2. Duso Masok ke Dunio

Adam samo bininyo seneng nian tinggal di taman yang bagus yang la dibeken Allah ontok dio wong tu. Dak katek sikokpun di antaro dio wong yang makek baju, tapi itu dak ngebeken dio wong malu, soalnyo dak katek duso di dunio. Dio wong sereng bejalan di taman sambel ngomong-ngomong samo Allah.

Tapi ado sikok ulo yang calak di taman tu. Dio nanyo ke betino tu cak ni, "Bener dak Allah ngelarang nian kamu makan bua dari sloro pohon di taman ni?"

Uji betino tu, "Allah ngeboleke kami makan bua dari sloro pohon, kecuali pohon pasal pengetauan yang baek samo yang jahat. Uji Allah, 'Amen kamu makan bua tu, apo cuman nyenggolnyo bae, kamu bakal mati.'"

Uji ulo tu, “Itu tu dak bener! Kamu dak bakal mati. Allah tau, amen kamu makan bua tu, kamu bakal jadi pecak Allah, tau apo yang baek samo yang jahat.”

Betino tu nyingok amen bua tu bagus tros kejingokannyo lemak. Dio jugo pengen jadi bijaksano, laju dio ngambek bua tu tros dimakannyo. Abes tu dio ngenjokkenyo ke lakinyo yang lagi samo dio, jadi lakinyo melok makan jugo.

Tibo-tibo, mato dio wong tebukak, tros dio wong sadar amen dio wong tu tlanjang. Dio wong nyubo notopi badannyo dengen ngebeken baju dari daon-daonan.

Tros Adam samo bininyo ngedenger suaro Allah lagi bejalan di taman. Dio wong singitan dari Allah. Tros Allah manggel Adam, uji-Nyo, “Di mano kau?” Uji Adam, “Aku ngedenger Kau bejalan di taman jadi aku takot, soalnyo aku ni tlanjang. Mangkonyo tu aku singitan.”

Tros Allah betanyo, “Siapo yang ngomong amen kau tlanjang? Apo kau makan bua yang aku larang tu?” Lanang tu ngejawab, “Betino yang Kau enjok ke aku ni, diola ngenjok aku bua tu.” Tros Allah nanyo ke betino tu, “Apo yang la kau lakuke?” Betino tu ngejawab, “Ulo tu na ngolai aku.”

Uji Allah ke ulo tu, “Tekotokla kau! Kau bakal ngerayap makek perot, tros kau jugo gek makan debu tana. Kau samo betino ni bakal saleng ngebenci, tros anak-anak kau samo anak-anaknyo jugo gek saleng bemosoan. Ketoronan betino ni bakal ngancorke palak kau, tros kau gek ngancorke tumitnyo.”

Tros Allah ngomong ke betino tu, “Aku bakal ngebeken kau kesaketan pas kau branak. Tros kau agek napsu samo laki kau tros dio bakal nguasoi kau.”

Allah ngomong ke lanang tu, “Kau ngedengerke bini kau tapi dak noroti Aku. Sekarang tana ni dikotok, kau mesti begawe berat ontok nyari makan. Tros kau gek bakal mati, tros badan kau gek balek ke tana.” Lanang tu ngenjok namo bininyo Hawa, yang artinyo “Ngenjok Keedopan”, soalnyo dio gek bakal jadi emak dari sloro wong. Tros Allah makekke Adam samo Hawa baju dari kolet binatang.

Tros uji Allah, “Sekarang ni karno manusio la samo pecak Kito, tau yang baek samo yang jahat, dio wong dak bole makan bua dari pohon keedopan tros edop slamonyo.” Jadi Allah ngongkon Adam samo Hawa metu dari taman yang bagus tu. Allah mrentoke malekat yang kuat bejago di depan pintu masok taman tu supayo dak katek wong yang pacak makan bua keedopan.