43. Grejo Mulo-mulo

Abes Yesus balek ke surgo, mored-mored-Nyo tinggal di Yerusalem pecak yang la dikongkon Yesus. Wong-wong pecayo yang ado di sano bekompol ontok bedoa teros-terosan.

Tiap taon, limo polo ari abes Paska, wong-wong Yahudi ngerayoke ari yang penteng yang disebot ari Pentakosta. Pentakosta tu iola ari pas wong Yahudi lagi ngerayoke panen gendom. Sloro wong Yahudi dari sloro dunio dateng ke Yerusalem ontok ngerayoke ari Pentakosta samo-samo. Taon tu, Pentakosta dirayoke kiro-kiro seminggu abes Yesus naek ke surgo.

Sementaro wong-wong pecayo tu lagi kompol besamo-samo, tibo-tibo ruma tempat dio wong bekompol tu dipenui ole suaro pecak angin besak. Abes tu ado pecak nyalo api tejingok di pocok kepalak wong-wong pecayo tu. Sloro dio wong tu dipenui Ro Suci tros mulai ngomong makek baso-baso laen.

Pas wong-wong di Yerusalem denger suaro tu, banyak wong bekompol nak tau apo yang tejadi. Pas dio wong denger wong-wong pecayo tu ngenyatoke pasal pebuatan Allah yang hebat nian, dio wong teheran karno dio wong denger sloro omongan tu dalem baso-baso dio wong dewek.

Beberapo wong nudu amen mored-mored Yesus tu mabok. Laju Petros tegak tros becerama ke dio wong, ujinyo, “Dengerke aku! Wong-wong ni dak mabok! Kejadian ni ngenepi pewahyuan yang la disampeke ole Nabi Yoel di mano Allah ngomong cak ini, ‘Pas ari-ari teaker, Aku bakal nuangke Ro Aku.’”

“Oi wong Israel, Yesus ni iola wong yang ngebeken banyak nian tando-tando yang hebat jugo ajaeb pakek kuaso Allah, cak yang la kamu jingok jugo yang la kamu tau. Tapi mase bae kamu salebke Dio!”

“Mugola Yesus mati, tapi Allah bangketke Dio dari antaro wong mati. Ini ni ngenepi pewahyuan yang tetoles cak ni, ‘Kau dak bakal biarke Wong Suci Kau busuk di jero koboran.’ Kami la jadi saksi-saksi nyato amen Allah la bangketke Yesus.”

“Yesus sekarang dimulioke di sampeng kanan Allah Ubak. Tros Yesus jugo la ngerem Ro Suci yang la Dio janjike. Ro Sucila yang beken sloro apo yang kamu jingok samo denger sekarang ni.”

“Kamu nyalebke Yesus ni. Tapi kamu perlu tau dengen pasti amen Allah la jadike Yesus Tuan jugo ALmasih!”

Wong-wong yang dengerke omongan Petros jadi tesentu nian pasal yang diomongkenyo. Laju dio wong betanyo samo Petros jugo samo mored-mored tu. Uji dio wong, “Apo yang haros kami lakuke?”

Uji Petros, “Betobatla tros dibaptes dalem namo Yesus Almasih, supayo duso kamu diamponi Allah. Jadi Dio bakal ngenjok kamu karunio Ro Suci.”

Kiro-kiro tigo ribu wong pecayo samo omongan Petros tros jadi mored-mored Yesus. Dio wong dibaptes tros jadi jemaat grejo di Yerusalem.

Mored-mored tu rajen bekompol, dengerke ajarannyo rosul-rosul, makan besamo, jugo bedoa samo-samo. Dio wong seneng muji Allah besamo-samo jugo saleng bebage sloro yang dio wong punyo. Sloro wong seneng samo dio wong. Tiap ari maken banyak bae wong yang jadi pecayo.