30. Yesus Ngenjok Makan Limo Ribu Wong

Yesus ngongkon mored-mored-Nyo ontok bekotba samo ngajar wong-wong di beberapo doson yang bebeda. Pas dio wong balek, dio wong nyritoke ke Yesus apo yang la dio wong ajarke samo lakuke. Abes tu Yesus ngajak dio wong pegi samo Dio ke tempat yang tenang ontok istirahat sedenget. Laju, dio wong naek ke prau tros pegi ke sebrang danau.

Tapi banyak wong yang nyingok Yesus samo mored-mored tu pegi. Wong-wong tu belari di sekitaran danau ontok sampe ke sebrang ngedului dio wong. Pas Yesus samo mored-mored-Nyo sampe, segrombolan wong la ado di situ, nunggui dio wong.

Ado lebe dari 5000 wong dalem keromonan tu. Itu tu belom temasok betino samo anak-anak. Yesus ngeraso sayang nian samo wong-wong tu. Bage Yesus, wong-wong ni pecak domba yang dak katek gembalanyo. Yesus ngajar dio wong tros nyemboke wong-wong yang saket.

Pas ari la maken petang, mored-mored-Nyo ngomong cak ini, “Ari la petang tros dak katek kota deket sini. Kongkonla wong-wong tu pegi supayo dio wong pacak nyari makanan.”

Tapi Yesus ngomong ke dio wong, “Kamu mesti ngenjok dio wong makan!” Uji mored-mored-Nyo, “Cak mano kami pacak ngelakuke tu? Kami ni cuman punyo limo ikok roti samo duo ikok iwak.”

Yesus ngomongke mored-mored-Nyo ontok ngongkon wong banyak tu dodok bekompol di pocok rompot. Sikok kelompok tu limo polo wong.

Laju Yesus ngambek limo roti samo duo iwak tu, tros nyingok ke langet, tros besokor ke Allah ontok makanan tu.

Laju Yesus ngebela-bela roti samo iwak tu. Dio ngenjokke belahan-belahan tadi ke mored-mored-Nyo ontok dibageke ke wong-wong tu. Mored-mored tu teros-terosan ngebageke makanan tu sampe dak abes! Sloro wong yang ado di situ makan tros ngeraso kenyang.

Mala mored-mored tu ngompolke siso makanan tadi. Makanan tu mase tesiso duo belas keranjang! Sloro makan tu beasal dari limo roti samo duo iwak.