3. Banjer Besak

Lamo-kelamoan, manusio di bumi betamba banyak. Dio wong tu jadi jahat jugo kejem nian. Laju dunio jadi kacau nian akernyo Allah motoske ontok ngancorke dunio dengen banjer besak.

Tapi Nuh dapet kase karunio Allah. Dio tu wong bener yang edop di antaro wong-wong jahat. Allah ngenjok tau Nuh pasal banjer besak yang Dio rencanoke. Allah ngongkon Nuh ontok ngebangun kapal yang besak.

Allah ngongkon Nuh ontok ngebeken kapal. Okoran panjangnyo kiro-kiro 140 meter, lebarnyo 23 meter, tros tingginyo 13,5 meter. Kapal tu haros dibeken pakek kayu, tros dibeken jadi tigo tingkat. Ado atep, ado jendelo, tros ado banyak kamar. Kapal tu agek nyelametke Nuh, kluargonyo, samo setiap jenis binatang darat bakal aman slamo banjer.

Nuh norot samo Allah. Dio samo ketigo anaknyo ngebangun kapal pecak yang la Allah prentoke ke dio wong. Perlu waktu betaon-taon ontok ngebangun kapal tu karno besak nian. Nuh ngenjok tau wong-wong pasal banjer besak yang bakal dateng tros ngongkon dio wong balek ke Allah, tapi dio wong cuman ngetawoinyo bae.

Allah jugo mrentoke Nuh samo kluargonyo ontok ngompolke makanan yang cokop ontok dio wong samo binatang. Pas segalonyo la siap, Allah ngomong samo Nuh la waktunyo ontok dio, bininyo, samo ketigo anaknyo, jugo mantu-mantunyo naek ke kapal. Ado lapan wong di jero kapal tu.

Allah ngongkon sepasang dari sloro jenis binatang samo borong dateng ke Nuh supayo pacak naek ke kapal tu dengen aman selamo banjer. Allah jugo ngerem tojo pasang dari sloro jenis binatang yang kagek pacak dijadike kurban. Pas la masok galo ke jero kapal, Allah dewek yang notop pintu kapal tu.

Abes tu toronla ujan besak yang dak brenti-brenti. Ujannyo toron selamo empat polo ari empat polo malem dak brenti-brenti! Banyu jugo metu dari jero tana. Sloro yang ado di dunio tetotop banyu, sampe-sampe gonong yang paleng tinggi jugo.

Segalo yang edop di daratan jadi mati, kecuali wong-wong samo binatang yang ado di kapal. Kapal tu ngapong di pocok banyu, jadi segalo yang di jero kapal idak tenggelem.

Pas ujan la brenti, kapal tu ngapong di pocok banyu selamo limo bulan, tros beangsor-angsor dalem waktu ini banyu mulai sorot. Abes tu kapan ari kapal tu lagi brenti di puncak gonong, tapi dunio mase ditotopi dengen banyu. Pas la tigo bulan abes tu, puncak gonong mulai kejingokan.

Pas la lebe dari empat polo ari, Nuh ngelepaske sikok borong gagak ontok nyingok amen banyu la kereng apo belom. Gagak tu terbang bolak-balek nyari tana kereng, tapi dak pacak nemukenyo.

Tros Nuh ngerem borong merpati. Tapi dak pacak jugo nemuke tana yang kereng, laju balek lagi ke Nuh. Pas la seminggu Nuh ngeremke borong merpati tu lagi, tros borong tu balek lagi sambel gawak cabang batang jaitun di parunyo! Tandonyo banyu tu la sorot tros taneman la tombo lagi!

Nuh nungguke seminggu lagi tros ngeremke borong merpati tu ontok ketigo kalinyo. Kali ni, borong tu nemuke tempat ontok istirahat tros dak balek lagi. Banyunyo la nak ngereng.

Duo bulan berekotnyo Allah ngomong samo Nuh, uji-Nyo, “Kau samo kluargo kau jugo samo sloro binatang-binatang ni pacak ninggalke kapal sekarang. Branak-cocongla tros penuila bumi.” Laju Nuh samo kluargonyo metu dari kapal tu.

Pas Nuh la metu dari kapal, dio ngebangun sikok meja pesembahan abes tu ngurbanke beberapo ikok jenis binatang yang pacak digunoke ontok kurban. Allah seneng dengen kurbannyo Nuh tros ngeberkati dio samo kluargonyo.

Uji Allah, “Aku bejanji dak bakal ngotok bumi ni lagi karno manusio, apo ngancorke dunio makek banjer besak, mugola dio wong beduso dari masa mudo dio wong.”

Tros Allah ngebeken pelangi ontok petamo kalinyo, yang jadi tando janji-Nyo. Setiap kali ado pelangi moncol di langet, Allah bakal inget apo yang Dio janjike, cak itu jugola umat-Nyo.