24. Yahya Ngebaptes Yesus

Yahya, anak dari Jakaria samo Elisabet, la besak, tros dio ni jadi nabi. Dio tinggal di padang goron, makanannyo tu madu liar samo belalang. Tros dio makek baju yang tebuat dari bulu unto.

Banyak wong yang dateng ontok ngedengerke kotba Yahya. Uji Yahya, “Betobatla, soalnyo Kerajaan Allah la parak!”

Pas wong-wong ngedenger pesen Yahya, banyak di antaro wong-wong tu betobat dari duso-dusonyo, tros Yahya ngebaptes dio wong. Banyak pemempen agama jugo dateng, tapi dio wong dak betobat apo ngakui duso-duso dio wong.

Yahya ngomong ke pemempen agama tu, “Kamu tu ulo bebiso! Betobatla tros ubala kelakuan kamu. Setiap batang yang dak ngaselke bua yang bagus bakal ditebang tros dibuang ke dalem api.” Jadi Yahya ngenepi apo yang diomongke nabi Yesaya, “Jingokla, Aku ngongkon otosan Aku ngedaului Kau. Tros dio bakal nyiapke jalan Kau.”

Ado beberapo dari wong Yahudi nanyo ke Yahya amen dio tu Almasih apo bukan. Uji Yahya, “Aku ni bukan Almasih, tapi bakal ado sikok wong yang dateng abes aku. Dio yang jao lebe hebat dari aku, sampe-sampe ontok mecolke selopnyo bae aku dak pantes.”

Pas besoknyo, Yesus dateng ontok dibapteske ole Yahya. Pas Yahya nyingok Yesus, dio ngomong cak ini, “Jingokla! Inila Anak Domba Allah, yang ngapos duso dunio.”

Uji Yahya ke Yesus, “Aku ni dak pantes ontok ngebaptes Kau. Harosnyo Kau yang ngebaptes aku.” Tapi Yesus ngomong cak ini, “Kau la yang mesti ngebaptes Aku, soalnyo itula pasal yang bener ontok dilakuke.” Akernyo Yahya ngebaptes Yesus tapi bukan karno Yesus ni beduso. Yesus dak perna beduso.

Pas Yesus metu dari banyu abes dibaptes, Ro Allah ngambek bentok pecak borong merpati tros hinggap di diri Yesus. Pas waktu yang samo, suaro dari surgo ngomong cak ni, “Kau ni iola Anak Aku yang tekase, samo Kaula yang Aku senengi.”

Allah la ngomong ke Yahya, “Ro Suci bakal dateng ke sikok Wong yang kau baptes. Dio tu iola Anak Allah.” Cuman ado sikok Allah. Tapi pas Yahya ngebabtis Yesus ado suaro dari Allah Ubak, dio jingok Allah Anak (iola Yesus), tros dio jingok Ro Suci.