25. Ebles Nyuboi Yesus

Abes Yesus la dibaptes, Ro Suci mempen Dio metu ke padang goron. Di sano Dio bepuaso selamo empat polo ari empat polo malem. Selamo tu jugo Dio dicuboi samo Ebles.

Uji Ebles, “Amen Kau Anak Allah, ubala batu ni jadi roti biar Kau pacak makan!”

Uji Yesus, “Ado ayat, ‘Manusio edop bukan dari roti bae, tapi dari setiap omongan yang Allah ucapke!’”

Abes tu Ebles gawak Yesus ke sikok tempat yang paleng tinggi di Ruma Allah tros ngomong cak ini, “Amen Kau Anak Allah, campakkela diri Kau ke bawa, karno ado tetoles, ‘Dio bakal ngongkon malekat-Nyo ontok nangkep Kau supayo kaki Kau dak nyentu batu.’”

Tapi Yesus jawab cak ini, “Ado jugo ayat yang tetoles cak ni, ‘Jangan nyuboi Allah.’”

Abes tu Ebles nonjokke ke Yesus sloro kerajaan dunio samo sloro kemulioannyo tros ngomong cak ni, “Aku bakal ngenjokke Kau sloro ni amen Kau sojod samo nyemba aku.”

Uji Yesus, “Pegila dari Aku, Ebles! Ado ayat, ‘Sembala Allah Tuhan kau bae, tros layanila Dio bae.’”

Yesus idak kala samo olokannyo Ebles, laju Ebles ninggalke Dio. Abes tu malekat-malekat dateng tros ngelayani Yesus.