11. Paska Wong Israel

Allah pringetke Piraun, amen dio dak ngebiarke wong Israel pegi, Allah bakal ngebunu sloro anak lanang petamo dari manusio jugo binatang yang ado di tana Mesir. Pas Piraun tau soal tu dio tetep nolak ontok pecayo jugo norot samo Allah.

Allah ngenjok caro supayo pacak nyelametke anak petamo siapo bae yang pecayo samo Dio. Setiap kluargo haros mele sikok domba yang sempurno tros nyemblenyo.

Abes tu Allah mrentoke wong Israel supayo ngoleske separo dara anak domba yang disembele tadi di sekitar pintu ruma dio wong. Tros dagengnyo dibakar, abes tu dimakan dengen gancang samo roti yang dak beragi. Allah jugo ngomong ke dio wong supayo la siap ontok ninggalke Mesir pas dio wong makan.

Wong-wong Israel ngelakuke sloro yang la diprentoke Allah ke dio wong. Pas tenga dalu, Allah pegi ke sloro Mesir tros ngebunu sloro anak lanang petamo.

Sloro wong Israel ngoleske dara di sekitar pintu rumanyo, jadi Allah ngelendongi ruma dio wong. Tros sloro wong yang ado di jero ruma tu aman. Dio wong slamet karno dara anak domba tu.

Tapi wong Mesir dak pecayo tros dak noroti prento-Nyo Allah. Jadi Allah dak ngelendongi ruma dio wong. Allah ngebunu setiap anak lanang yang petamo dari wong Mesir.

Setiap anak lanang petamo wong Mesir mati, mulai dari anak lanang petamo yang ado di penjaro, sampe anak lanang petamonyo Piraun jugo mati. Banyak wong Mesir yang nangis jugo ngeratapi karno dio wong sede nian.

Malem tu jugo, Piraun manggel Musa samo Harun tros ngomong cak ini, “Gawakla wong Israel ni tros gancangla tinggalke Mesir!” Wong Mesir jugo makso wong Israel supayo gancang pegi ninggalke Mesir.