29. Crito Pasal Babu yang Dak Katek Raso Kasean

Kapan ari Petros ngomong ke Yesus, “Tuan, sampe berapo kali aku mesti maapke dolor aku amen dio beken duso ke aku? Apo sampe tojo kali?” Uji Yesus, “Bukan tojo kali, tapi sampe tojo polo kali tojo!” Maksodnyo kito mesti teros maapke. Laju Yesus nyritoke crito ni.

“Kerajaan Allah tu pecak sikok rajo yang nak nyelesaike peretongan utang dengen babunyo. Sala sikok babunyo ni ngutang banyak nian, kiro-kiro upa gawe 200.000 taon.”

“Karno babunyo ni dak pacak ngebayar utangnyo, uji rajonyo tu cak ni, ‘Jualla wong ni jugo kluargonyo jadi budak ontok gantike pembayaran utangnyo.’”

“Babunyo ni nyampakke dirinyo tros belotot di adepan rajo tu, tros ngomong cak ini, ‘Besabarla samo aku! aku bakal bayar galonyo.’ Rajo ngeraso kasean samo babunyo tu, tros diaposkenyola sloro utangnyo.”

“Babu tu pegi tros ketemu samo babu yang laen yang punyo utang samo dio, jumla utangnyo tu sekitar empat bulan gajinyo. Babu yang tadi tu nyekek babu yang punyo utang samo dio. Tros ngomong cak ini, ‘Bayarla utang kau tu samo aku.’”

“Wong tu nyampakke diri tros belotot, tros ngomong cak ini, ‘Besabarla samo aku! aku bakal bayar galonyo.’ Tapi babu yang tadi tu dak galak, tros masoki wong tu ke penjaro sampe dio pacak ngebayar utangnyo.”

“Beberapo babu yang laen nyingok apo yang la tejadi tros ngeraso teganggu nian. Dio wong pegi ke rajo tros nyritoke sloronyo.”

“Rajo manggel babu yang tadi tu tros ngomong cak ni, ‘Kau tu babu yang jahat! Aku maapi kau tros ngelunasi utang kau karno kau yang mintak-mintak di adepan aku. Harosnyo kau ngelakuke hal yang samo.’ Jadi rajo mara nian tros masokke babu yang jahat tadi ke jero penjaro sampe dio ngebayar sloro utangnyo.”

Laju Yesus ngomong cak ini, “Itula yang bakal dilakuke Ubak Aku yang di surgo ke setiap wong di antaro kamu, amen kamu dak maapi dolor kau dari dalem ati kamu.”