32. Yesus Nyemboke Lanang yang Dimasoki Setan samo Betino yang Saket

Kapan ari, Yesus samo mored-mored-Nyo naek prau tros nyebrangi danau ke tempat wong Gadara tinggal.

Pas dio wong sampe di sebrang danau, sikok lanang yang kemasokan setan belari ke Yesus.

lanang ni kuat nian sampe-sampe dak katek yang pacak megangi dio. Wong-wong sereng masong tangan samo kakinyo makek rante-rante, tapi dio teros-terosan ngancorke rante tu.

Dio tinggal di koboran di daera tu. Siang malem wong ni mekek-mekek. Dio dak makek baju tros bekali-kali dio nyeseti badannyo dewek makek batu.

Pas lanang tu sampe ke Yesus, dio belotot di adepan-Nyo. Uji Yesus ke setan tu, “Metula dari wong ni!”

Wong yang kemasokan setan tu mekek kuat nian cak ni, “Apo yang kau kendaki samo aku, Yesus, Anak Tuhan Yang Mahabesak? Jangan nyikso aku!” Laju Yesus nanyo ke setan yang masoki wong tu, “Siapo namo kau?” Uji dio, “Aku ni Legiun, karno jumla kami ni banyak.” (Legiun iola kelompok tentaro Roma yang jumlanyo beribu-ribu tentaro.)

Setan-setan tu mintak ke Yesus, “Jangan ngoser kami dari daera ni!” Di sano ado segrombolan babi lagi makan di boket parak tempat tu. Laju, setan-setan tu mintak ke Yesus, “Tolong kongkon bae kami masok ke dalem babi-babi tu!” Uji Yesus, “Pegila!”

Laju setan-setan tu metu dari wong tu tros masok ke dalem babi-babi tu. Babi-babi tu belari noroni tebeng yang curam tros nyampak ke dalem laot sampe tenggelem. Kiro-kiro ado 2.000 babi di grombolan tu.

Pas wong-wong yang ngorosi babi-babi tu nyingok apo yang la tejadi, dio wong lari tros ngenjoktauke ke sloro wong apo yang la dilakuke Yesus. Sloro wong dateng dari kota tros nyingok wong yang tadinyo kemasokan setan. Dio lagi dodok, la makek baju, tros sikapnyo la cak wong waras.

Wong-wong tu ketakotan tros mintak Yesus ontok pegi. Laju Yesus naek ke prau tros besiap nak pegi. Lanang yang kemasokan tadi mintak supayo melok pegi samo Yesus.

Tapi Yesus ngomong ke dio, “Dak usala. Balekla ke ruma kau tros enjoktauke ke kawan samo kluargo kau apo yang la dilakuke Allah ontok kau, karno Dio la ngaseani kau.”

Laju wong tu pegi tros dienjoktaukenyo ke wong-wong apo yang la dilakuke Yesus ke dio. Setiap wong yang denger critonyo keheranan tros ngeraso takjob.

Yesus balek ke sebrang dari danau Galilea. Ado banyak yang bekompol di sekeleleng-Nyo tros bedesekan di parak Yesus. Di keromonan tu ado sikok betino yang la ngalami pendarahan selamo duo belas taon. Betino tu la ngabeske sloro duetnyo ontok ngebayar dokter supayo pacak sembo, tapi keadaannyo tamba para.

Betino tu denger amen Yesus la nyemboke banyak wong saket tros meker cak ini, “Aku yaken amen aku pacak nyentu baju Yesus bae, aku bakal disemboke jugo!” Dio maraki Yesus tros nyentu baju-Nyo. Tibo-tibo, pas dio nyentu baju Yesus, pendarahannyo brenti!

Yesus langsong sadar amen ado kuaso yang metu dari diri-Nyo. Laju Yesus bebalek tros betanyo, “Siapo yang nyentu Aku?” Uji mored-mored-Nyo, “Tuan, banyak wong yang ado di parak Kau jugo besenggolan samo Kau. Cak mano Kau pacak nanyo, ‘Siapo yang nyentu Aku?’”

Betino tu belotot di adepan Yesus. Dio gemeteran tros takot. Laju betino tu ngenjoktauke ke Dio apo yang dio lakuke, jugo amen dio la disemboke. Uji Yesus, “Iman kau la nyemboke kau. Pegila dengen damai.”