45. Stepanus samo Pilipus

Sala sikok pemempen di grejo mulo-mulo iola lanang yang benamo Stepanus. Dio ni punyo namo baek jugo dio penu samo Ro Suci jugo behikmat. Stepanus ngebeken banyak mujijat, jugo omongannyo ngeyakenke nian amen wong haros pecayo samo Yesus.

Kapan ari pas Stepanus ngajar pasal Yesus, beberapo wong Yahudi yang dak pecayo samo Yesus bedebat samo Stepanus. Dio wong jadi mara nian tros ngolai pemempen-pemempen agama pasal Stepanus. Uji dio wong, “Kami denger dio ni ngomongi yang jahat-jahat pasal Musa samo Allah!” Laju pemempen-pemempen agama ningkep Stepanus tros gawak dio ke imam besak samo pemempen-pemempen Yahudi laennyo, di mano banyak saksi palsu laennyo yang ngotaki pasal Stepanus.

Imam besak tu nanyo samo Stepanus, “Bener dak tuduan tu?” Stepanus ngejawab dengen ngingeti dio wong pasal pebuatan besak yang la Allah lakuke dari jaman Ibrahim ke jaman Yesus. Jugo cakmano umat Allah teros-terosan dak noroti Allah. Laju ujinyo, “Kau ni wong yang tekak jugo tukang brontak yang teros nolak Ro Suci, samo pecak nenek moyang kau yang nolak Allah jugo ngebunu nabi-nabi-Nyo. Tapi kau ni lebe para jahatnyo! Kau ngebunu Almasih otosan Allah!”

Pas denger tu dio wong jadi mara nian laju dio wong notop kupeng sambel mekek. Dio wong nyeret Stepanus ke luar kota tros ngebabetinyo pakek batu sampe mati.

Pas Stepanus lagi sekarat, dio mekek, “Yesus, trimola ro aku.” Tros dio belotot tros mekek, “Tuan, dak usa anggep ini jadi duso dio wong.” Abes tu dio mati.

Sikok lanang benamo Saulus stojo samo wong yang ngebunu Stepanus, tros dio ngejago juba punyo dio wong yang ngebabeti Stepanus. Ari tu, banyak wong di Yerusalem mulai nyikso pengekot-pengekot Yesus, sampe-sampe dio wong ngelarike diri ke tempat-tempat laen. Tapi mugola cak itu, dio wong mase bae ngebritoke pasal Yesus ke mano bae dio wong pegi.

Mored Yesus yang benamo Pilipus iola sala sikok dari wong pecayo yang ngelarike diri dari Yerusalem pas masa penganiayoan. Dio pegi ke Samaria. Di situ dio bekotba pasal Yesus, jadi banyak wong yang dislametke. Tros, kapan ari ado malekat Allah ngongkon Pilipus pegi ngeliwati sikok jalan di padang goron. Pas dio lagi bejalan, dio jingok ado pejabat penteng dari Etiopia dodok di kreto. Ro Suci ngongkon Pilipus ontok maraki wong tu tros ngomong samo wong tu.

Pas Pilipus la parak kreto tu, dio denger wong Etiopia tu baco kitab Nabi Yesaya cak ni. “Dio wong gawak Dio pecak anak domba yang nak dibunu. Jugo, pecak anak domba yang diem, Dio dak ngomong apo-apo. Dio diperlakuke dak adel tros dak dihormati. Edop-Nyo diambek dari Dio.”

Pilipus nanyo samo wong Etiopia tu, ujinyo, “Kau ngerti dak apo yang kau baco?” Jawab wong Etiopia tu, “Idak. Aku dak pacak ngerti, kecuali amen ado wong yang nerangke ke aku. Sinila tros dodokla di sebela aku. Apo Yesaya ni noles pasal dio dewek apo wong laen?”

Laju Pilipus nerangke ke wong Etiopia tu amen Yesaya tu ngomong pasal Yesus. Pilipus jugo makek banyak ayat Alkitab yang laen ontok nerangke kabar baek pasal Yesus.

Pas dio wong di pejalanan, dio wong jingok banyu. Uji wong Etiopia, “Jingok! Ado banyu! Bole dak aku dibaptes?” Tros dio ngongkon soper ontok nyetopi kretonyo.

Abes tu toronla dio wong ke dalem banyu, tros Pilipus ngebaptes wong Etiopia tu. Abes dio wong metu dari banyu, tibo-tibo Ro Suci gawak Pilipus pegi ke tempat laen di mano dio pacak ngelanjotke ontok ngelanjotke wong-wong pasal Yesus.

Wong Etiopia tu ngelanjotke pejalanannyo. Dio seneng karno dio la ngenal Yesus.