34. Yesus Ngajar Crito-crito Laennyo

Yesus nyritoke banyak crito laennyo pasal Kerajaan Allah. Uji Yesus, “Kerajaan Allah tu pecak biji sawi yang ditanem di ladang. Pas mase bebentok biji, sawi tu biji yang paleng kecik dari segalo jenis biji.”

“Tapi pas biji tu la tombo, biji tu agek jadi yang paleng besak dari sloro taneman yang ado di kebon, lumayan besak sampe-sampe borong-borong dateng tros buat sarangnyo di cabang-cabangnyo.”

Yesus nyritoke crito yang laen jugo, “Kerajaan Allah pecak ragi yang dicamporke ke dalem adonan roti sampe ragi tu nyatu ke sloro adonan tadi.”

“Kerajaan Allah jugo pecak harto yang tependem di kebon. Pas ado wong yang nemukenyo, dikoborkenyo lagi. Dengen ati yang seneng, dio pegi nyualke galo-galo yang dio punyo tros dibelinyo kebon tadi.”

“Kerajaan Allah jugo pecak mutiaro yang sempurno dengen hargo yang mahal. Pas pedagang mutiaro nemukenyo, dio ngejual sloro hartonyo ontok beli mutiaro tu.”

Tros Yesus nyritoke crito laen jugo. Crito ni ontok wong-wong yang pecayo amen amal dio wong tu pacak nyelametke dio wong, tros galak ngino wong laen. Uji-Nyo, “Ado duo ikok wong pegi ke Ruma Allah ontok bedoa. Sala sikoknyo iola tukang pajak, tros yang laen tu pemempen agama.”

“Pemempen agama tu bedoa cak ini, ‘Mokase Allah amen aku bukan wong penduso pecak wong-wong laen, pecak perampok, wong yang dak adel, pejina, jugo bukan pecak tukang pajak ni.’"

"‘Aku puaso duo kali setiap minggunyo, tros aku ngenjokke sepolo persen dari apo yang aku punyo.’”

“Tapi tukang pajak tu tegak di tempat yang jao, tros matonyo jugo dak nyingok ke langet, malahan dio ngeboki dadonyo tros bedoa cak ni, ‘Allah, kesianila aku, wong yang beduso ni.’”

Abes tu uji Yesus, “Aku omongi ke kamu, tukang pacak tula yang didenger jugo dibenerke Allah. Tapi Allah dak seneng samo doa pemempen agama tu. Allah bakal ngerendake wong yang sombong, jugo bakal ngangkat wong yang ngerendake diri.”