13. Pejanjian Allah samo Israel

Abes Allah mempen bangso Israel ngeliwati Laot Abang, Allah ngajak dio wong ngeliwati padang goron ke Gonong Sinai. Ini gonong yang samo di mano Musa nyingok semak yang bekobar-kobar. Laju wong-wong tu negakke tenda di kaki gonong tu.

Uji Allah ke Musa samo wong-wong Israel, “Amen kamu norot samo omongan Aku jugo bepegang tegu samo pejanjian Aku, kamu bakal jadi melek Aku yang berego. Kamu bakal jadi sikok kerajaan yang pendodoknyo imam galo jugo bangso yang suci.”

Tigo ari abes tu, pas wong-wong Israel la nyiapke diri, Allah toron ke puncak Gonong Sinai dengen guntur, peter, asep, samo suaro terompet yang besak. Cuman Musa yang diboleke ontok naek ke gonong tu.

Di situ Allah ngebeken pejanjian ke dio wong tros ngomong cak ini, “Aku ni iola Allah, jugo Tuhan kamu, yang la nyelametke kamu dari pebudakan di Mesir. Dak bole nyemba tuhan laen.”

“Dak bole ngebeken berhalo tros jangan nyembanyo, soalnyo Aku, Allah, iola Tuhan yang cemburuan. Dak bole nyebot namo Aku baseng-baseng bae. Ingetla ontok ngejago kesucian ari Sabat. Artinyo tu, kamu gaweke gawean kamu slamo enem ari, soalnyo ari yang ketojo iola arinyo istirahat ontok nginget Allah.”

“Hormatila ubak samo umak kau. Dak bole ngebunu. Dak bole bebuat mesum. Dak bole maleng. Dak bole ngebudike. Dak bole nakser dengen bini sesamo kau, rumanyo, jugo apo bae yang dio punyo.”

Abes tu Allah noles Sepolo Prento Allah ni di duo ikok batu ceper tros dienjokkenyo ke Musa. Allah jugo ngenjokke banyak hokom samo peratoran laen ontok ditoroti. Amen wong-wong tu noroti hokom-hokom tu, Allah bejanji amen Dio bakal ngeberkati jugo ngelendongi dio wong. Tapi amen dio wong dak norot, Allah bakal ngokom dio wong.

Allah jugo ngenjok penjelasan pasal tenda yang haros dio wong beken. Tenda tu disebot Tenda Petemuan. Di jero tenda tu ado sikok hordeng besak yang misake ruang depan dari ruang belakang. Dak katek yang bole masok ke ruang belakang tu, kecuali imam besak. Soalnyo Allah tinggal di situ.

Siapo bae yang ngelanggar hokom Allah, dio wong mesti gawak sikok binatang ke meja pesembahan yang ado di depan Tenda Petemuan ontok jadi pesembahan ke Allah. Binatang tu bakal disemble tros dibakar di pocok meja pesembahan. Dara binatang yang dikurbanke tu notopi duso wong tu tros ngebeken wong tu berse di adepan Allah. Allah ni mele Harun dolornyo Musa, samo ketoronannyo Harun ontok jadi imam-Nyo.

Sloro wong Israel stuju ontok noroti hokom yang la Allah enjokke ke dio wong, cuman nyemba Allah bae, jugo jadi umat-Nyo. Tapi dak lamo abes dio wong bejanji, dio wong beken duso yang jahat nian.

Slamo poloan ari, Musa ni ado di puncak Gonong Sinai lagi ngomong samo Allah. Wong-wong ni la malek nunggui dio balek. Jadi dio wong gawak emas ke Harun tros mintak dio beken berhalo ontok dio wong.

Jadi Harun ngebeken berhalo dari emas dengen bentok anak sapi. Wong-wong tu mulai nyemba berhalo tu dengen gilo-giloan, tros ngenjok kurban ke berhalo tu! Laju Allah mara nian karno duso dio wong tros berencano ontok ngancorke dio wong. Tapi Musa bedoa ontok dio wong, tros Allah ngedengerke doanyo laju Allah orong ngancorke dio wong.

Pas Musa toron dari gonong tros nyingok berhalo tu, Musa mara nian. Sampe-sampe dio mecake batu ceper yang la tetoles Sepolo Prento Allah.

Laju Musa ngancori berhalo tu sampe jadi bubuk. Tros dio nguntalke bubuk tu ke banyu tros makso dio wong minum banyu tu. Allah ngedatengke bencano ke wong-wong tu laju banyak wong yang mati.

Musa ngebeken batu ceper yang baru ontok gantike yang lamo yang la diancorkenyo. Abes tu, Musa naek gonong lagi tros bedoa ke Allah supayo Allah ngamponi wong-wong tu. Allah ngedengerke doa Musa tros ngamponi dio wong. Tros Musa toron lagi dari gonong tu gawak Sepolo Prento yang la di toles di batu ceper yang baru tu. Akernyo Allah mempen wong Israel dari gonong Sinai ke Tana Pejanjian.