23. Kelaeran Yesus

Mariam lagi betunangan samo wong baek benamo Yusup. Pas Yusup denger Mariam bonteng, dio ni tau amen itu tu bukan kupeknyo. Mugola cak itu, dio dak galak beken Mariam malu, jadi dio motoske ontok nyereke Mariam diem-diem. Sebelom tu tejadi, ado sikok malekat nampakke dirinyo ke Yusup liwat mimpi.

Uji malekat tu, “Yusup, dak usa takot jadike Mariam bini kau. Apo yang ado di rahemnyo tu iola dari Ro Suci. Mariam bakal beranakke anak lanang. Enjok Dio namo Yesus, karno Diola yang bakal nyelametke umat-Nyo dari duso dio wong" (Namo Yesus tu artinyo,‘ALLAH nyelametke'.)

Jadi Yusup ngaweni Mariam tros gawak dio balek jadi bininyo, tapi dio wong dak behobongan laki bini sampe Mariam beranak.

Pas Mariam la nak ngelaerke, pemrento Romawi ngongkon sloro wong pegi ke kota asal nenek moyang dio wong dewek-dewek ontok sensus pendodok. Laju Mariam samo Yusup haros pegi jao dari Nazaret ke Betlehem. Karno lelohor dio wong iola Daud yang kampong halamannyo di Betlehem.

Pas dio wong nyampe di Betlehem, dak katek tempat ontok nginep. Sikok-sikoknyo tempat yang pacak dio wong temuke cuman kandang ternak. Kupek tu laer di sano tros umaknyo ngolengke Dio di wada makanan ternak, karno katek tempat laennyo. Dio wong ngenjok namo kupek tu Yesus.

Malem tu, di parak tempat tu ado beberapo gembala lagi ngejago ternak dio wong. Tibo-tibo, dio wong ketakotan karno moncol malekat yang besinar. Uji malekat tu, “Dak usa takot, aku punyo kabar baek ontok kau. Almasih la laer di Betlehem!”

“Pegila, temukela kupek tu, tros kau bakal nemuke Dio dibedong kaen tros tebareng di wada makanan ternak.” Tibo-tibo, banyak nian malekat moncol di langet tros nyanyi samo muji Allah, ujinyo, “Kemulioan ontok Allah di surgo, tros damai di bumi ontok manusio yang Allah dewek seneng melenyo!”

Pas sloro gembala nyampe di tempat Yesus, dio wong jingok Yesus lagi tebareng di wada makanan ternak, pecak yang malekat tu omongi. Dio wong seneng nian. Mariam jugo seneng nian. Abes tu gembala-gembala tu balek ke padang rompot sambel muji Allah karno sloro yang dio wong denger samo jingok.

Beberapo waktu abes tu, wong bijak dari negri jao di timur jingok bintang ane di langet. Dio wong sadar amen rajo wong Yahudi yang baru la laer. Laju, dio wong lakuke pejalanan jao ontok jingok rajo ni. Dio wong nyampe di Betlehem tros nemuke tempat di mano Yesus tinggal.

Pas dio wong jingok Yesus samo umak-Nyo, dio wong tesongkor tros nyemba Dio. Dio wong ngenjok Yesus hadia-hadia mahal. Abes tu dio wong balek.