35. Crito Pasal Ubak yang Baek

Kapan ari, Yesus ngajar banyak tukang pajak samo banyak wong yang beduso laennyo yang la bekompol ontok ngedengerke Dio.

Beberapo pemempen agama yang jugo ado di sano jingok Yesus ni ngebeken wong-wong beduso tu pecak kawan dewek. Pasal tu ngebekn dio wong saleng berotokan. Laju Yesus nyritoke crito ni.

“Ado sikok ubak yang punyo duo ikok anak lanang. Anak yang keduo ni ngomong ke ubaknyo cak ini, ‘Bak, aku nak waresan aku sekarang!’ Jadi ubaknyo ni ngebageke sloro hartonyo ontok keduo anaknyo tu."

“Laju anak yang keduonyo ni ngompolke galo-galo yang dio punyo, tros pegi ke tempat yang jao, tros ngambor-amborke duetnyo dalem keedopannyo yang banyak duso."

“Abes tu tejadila musiba kelaperan yang besak di tempat tu, tros dio dak katek duet ontok beli makanan. Dio nrimo sikok-sikoknyo gawean yang dio temuke. Gaweannyo tu ngenjok makan babi. Dio jadi sengsaro jugo kelaperan sampe dio nak makan makanan babi tu.’”

“Akernyo anak yang keduo tu ngomong ke dirinyo dewek, ‘Apola yang lagi aku gaweke ni? Babu-babu di tempat ubak aku bae punyo makanan yang banyak, tapi aku di sini kelaperan. Aku nak balek ke ubak aku tros mintak supayo aku pacak jadi sala sikok babunyo.’”

“Sementaro anaknyo yang keduo ni mase jao, ubaknyo ni la nyingok dio, tros ngeraso kesian samo dio. Jadi ubaknyo belari ke ara anaknyo tros dipeloknyo jugo diciumnyo.”

“Uji anak yang keduo ni, ‘Bak, aku la beduso samo Allah jugo samo Ubak. Aku ni dak pantes lagi jadi anak Ubak. Biarla aku jadi babu Ubak bae.’”

“Tapi ubaknyo ngomong ke sala sikok babunyo, ‘Gancangla pegi! Gawakke baju yang bagus tros pakekke ke anak aku! Pasangkela cencen di jarinyo jugo pasangke selop di kakinyo. Abes tu sembelela anak sapi yang sempurno, tros kito beken pesta. Soalnyo anak aku yang la mati, sekarang dio edop lagi! Dio ilang, tapi sekarang la ditemuke lagi!’”

“Laju dloro wong di tempat tu beseneng-seneng. Dak lamo tu, anaknyo yang petamo ni balek dari kebon. Dio denger suaro musik tros jingok wong-wong tu lagi bejoget, laju betanyo apo yang tejadi.”

“Pas dio tau amen ado pesta karno adeknyo la balek, dio jadi mara nian tros dak galak masok ke jero ruma. Jadi ubaknyo ni metu tros ngajak dio ontok melok bepesta, tapi dio ni tetep dak galak.”

“Ujinyo, ‘Selamo ni aku la stio begawe ontok Ubak. Aku dak perna dak noroti Ubak, tapi sikok kambeng kecik bae Ubak dak perna enjokke ke aku supayo aku pacak bepesta samo kawan-kawan aku. Tapi pas anak Ubak yang sikok tu ngambor-ngambori duet Ubak ontok pasal-pasal yang beduso, Ubak nyembeleke anak sapi yang sempurno ontok dio!’”

"Jawab ubaknyo, ‘Anakku, kau tu ado samo aku teros. Sloro yang aku punyo ni jugo punyo kau. Tapi kito pantes beken pesta ontok adek kau, soalnyo adek kau la mati, tapi sekarang edop lagi. Dio ilang, sekarang la ditemuke lagi!’”