12. Keluaran

Wong-wong Israel seneng nian karno nak ninggalke Mesir. Dio wong idak lagi jadi budak. Tros dio wong nak pegi ke Tana Pejanjian! Wong-wong Mesir ngenjokke apo bae yang dimintak samo wong Israel, pecak emas samo perak jugo barang-barang laennyo. Beberapo wong dari negaro laen yang pecayo samo Allah jugo pegi samo wong Israel ontok ninggalke Mesir.

Dari pagi sampe sore, Allah ngebembeng dio wong makek cagak awan yang tinggi, tros bejalan di depan dio wong. Tros pas malem ari, cagak awan tu beruba jadi cagak api. Allah besamo dio wong tros. Dio ngebembeng wong Israel selamo dio wong di pejalanan. Yang haros dio wong lakuke cuman meloki Dio bae.

Dak lamo abes tu, Piraun samo rakyatnyo beruba pekeran, supayo wong Israel jadi budaknyo lagi. Allah ngebeken Piraun nekak supayo wong-wong nyingok amen Diola sikok-sikoknyo Tuhan Yang Bener. Tros dio wong jadi tau amen Dio, Allah, lebe kuat dari Piraun jugo dewa-dewanyo.

Laju, Piraun samo tentaronyo ngejer wong Israel ontok ngejadike dio wong budaknyo lagi! Pas wong Israel nyingok tentaro Mesir dateng, dio wong sadar amen dio wong tejebak di antaro tentaronyo Piraun samo Laot Abang. Dio wong ketakotan nian tros mekek, “Ngapo kito mesti ninggalke Mesir? Kito bakal mati!”

Musa ngomong ke wong Israel, ujinyo, “Dak usa takot! Allah agek betempor ontok kamu tros nyelametke kamu.” Tros Allah ngomong ke Musa, uji-Nyo, “Kongkon dio wong supayo berenggot ke Laot Abang.”

Tros Allah mindake cagak awan tu ke antaro wong Israel samo wong Mesir, sampe-sampe wong Mesir dak pacak nyingok wong Israel.

Allah ngongkon Musa ontok ngangkat tangannyo di pocok laot tros misake banyu tu. Tros Allah ngebeken angin ontok ngedorong banyu supayo ngebentok jalor di laot

Wong-wong Israel ni bebares ngeliwati laot di tana yang kereng, dikepet banyu laot.

Abes tu Allah naekke cagak awan supayo tentaro Mesir pacak jingok wong-wong Israel ngelarike diri. Laju tentaro Mesir motoske ngejer wong-wong Israel.

Jadi dio wong meloki wong Israel masok ke jalor tu. Tapi Allah beken wong Mesir bingsal, jadinyo kreto dio wong tejebak. Dio wong mekek, “Lari! Allah lagi betempor ontok wong Israel!”

Pas wong Israel la aman di sebrang laot, Allah ngongkon Musa ontok ngangkat tangannyo lagi. Pas dio noroti omongan Allah, banyu tu nimpo tentaro Mesir. Abes tu, laot balek lagi cak semulo. Sloro tentaro Mesir tu tenggelem.

Pas wong Israel nyingok amen wong Mesir ni la mati, dio wong pecayo samo Allah tros pecayo amen Musa ni iola nabi otosan Allah.

Wong-wong Israel seneng soalnyo Allah la nyelametke dio wong dari kematian samo pebudakan! Mak ini ari dio wong bebas ontok ngelayani Allah. Wong Israel ni nyanyike lagu ontok ngerayoke kebebasan dio wong, jugo ontok muji Allah soalnyo Allah la nyelametke dio wong dari tentaro Mesir.

Allah mrentoke wong-wong Israel ontok ngerayoke Paska tiap taon. Perayoan ni ontok ngingetke dio wong cak mano Allah ngalake wong Mesir jugo ngebebaske dio wong dari pebudakan. Dio wong ngerayokenyo dengen caro nyembele anak domba yang sempurno, tros dimakan makek roti yang dak beragi.