22. Kelaeran Yahya

Dulu, Allah ngomong ke umat-Nyo liwat malekat samo nabi-nabi-Nyo. Tapi la liwat 400 taon Dio dak ngomong ke dio wong. Tibo-tibo, ado malekat dateng gawak pesen dari Allah ontok imam yang benamo Jakaria. Jakaria samo Elisabet, bininyo, iola wong yang sole, tapi dio wong dak pacak punyo anak.

Uji malekat tu ke Jakaria, “Bini kau gek ngelaerke sikok budak lanang. Kau bakal namoi dio Yahya. Dio agek dipenui samo Ro Suci, tros diola yang bakal nyiapke wong-wong ontok Almasih!” Uji Jakaria, “Aku samo bini aku ni la tuo nian ontok punyo anak! Cakmano aku pacak tau amen pasal tu bakal tejadi?”

Uji malekat tu, “Aku ni dikerem ole Allah ontok nyampeke kabar baek ni samo kau. Tapi karno kau dak pecayo samo aku, kau bakal bisu sampe kupek tu laer.” Tibo-tibo Jakaria ni dak pacak ngomong. Tros tu malekat ni ninggalke Jakaria. Abes tu, Jakaria balek ke ruma. Dak lamo abes tu bininyo bonteng.

Pas Elisabet lagi bonteng enam bulan, malekat yang samo tibo-tibo moncol ke dolornyo Elisabet yang namonyo Mariam. Dio ni mase gades tros agek kawen samo tunangannyo yang benamo Yusup. Malekat tu ngomong, ujinyo, “Kau gek bonteng tros ngelaerke sikok kupek lanang. Kau mesti namoi dio Yesus. Soalnyo Diola Anak Tuhan Yang Mahabesak, tros Dio jugo bakal mrento ontok selamonyo.”

Maria ni ngejawab, ujinyo, “Cakmano ini pacak tejadi, aku ni blom belaki?” Malekat tu ngejelaske, “Ro Suci agek dateng ke kau, tros kuaso Allah agek nodongi kau. Jadi budak tu suci, soalnyo Dio ni Anak Allah.” Mariam ni pecayo tros nrimo apo yang la diomongke ole malekat tu.

Abes malekat tu ngomong ke Mariam, Mariam ngonjongi Elisabet. Pas Elisabet denger salamnyo Mariam, kupek yang ado dalem perot Elisabet ni ngelonjak kesenengan. Betino-betino tu seneng dengen apo yang la dilakuke Allah. Abes Mariam ngonjongi Elisabet selamo tigo bulan, Mariam balek ke ruma.

Pas Elisabet la ngelaerke kupek lanangnyo, Jakaria samo Elisabet ni namoi kupek tu Yahya, pecak yang la diprentoke ole malekat. Tros Allah ngejenke Jakaria ngomong, jadi dio ngomong cak ini, “Pujila Allah, karno Dio la inget umat-Nyo! Kau, anak aku, bakal disebot nabi Tuhan Yang Mahabesak. Kau bakal ngenjoktauke cakmano wong-wong pacak diamponi dari duso-dusonyo.”