27. Crito Wong Samaria yang Baek Ati

Kapan ari, ado sikok hakem dateng ke Yesus ontok nguji Dio, ujinyo, “Guru, apo yang mesti aku lakuke supayo aku edop selamonyo?” Jawab Yesus, “Apo yang tetoles di Prento Allah?”

Uji hakem tu, “Kasehila Allah Tuhan kau, dengen sepenu ati, jiwo, kekuatan, samo pekeran kau. Tros kasehila sesamo manusio pecak diri kau dewek.” Uji Yesus, “Bener kato kau tu! Gawekela cak itu biar kau bakal edop selamo-lamonyo.”

Tapi hakem tu nak ngeboktike amen diri dio tu bener. Jadi dio betanyo lagi, “Siapo yang dimaksod sesamo manusio tu?”

Yesus ngejawab makek sikok crito. Uji-Nyo, “Ado sikok lanang Yahudi yang lagi dalem pejalanan dari Yerusalem, nak ke Yeriko.”

“Sementaro dio bepegian, dio diserang samo sekelompok perampok. Perampok ni ngambek galo-galo hartonyo, tros wong Yahudi tu digeboki sampe amper mati. Abes tu dio wong pegi.”

“Abes tu, ado sikok imam Yahudi yang kebetolan ngeliwati jalan tu. Pas imam tu nyingok wong yang dirampok samo digeboki tadi, dio pinda ke sebrang jalan tros dak diagokinyo wong yang boto petolongan tu. Jadi dio ngeliwatinyo bae.”

“Dak lamo abes tu, ado wong Lewi ngeliwati jalan tu. (Lewi tu iola suku Yahudi yang ngebantu imam-imam di Ruma Allah.) Wong Lewi ni jugo pinda ke sebrang jalan tu tros dak diagokinyo wong yang dirampok samo yang digeboki tu.”

“Wong selanjotnyo yang bejalan di jalan tu iola wong Samaria. (Wong-wong Samaria iola ketoronan camporan Yahudi samo wong-wong dari negaro-negaro laen. Wong Samaria samo wong Yahudi saleng ngebenci.) Pas wong Samaria ni nyingok wong tu, dio ngeraso kesian. Dio ngerawat wong tu tros ngebalot luko-lukonyo.”

“Laju wong Samaria tu naekke wong tu ke keledainyo tros digawaknyo ke sikok penginepan di mano dio ngerawatnyo.”

“Pas besoknyo, wong Samaria tu mesti ngelanjotke pejalanannyo. Dio ngenjokke duet ke wong yang betanggong jawab di penginepan tu, tros ngomong cak ni, ‘Jagola dio, tros amen duetnyo kurang agek aku ganti pas aku balek lagi ke sini.’”

Tros Yesus betanyo ke hakem tu, “Cakmano uji kau? Yang mano dari ketigo wong tadi yang kau peker sesamo manusio dari wong yang dirampok samo digeboki tu?” Jawab hakem tu, “Wong yang nonjokke raso kesian tadi.” Uji Yesus ke hakem tu, “Pegila tros gawekela cak itu jugo.”