47. Paulus samo Silas di Pilipi

Pas Saulus ngelakuke pejalanan di sloro kerajaan Romawi, dio mulai makek namo Romawinyo, “Paulus”. Kapan ari, Paulus samo kawannyo Silas pegi ke kota Pilipi, ontok ngebritoke kabar baek pasal Yesus. Dio wong pegi ke sikok tempat di pengger sungi di luar kota di mano wong-wong bekompol ontok bedoa. Di situ dio wong betemu samo betino benamo Lidia, dio ni wong yang ngejual kaen ungu. Dio ngasei jugo nyemba Allah.

Allah bukak atinyo Lidia supayo pacak pecayo pesen pasal Yesus, tros dio samo kluargonyo dibaptes. Betino tu ngajak Paulus samo Silas nginep di rumanyo, laju nginepla dio wong di rumanyo Lidia besamo kluargonyo jugo.

Paulus samo Silas sereng betemu samo wong-wong di tempat doa. Tiap ari pas dio wong bejalan ke tempat doa, sikok babu betino yang kemasokan setan meloki dio wong. Dio pakek kekuatan setan ontok ngeramalke masa depan wong, tros betino tu ngaseli banyak duet ontok tuan-tuannyo.

Babu betino ni teros-terosan mekek-mekek cak ini, “Dio wong ni iola hamba Tuhan yang Mahabesak. Dio wong ngenjoktauke ke kamu caro ontok dislametke!” Dio nemen nian ngelakuke ni, sampe-sampe Paulus jadi kesel.

Akernyo kapan ari, pas babu betino tu mulai mekek, Paulus bebalek ke dio tros ujinyo ke setan yang ngerasoki betino tu, “Dalem namo Yesus, metula kau darinyo.” Langsong bae setan tu ninggalke babu betino tu.

Tuan-tuannyo babu betino tu mara nian pas dio wong tau apo yang tejadi. Dio wong tau amen setannyo la pegi, jadi budak betino tu dak pacak ngeramalke masa depan wong lagi. Itu artinyo wong-wong dak bakal ngebayar ontok tau apo yang bakal tejadi ke dio wong.

Laju tuan-tuan betino tu gawak Paulus samo Silas ke penguaso Romawi. Dio wong digeboki tros dimasokke ke jero penjaro.

Dio wong narok Paulus samo Silas di tempat yang paleng aman di penjaro tros kakinyo dirante. Tapi pas tenga dalu, dio wong nyanyike lagu-lagu pujian ontok Allah.

Tibo-tibo, tejadi gempa bumi, tros sloro pintu penjaro tebukak. Sloro rante tahanan telepas.

Penjago penjaro tu tebangun. Pas dio jingok pintu penjaro tebukak, dio jadi ketakotan! Dio peker sloro tahanan la lepas, laju dio nak bunu diri. (Dio tau pemrento Romawi bakal ngebunu dio amen dio ngebiarke tahanan-tahanan ngelarike diri.) Tapi Paulus nyingok penjago tu tros ngomong cak ni, "Brentila! Jangan nyaketi diri kau dewek. Kami ado di sini galo."

Kepalak penjaro tu maraki Paulus samo Silas sambel gemeteran, ujinyo, “Apo yang haros aku lakuke supayo aku dislametke?” Tros Paulus jawab, “Pecayola samo Yesus yang iola Tuan. Kau samo kluargo kau bakal dislametke.” Abes tu, kepalak penjaro tu gawak Paulus samo Silas ke rumanyo tros nyuci luko dio wong. Paulus ngebritoke kabar baek pasal Yesus ke sloro wong yang ado di ruma tu.

Akernyo kepalak penjaro samo sloro kluargonyo tu pecayo samo Yesus, tros dio wong dibaptes. Kepalak penjaro tu ngenjok Paulus samo Silas makan tros dio wong beseneng-seneng galo.

Besoknyo Paulus samo Silas dibebaske ole pemempen kota tros dio wong dimintak ninggalke kota Pilipi. Paulus samo Silas ngonjongi Lidia samo beberapo kawan laen, tros abes tu ninggalke kota tu. Kabar baek pasal Yesus teros nyebar, jugo grejo teros bekembang.

Paulus samo pemempen-pemempen Kristen laennyo bekotba samo ngajar pasal Yesus di banyak kota. Dio wong jugo banyak noles surat ontok dokong samo ngajar wong-wong pecayo di grejo-grejo. Beberapo suratnyo ni jadi kitab di dalem Alkitab.