ontok setiap wong iola jadi umat kerajaan Allah. Supayo pacak masok kerajaan Allah, kau haros dislametke dari duso.

Yesus ngajarke amen sebagean wong-wong bakal nrimo Dio, tros dislametke, tapi yang laen idak. Dio ngomongke amen sebagean wong-wong tu pecak tana yang sobor. Dio wong nrimo kabar baek pasal Yesus tros dislametke. Wongwong yang laennyo pecak tana keras jalanan, di mano biji pirman Allah dak masok jugo dak ngaselke bua. Wong-wong tu nolak pesen pasal Yesus, tros dak bakal masok ke kerajaan-Nyo.

Yesus ngajarke amen Allah ni ngasei nian wong-wong yang beduso. Dio galak ngamponi dio wong tros jadike dio wong anak-anak-Nyo.

Yesus jugo ngajarke amen Allah benci duso. Pas Adam samo Hawa beken duso, itu jugo ngarui sloro ketoronannyo. Laju, sloro wong di dunio beduso tros tepisa dari Allah. Karno itula, sloro wong la jadi moso Allah.

Tapi Allah ngasei sloro manusio, jadi Dio ngeremke Yesus, Anak sikok-sikok-Nyo. Itu tu supayo sloro wong yang pecayo samo Yesus dak bakal dihokom karno dusonyo, tapi bakal edop samo Allah selamonyo.

Karno duso kau, kau besala. Kau pantes mati tros keno murka Allah, tapi Allah nimpoke murka-Nyo ke Yesus bukan ke kau. Pas Yesus mati di kayu saleb, Dio nrimo hokoman kau.

Yesus dak perna beken duso, tapi Dio mele ontok dihokom tros mati jadi kurban yang sempurno. Dio ngelakuke ni ontok ngapos duso kau jugo duso sloro wong di dunio ni. Karno Yesus ngurbanke diri-Nyo dewek, Allah pacak ngamponi duso apo bae, mala duso-duso yang ngeri nian.

Pebuatan baek dak pacak nyelametke. Dak katek yang pacak kau lakuke ontok bebaekan samo Allah. Cuman Yesus yang pacak ngapos duso-duso kau. Kau haros pecayo amen Yesus iola Anak Allah, amen Dio mati di kayu saleb gantike kau, jugo amen Allah bangketke Dio lagi.

Sloro wong yang pecayo samo Yesus tros nrimo Dio jadi Tuannyo bakal Allah slametke. Tapi siapo bae yang dak pecayo dak bakal ditrimo. Dak peduli amen kau kayo apo mesken, lanang apo betino, tuo apo mudo, jugo dari mano asal kau. Allah ngasei kau tros ngarep supayo kau pecayo samo Yesus, supayo Dio pacak behobongan lagi samo kau.

Yesus ngajak kau supayo pecayo samo Dio tros dibaptes. Pecayo dak kau amen Yesus iola Almasih, sikok-sikok-Nyo Anak Allah? Pecayo dak kau amen kau wong yang beduso tros pantes dapet hokoman Allah? Pecayo dak kau amen Yesus mati di kayu saleb ontok ngamponi duso kau?

Amen kau pecayo samo Yesus jugo apo yang la dilakuke-Nyo, kau wong Kristen! Allah la gawak kau metu dari kerajaan Ebles tros narok kau ke kerajaan terang Allah. Allah la ngambek keedopan lamo kau yang penu duso, tros ngenjok kau edop baru yang bener.

Amen kau wong Kristen, duso kau la diapos karno pebuatan Yesus. Mak ini ari, Allah dak jingok kau jadi moso lagi, tapi Dio jingok kau jadi kawan deket-Nyo.

Amen kau kawan deket-Nyo Allah jugo hamba Yesus, yang iola Tuan, jadi kau galak meloki ajaran-Nyo Yesus. Mugola kau wong Kristen, kau mase pacak tegoda ole duso. Tapi Allah ngomong amen kau ngakui duso-duso kau, Dio stio jugo bakal ngamponi kau tros bakal ngenjok kau kekuatan ontok ngelawan duso.

Allah ngongkon kau bedoa, belajar Pirman-Nyo, nyemba Dio besamo wong-wong Kristen laennyo, jugo besaksi ke wong laen apo yang la Dio lakuke ontok kau. Pasal-pasal ni bakal ngebantu kau betombo behobongan kau samo Allah.