1. Penciptoan

Crito ni pasal awal galo-galonyo. Allah nyiptoke alam semesta samo segalo isinyo slamo enem ari. Awalnyo dunio ni gelep jugo kosong, tros dak katek yang tebentok di dalemnyo. Tapi Ro Allah melayang-layang di pocok banyu.

Ngomongla Allah cak ini, “Jadila trang!” Tros trang tu jadi. Allah nyingok amen trang tu baek tros nyebotnyo “siang.” Dio misakenyo dari kegelepan, yang Dio sebot “malem.” Allah nyiptoke trang di ari petamo penciptoan.

Pas ari keduo, Allah ngomong tros beken langet di pocok bumi. Dio beken langet dengen misake banyu yang ado di pocok dengen banyu yang ado di bawa.

Pas ari ketigo penciptoan, Allah ngomong tros misake banyu dari daratan. Dio sebot daratan tu "tana", tros banyu tu Dio sebot "laot". Allah nyingok apo yang la Dio ciptoke tu baek.

Abes tu ngomongla Allah cak ini, “Biarla bumi ni ngaselke segalo jenis pohon samo taneman.” Tros itula yang tejadi. Allah nyingok apo yang la Dio ciptoke tu baek.

Pas ari keempat penciptoan, Allah ngomong tros beken matoari, bulan, samo bintang-bintang. Allah beken galo-galo tu ontok ngenjokke cahayo ke bumi tros ontok nandoi siang samo malem, mosem samo taon. Allah nyingok apo yang Dio ciptoke tu baek.

Pas ari kelimo, Allah ngomong tros beken segalo yang berenang di dalem banyu jugo segalo borong. Allah nyingok amen itu tu baek galo, tros Dio ngeberkati binatang-binatang tu.

Pas ari keenem penciptoan, Allah ngomong cak ini, “Jadila segalo jenis binatang darat!” Laju tejadila pecak apo yang dikatoke Allah. Sebagean tu iola binatang ternak, sebagean binatang yang merangkak di tana, tros sebageannyo lagi binatang buas. Allah nyingok amen sloronyo tu baek.

Ngomongla Allah cak ini, “Biarla kito jadike manusio pecak Kito supayo merep samo Kito. Dio wong bakal nguasoi bumi samo sloro binatang.”

Laju Allah ngambek segumpel tana, tros ngebentoknyo jadi sikok lanang, tros niupke napas keedopan dalem dirinyo. Namo lanang ni Adam. Allah ngebeken taman di mano Adam pacak edop, tros nempatke dio di situ ontok ngerawat taman tu.

Di tenga-tenga taman tu, Allah nanem duo pohon kosos – iola pohon keedopan samo pohon pengetauan pasal yang baek samo yang jahat. Allah ngenjoktauke Adam amen dio pacak makan dari sloro pohon di taman tu kecuali dari pohon pengetauan pasal yang baek samo yang jahat. Amen dio makan dari pohon tu dio gek mati.

Abes tu ngomongla Allah cak ini, “Dak baek amen manusio tu dewekan bae.” Tapi dak katek sikokpun dari binatang-binatang ni pacak jadi penolong Adam.

Tros Allah ngebeken Adam tedok nyenyak. Allah ngambek sala sikok tulang rosok Adam tros ngebekennyo jadi sikok betino, tros digawaknyo ke Adam.

Pas Adam nyingok betino tu, dio ngomong cak ini, “Akernyo! Yang sikok ni pecak aku! Dio bakal disebot ‘betino.’” Inila soalnyo ngapo lanang ninggalke ubak samo umaknyo tros jadi sikok dengen bininyo.

Allah nyiptoke lanang samo betino pecak diri-Nyo. Dio ngeberkati dio wong tros ngomong ke dio wong, “Branak cocongla kamu di bumi!” Tros Allah nyingok amen segalo yang Dio beken tu baek, jadi Dio seneng nian dengen segalonyo tu. Ini ni tejadi pas ari keenem penciptoan.

Pas ari ketojo, Allah nyelesaike gawean-Nyo. Jadi Allah brenti dari segalo yang la Dio lakuke. Dio ngeberkati ari ketojo tros ngebekennyo suci, cak inila Allah ngebeken alam semesta samo sloro isinyo.