48. Yesus Iola Almasih yang Dijanjike

Pas Allah nyiptoke dunio, segalonyo sempurno. Dak katek duso. Adam samo Hawa saleng cinto, tros dio wong jugo cinto samo Allah. Dak katek kematian, penyaket, jugo drito. Pecak inila dunio yang Allah galak.

Ebles ngomong liwat ulo di Taman Pirdaus ontok nipu Hawa. Abes tu Hawa samo Adam beduso ke Allah. Karno dio wong beken duso, laju sloro wong di bumi jadi saket tros sloro wong mati.

Karno Adam samo Hawa beken duso, pasal yang lebe para lagi tejadi. Dio wong jadi musu Allah. Akibatnyo sloro wong sejak tu laer dengen sipat beduso jugo jadi moso Allah. Hobongan manusio samo Allah jadi rusak ole duso. Tapi Allah ado rencano supayo hobongan tu pacak baek lagi.

Allah bejanji amen sala sikok ketoronan Hawa bakal ngancorke kepalak Ebles, tros Ebles bakal ngelukoi tometnyo. Ini ni artinyo Ebles bakal ngebunu Almasih, tapi Allah bakal bangketke Dio lagi, tros Almasih bakal ngancorke kekuatan Ebles selamonyo. Betaon-taon abes tu, Allah ngenyatoke amen Yesus ni iola Almasih.

Pas Allah ngancori sloro bumi pakek banyu banjer besak, Dio nyedioke kapal jadi jalan keslametan ontok dio wong yang pecayo samo Allah. Cak itula, mugola sloro wong pantes diancori karno duso-duso dio wong, Allah nyedioke Yesus ontok nyelametke sloro wong yang pecayo samo Dio.

Selamo ratosan taon, imam-imam nyembake kurban ontok Allah dari wong-wong ontok nonjokke hokoman apo yang sesuai dengen duso-duso dio wong. Tapi ternyato kurban-kurban tu dak pacak ngapos duso dio wong. Yesus iola Imam Besak Yang Agong. Tapi idak pecak imam-imam laennyo, Yesus ngurbanke diri-Nyo ontok jadi sikok-sikoknyo kurban yang pacak ngapos duso sloro wong di dunio ni. Yesus iola imam besak yang sempurno soalnyo Dio nrimo hokoman ontok sloro duso yang perna dilakuke manusio.

Allah ngomong samo Ibrahim, uji-Nyo, “Liwat kau, sloro suku di dunio bakal diberkai.” Yesus iola ketoronan Ibrahim. Sloro suku di dunio diberkai liwat Dio. Setiap wong yang pecayo samo Dio dislametke dari duso tros jadi ketoronan umat Allah, iola ketoronan rohani Ibrahim.

Pas Allah ngongkon Ibrahim ontok ngorbanke Ishak, anaknyo, Allah la nyedioke domba lanang ontok gantike Ishak. Kito galo pantes mati karno duso-duso kito! Tapi Allah nyedioke Yesus, Anak Domba Allah, jadi kurban ontok mati gantike kito!

Pas Allah ngerem bencano yang teaker ke Mesir, Dio ngongkon sloro kluargo Israel ontok nyemble domba lanang yang sempurno. Dio wong haros ngoleske daranyo di sekitar pintu ruma dio wong. Pas Allah jingok dara tu, Dio ngelendongi ruma-ruma dio wong, tros dak ngebunu anak lanang petamo dio wong. Kejadian ini disebot Paska.

Yesus iola anak domba Paska kito. Dio sempurno jugo katek duso tros dibunu pas Ari Rayo Paska. Pas wong pecayo samo Yesus, dara Yesus nebos duso wong tu, tros dio telendongi dari hokoman Allah.

Allah ngebeken pejanjian samo Israel, bangso pelean-Nyo. Tapi mak ini ari Allah la beken Pejanjian Baru. Pejanjian Baru ni iola Pejanjian yang Allah beken ontok sloro bangso, supayo setiap wong yang pecayo samo Yesus pacak jadi bagean umat pelean Allah.

Musa iola nabi besak yang nyebarke Pirman Allah. Tapi Yesus iola nabi tebesak. Dio iola Tuhan, jadi sloro yang Dio lakuke samo sloro yang Dio omongke iola pebuatan jugo kato-kato Allah. Itula ngapo alesan Yesus disebot Pirman Allah.

Allah bejanji ke Rajo Daud amen sala sikok ketoronannyo bakal mrento jadi rajo umat Allah selamonyo. Karno Yesus iola Anak Allah jugo Almasih, Dio iola ketoronan Daud yang bakal mrento selamonyo.

Pecak Daud, Yesus iola rajo, tapi Yesus iola rajo alam semesta! Dio bakal dateng lagi tros mrento kerajaan-Nyo dengen adel jugo damai, selamonyo.