33. Crito Pasal Petani

Kapan ari, Yesus ado di pengger laot, lagi ngajar keromonan wong banyak. Keromonan wong tu maken banyak sampe-sampe Yesus naek ke pocok prau tros mulai ngomong dari sano.

Yesus ngomong cak ini. “Ado sikok petani lagi nanem biji. Pas dio lagi nyebarke biji tu dengen tangannyo, sebagean dari biji tu campak ke jalan. Laju datengla borong, tros dimakannyo galo-galo biji yang nyampak di jalan tadi.”

“Sebagean dari biji-biji laennyo nyampak di tempat yang bebatu, yang dak banyak tananyo. Biji yang nyampak di tempat bebatu tu tombo cepet nian. Tapi pas matoari tembol tros jadi panas, taneman tu jadi layu tros mati, karno akarnyo idak masok nian ke dalem tana.”

“Sebagean dari biji-biji laennyo lagi campak di tenga-tenga semak yang beduri. Biji tu tejepet duri, jadi dak pacak ngaselke bua.”

“Sebagean dari biji-biji laennyo campak di tana yang sobor. Biji tu tombo tros ngaselke bua 30, 60, sampe 100 kali lipet dari yang la ditanem. Siapo yang punyo kopeng, biarla dio denger!”

Crito ni ngebingungke mored-mored Yesus. Tros Dio ngejelaske cak ni, “Biji tu iola Pirman Allah. Jalan tu pecak wong-wong yang ngedengerke Pirman Allah, tapi idak ngerti. Jadi Ebles ngambek pirman tu dari dio wong.”

“Tana yang bebatu tu pecak wong yang denger Pirman Allah tros nrimonyo dengen seneng ati. Tapi pas dio ngalami kesaroan, apo pas waktu ado penganiayoan, dio mondor. Ini tejadi karno Pirman Allah tu dak beakar di dalem ati dio wong.”

“Tana yang banyak semak duri tu pecak wong yang denger Pirman Allah tros pecayo. Tapi seereng bejalannyo waktu, kase dio wong ke Allah tealang samo kekuateran, kekayoan, samo kenikmatan edop. Akibatnyo ajaran yang dio wong denger dak ngaselke bua.”

“Tapi tana yang sobor tu iola wong-wong yang denger Pirman Allah, pecayo, tros ngaselke bua.”