36. Yesus Beruba Wujud

Kapan ari, Yesus gawak tigo ikok mored-Nyo besamo Dio: Petros, Yakobus, samo Yahya. (Yahya yang ini bukan wong yang ngebaptes Yesus.) Dio wong naek ke gonong yang tinggi ontok bedoa.

Pas Yesus lagi bedoa, rai Yesus ni beruba jadi terang pecak matoari. Tros baju-Nyo jugo jadi pote pecak cahayo, lebe pote daripada yang pacak dibeken ole wong di bumi ni.

Abes tu, Nabi Musa samo Nabi Elias moncol. Nabi-nabi ni edop ratosan taon sebelom kejadian ni. Dio wong ngomong ke Yesus pasal kematian-Nyo, yang dak lamo lagi bakal tejadi di Yerusalem.

Pas Musa samo Elias ni lagi ngomong samo Yesus, uji Petros ke Yesus, “Bagus nian kito ado di sini. Payo kito beken tigo tempat tinggal, sikok ontok Kau, sikok ontok Musa, tros sikok ontok Elias.” Petros idak tau apo yang diomongkenyo.

Pas Petros ni lagi ngomong, ado awan yang terang nian toron tros notopi dio wong. Tros ado suaro dari awan tu, “Inila Anak Aku yang Aku kasehi. Aku seneng samo Dio. Dengerkela Dio.” Tigo ikok mored Yesus ni ketakotan nian tros nyampak ke tana.

Tros Yesus nyentu dio wong tros ngomong cak ini, “Dak usa takot. Bangunla.” Pas dio wong nyingok di sekitar situ, dio wong dak nyingok siapo-siapo kecuali Yesus.

Yesus samo tigo mored-Nyo toron dari gonong. Laju Yesus ngomong ke dio wong, “Dak usa dulu ngomong ke siapo-siapo pasal apo yang tejadi di sini. Dak lamo lagi Aku bakal mati tros bakal dibangketke. Abes tu kamu bole nyritokenyo ke wong-wong.”