26. Yesus Ngemulai Gaweannyo

Pas la ngalake olokan Ebles, Yesus balek ke Galilea tempat di mano Dio tinggal. Dio dipenui samo kuaso Ro Suci. Yesus pegi dari sikok tempat ke tempat yang laen sambel ngajar. Sloro wong di situ ngomongi yang baek pasal Dio.

Yesus pegi ke Najaret tempat dio dibesaki. Pas ari Sabat Dio pegi ke tempat ibada. Dio dienjok golongan kitab Nabi Yesaya, supayo dibacokenyo. Yesus ngebukak golongan kitab tu tros dibacokenyo sebagean ke wong-wong tu.

Yesus baco, “Allah la ngenjokke Ro-Nyo ke Aku supayo Aku pacak ngebritoke kabar baek ontok wong-wong mesken, kebebasan ontok tahanan, kesemboan ontok wong-wong yang buto, jugo kelepasan ontok wong-wong yang teaniayo. Taon ni iola taon kebaekan Allah.”

Tros Yesus dodok. Setiap wong yang dado di tempat ibada tu masati Dio. Dio wong tau amen bagean dari kitab yang baru dibacokenyo tu ngomong pasal Almasih. Uji Yesus, “ayat-ayat yang baru Aku bacoke ke kamu la digenepi pas kamu ngedengernyo.” Sloro wong teheran. Uji dio wong, “bukannyo Dio ni anak Yusup?” .

Uji Yesus, “Emang bener amen katek nabi yang dihargoi di dosonnyo dewek. Pas jaman Nabi Elias ado banyak jando di Israel. Tapi pas ujan idak toron selamo tigo taon enam bulan, Elias idak diotos ole Allah ontok nolong sala sikok dari jando-jando di Israel, melaenke nolong sikok jando dari bangso laen.”

Yesus ngelanjotke omongan-Nyo, uji-Nyo, “Pas jaman Nabi Ilyasa, ado banyak wong Israel tekeno penyaket kusta. Tapi Ilyasa dak nyemboke sala sikok dari dio wong. Dio cuman nyemboke penyaket kustanyo Naaman. Dio ni komandan dari moso-moso Israel.” Wong-wong yang denger ajaran Yesus ni iola wong Yahudi. Jadi pas dio wong denger Yesus ngomong cak tu, dio wong jadi mara nian ke Yesus.

Wong-wong Najaret nyeret Yesus metu dari tempat ibada tu, tros gawak Dio sampe ke pengger jurang supayo pacak dicampakke ke jurang tu ontok ngebunu Dio. Tapi Yesus ni bejalan ngeliwati keromonan wong-wong tu tros pegi dari kota Najaret.

Abes tu Yesus pegi ngeliwati daera Galilea, tros banyak wong yang dateng ke Dio. Dio wong banyak gawak wong saket jugo wong cacat, temasok jugo yang dak pacak bejalan, yang buto, yang pekak, samo yang bisu. Tros Yesus nyembuke dio wong.

Banyak wong yang kemasokan setan digawak ke Yesus. Dengen prento Yesus, setan-setan tu metu dari wong-wong tu, tros bejeret, “Kau iola Anak Allah!” Wong banyak tekagom tros muji Allah.

Abes tu Yesus mele duo belas ikok wong yang Dio panggel rosul. Rosul-rosul tu pegi samo Yesus tros belajar dari Dio.