50. Yesus Balek Lagi

Selamo amper duo ribu taon, kabar baek Yesus Almasih la tesebar ke sloro dunio. Grejonyo jugo la bekembang. Dulu Yesus ngomong amen Dio bakal balek lagi pas aker jaman. Mugola sekarang Dio belom dateng, tapi Dio bakal nepati janji-Nyo.

Selamo kito lagi nunggu Yesus dateng, Allah pengen kito edop suci jugo ngormati Dio. Dio jugo pengen kito ngenjoktauke ke wong laen pasal kerajaan-Nyo. Pas Yesus ado di bumi, Dio ngomong cak ini, “Mored-mored Aku bakal ngebritoke kabar baek pasal kerajaan Allah ke sloro wong di dunio. Abes tu aker jaman bakal dateng.”

Banyak suku yang mase belom denger pasal Yesus. seblom Dio balek ke surgo, Yesus ngenjok tugas ke sloro wong Kristen ontok gawak kabar baek ke dio wong yang blom perna denger. Uji-Nyo, “Pegila, jadikela sloro suku mored Aku! Ladang la mateng ontok panen!”

Yesus jugo ngomong, uji-Nyo, “Sikok babu dak lebe besak dari tuannyo. Samo pecak penguaso-penguaso di dunio ni benci samo Aku, dio wong jugo bakal nyikso tros ngebunu kamu karno Aku. Mugola di dunio ni kamu bakal ngalami pendritoan, tapi besemangatla karno Aku la ngalake Ebles, yang mrento dunio ni! Amen kamu tetep stio samo Aku sampe aker, Allah bakal nyelametke kamu.”

Yesus nyritoke sikok crito ke mored-mored-Nyo ontok ngejelaske apo yang bakal tejadi ke wong-wong pas aker jaman. Uji-Nyo, “Ado wong yang nanem biji yang baek di tananyo. Tapi pas dio lagi tedok, mosonyo dateng tros nanem rompot liar diantaro gendomnyo. Abes tu dio pegi.”

“Pas taneman tu tombo, babu-babunyo betanyo cak ni, ‘Tuan, kau nanem biji yang baek. Ngapo pacak ado rompot liar di dalemnyo tu?’ Uji tuannyo, ‘Moso yang ngelakuke tu.’”

“Dio wong nanggapi tuannyo, ‘Haros dicabot dak rompot liar tu?’ Uji tuannyo, ‘Amen kau cabot, laju sebaean gendomnyo jugo tecabot. Tunggu bae sampe panen. Abes tu kompolke rumpot liar tu, tros dibakar, tapi gawakla gendom tu ke lombong aku.’”

Mored-mored-Nyo dak ngerti arti crito tu. Uji dio wong ke Yesus, “Tolong jelaske crito ni ke kami.” Uji Yesus, “Wong yang nanem biji yang baek ni iola Almasih. Ladang tu iola dunio. Biji tu iola umat kerajaan Allah.”

“Rompot liar iola wong-wong yang beasal dari yang jahat. Moso yang nanemnyo tu iola Ebles. Panen iola aker jaman, tros pemanen iola malekat.”

“Pas aker jaman, sloro wong yang meloki Ebles bakal dikompolke tros dibuang ke dalem api. Di situ wong-wong nangis tros ngertakke gigi dalem pendritoan yang nakotke. Abes tu wong-wong yang bener bakal besinar pecak matoari di kerajaan Allah, Ubak dio wong.”

Yesus jugo ngomong amen Dio bakal balek ke bumi sebelom aker jaman. Dio bakal balek dengen caro yang samo pecak dio pegi, iola dengen badan jasmani jugo bakal dateng dalem awan-awan di langet. Pas Yesus balek, sloro wong Kristen yang la mati bakal bangket dari kematian, tros nemui Dio di langet.

Abes tu wong-wong Kristen yang mase edop bakal diangkat ke langet besamo-samo wong-wong Kristen yang bangket dari kematian tadi. Abes tu Yesus bakal besamo umat-Nyo dalem kedamaian jugo kesatuan yang sempurno selamonyo.

Yesus bejanji amen Dio bakal ngenjok mahkota ke sloro wong yang pecayo samo Dio. Dio wong bakal edop tros mrento besamo Allah dalem kedamaian yang sempurno selamonyo.

Tapi dio wong yang dak pecayo samo Yesus bakal dihakemi ole Allah. Dio bakal masokke dio wong ke dalem nerako, di mano dio wong bakal nangis tros jugo ngertakke gigi dio wong sampe kesaketan selamonyo. Api yang dak perna mati bakal ngebakar dio wong teros-terosan, jugo caceng-caceng bakal teros makani dio wong.

Pas Yesus balek, Dio bakal ngancori Ebles samo kerajaannyo. Dio jugo bakal nguntalke Ebles tu ke dalem laotan api di mano dio bakal tebakar selamonyo, besamo sloro wong yang mele meloki Ebles daripada norot samo Allah.

Karno Adam samo Hawa dak noroti Allah tros beken duso di dunio ni, Jadi Allah ngotok manusio tros motosi ontok ngancorkenyo. Tapi ado ari di mano Allah bakal nyiptoke langet samo bumi baru yang sempurno.

Yesus samo umat-Nyo bakal edop di bumi baru, tros Dio bakal mrento segalo yang ado selamonyo. Dio bakal ngapos banyu mato, tros dak bakal ado lagi drito, kesedean, tangesan, kejahatan, kesaketan jugo kematian. Yesus bakal mrento kerajaan-Nyo dengen damai jugo adel, tros Dio bakal besamo umat-Nyo selamonyo.