44. Petros samo Yahya Nyemboke Pengemis

Kapan ari, Petros samo Yahya pegi ke Ruma Allah. Pas la parak gerbang Ruma Allah tu dio wong nyingok sikok lanang lompo yang ngemis mintak-mintak duet.

Uji Petros sambel jingok dio, “Aku katek duet nak ngenjok kau. Tapi aku bakal ngenjok kau apo yang pacak aku enjok. Dalem namo Yesus, tegak tros bejalanla!”

Pas tu jugo Allah langsong nyemboke wong tu. Tros wong tu mulai bejalan jugo melompat-lompat tros muji Allah. Sloro wong yang ado di depan Ruma Allah tekagom.

Segrombolan wong begancang nak jingok wong yang la disemboke tu. Uji Petros ke dio wong, “Ngapo kamu tekagom amen wong ni sembo? Kami nyemboke dio bukan makek kekuatan apo kebaekan kami dewek. Sebaleknyo, kekuatan Yesus samo iman yang dienjokke ole Yesus yang nyemboke wong ni.”

“Kamula yang mintak samo gubernur Roma supayo Yesus dibunu. Kamu la ngebunu pencipto keedopan, tapi Allah la bangketke Dio dari antaro wong mati. Mugola kamu dak ngerti apo yang la kamu lakuke, Allah makek pebuatan kamu ontok genepi pewahyuan amen Almasih tu bakal sengsaro jugo mati. Tapi sekarang, betobatla kamu tros norotla samo Allah supayo duso-duso kamu diamponi.”

Laju Petros samo Yahya ditingkep tros dimasokke ke jero penjaro, karno pemempen-pemempen agama di Ruma Allah tu mara samo omongan dio wong. Tapi banyak wong yang pecayo samo omongannyo Petros, tros wong-wong yang pecayo samo Yesus betamba jadi kiro-kiro limo ribu wong.

Besoknyo, pemempen-pemempen Yahudi gawak Petros samo Yahya ke adepan imam besak samo pemempen-pemempen agama laennyo. Tros dio wong tu ngomong ke Petros samo Yahya, ujinyo, “Pakek kuaso apo kamu nyemboke wong lompo ni?”

Uji Petros, “Wong yang tegak di adepan kamu disembke dalem namo Yesus Almasih. Kamu nyalebke Yesus, tapi Allah la bangketke Dio supayo edop lagi! Kamu la nolak Dio, tapi katek caro laen supayo dislametke amen dak liwat kuaso Yesus!”

Dio wong tekejot samo omongannyo Petros jugo Yahya karno dio wong jingok Petros samo Yahya ni wong biaso yang dak bependedekan. Tapi abes tu dio wong sadar amen Petros jugo Yahya ni la besamo dengen Yesus. Abes dio wong tu ngancem Petros samo Yahya, dio wong biarke Petros samo Yahya pegi.