28. Penguaso Mudo yang Kayo

Kapan ari ado penguaso mudo yang kayo dateng ke Yesus tros nanyo cak ini, “Guru yang baek, apo yang mesti aku gaweke supayo pacak edop selamonyo?” Uji Yesus ke wong tu, “Ngapo kau ngomongke amen Aku ni baek? cuman ado sikok yang baek, itu tu Allah. Tapi amen kau nak edop selamo-lamonyo, norotla hokom-hokom Allah.”

“Hokom-hokom yang mano?” tanyo wong tu. Jawab Yesus, “Jangan ngebunu. Jangan bejina. Jangan maleng. Jangan ngotaki. Hormatila ubak samo umak kau tros kasehila sesamo kau manusio pecak diri kau dewek.”

Uji lanang tu, “Aku la noroti segalo hokom ni dari aku mase kecik. Apo lagi yang mesti aku lakuke?” Yesus nyingok dio tros ngasei lanang tu.

Jawab Yesus, “Amen kau nak jadi wong yang sempurno, pegila tros jualla sloro yang kau punyo tros enjokke duetnyo ke wong-wong mesken, tros kau bakal ado harto di surgo. Abes tu melokla samo Aku.”

Pas lanang tu ngedenger apo yang diomongke Yesus, dio jadi sede nian, karno dio ni kayo nian tros dio dak galak ngenjokke hartonyo. Dio bebalek tros pegi ninggalke Yesus.

Tros Yesus ngomong ke mored-mored-Nyo, “Saro nian ontok wong kayo masok ke jero Kerajaan Allah! Yo, lebe muda sikok unto masok ke lobang jarom daripada sikok wong kayo masok ke jero Kerajaan Allah.”

Pas mored-mored ngedenger tu, dio wong tekejot tros ngomong cak ini, “Amen cak tu, siapo yang pacak dislametke?”

Yesus nyingoki dio wong tros ngomong cak ini, “Ontok manusio ini dak mongken, tapi ontok Allah segalo sesuatu tu mongken.”

Uji Petros ke Yesus, “Kami ni la ninggalke galo-galonyo tros meloki Kau. Apo yang bakal jadi upa kami?”

Jawab Yesus, “Setiap wong yang la ninggalke ruma, ubak, umak, anak, dolor, apo hartonyo demi Aku bakal nerimo lagi 100 kali lipet, jugo edop yang kekal. Tapi banyak wong yang petamo bakal jadi wong yang teaker, tros wong yang teaker bakal jadi wong yang petamo.”