35. ቶራ ሱረይሰተምፐይተ ተከ አኣፐ

ኩያተ ተከዬ፥ ዬሱስ ኦረ ቀረተ ቀረትኖ ሌከይተ እሾ ጩፖለየ አፕለ አእሸ ደከይሰተ ኦሎፐ ዴኤ ኮልን፡፡

ኦረ ስትይ ኤዬ ቾ ኦፐዬ፥ ሳራ አመንቴወ ኦፐ ተከ ተከከ አዬሱስ ጩፖለየ ሞቱምሰኖ ከ እሾተ ቴየኖ አኬ፤ ከ እሸ ቀረ ቆጭቆጨ ፓዬ፡፡ ሴመለ ዬሱስከ ቶሮሴን አሬ ቸ እሾተ ሌሌ፡፡

ከ ክዴ፥ ‹‹ኣፐ ተከ ሄለ ለክ ቀፖ ቸ፡፡ ኩስተከ ኣፐይሾት ክዴ፥ ‹ኣፖ፥ ካጨት ቁደ ቆትዮ አአነ ከይኖ አመ አነ ዳሼ!› ሴመለ ኣፐይሾከ ካጨሴኔ ኻድ ሄላድ ለክ ኦፐ ቆቴ፡፡››

‹‹ኩስትከ ኤኖው ዋ ቀፐ ፕሰ ኦሎፐ ኦርሰዴ ከ ፒተ ሴከ ኦፐ ኣኔ ከ ጩፖተን ከላተኔ ካጨሴኔትን ከሀዴ ከ ፕሬ፡፡

‹‹ሴከመዬ ፒተሴ አኩስተ እሽ ከሎፐ ሎተ ከ ዴቴ፤ ኡመ ካጨ አእሽን ላተ ፕደደ እንቀፖ፡፡ ሴመለ ዋ ኮደኤ ደፔ ከ ስክመይተ አቱዮወ ኮዴ፡፡ ከ ሀርሞ ኞርፔ ከ ቆተ ዶኽኖ መለ፥ ዋ ቱዮዋሴኔ ደማኔ ደምተ ኸጬል፡፡››

‹‹ፕራምፕረ ቀረዬ፥ ኩስተሴከ እስ ክዴ፥ ‹አተ ማነን ኮን? ኦርኸየ አኣፕኖ ፕሰ ደምተ አደመኔ ኩተይቴተ ቀፐን፤ አንት ኾር ዶኸኔን ቶን፡፡ ኣፕኖ ከፖፐን ቲተወ ከ አከ ኦርኸያድፐ ነመ ተከ ከፐ አነ ድኮ እሸ ቅንሰደ፡፡››

ሴመለ ኩስተሴከ ትከ ኣፐይሾት ኦፐ ቲተወ ኸኤ፡፡ ኣፐይሾከ ለከ ዴሰ እሸ አኬ ከ እሸ ሱረይሰዴ፡፡ ከ ቱሮፐ ኬሬ ከ ሀዱኔ ከ እሸ ድንኬ፡፡

እንሴኔከ ክዴኔ፥ ‹‹ኣፖ፥ ዋቀ እሾ ኬ ቱረኤን እሽን ደፔ፡፡ እናት ክደመ ኔፎ አነ ፐርፓችስንንክቶ፡፡››

‹‹መ ኾር ኣፐይሾ ኦርኸያድፐዬ ተከ ሌሌ ከ ክዴ፥ ‹ጨርጨርተን ኣኔ ከ ሜሃደ ፐቃረ ቄዴ ከ እናዮ ቁደ ከልሼ! ከ ጭፌተ ቁፕታድ ቁደ ከልሼ፥ ከ ኾፐ ሎቀ ኬለ እሽ ከልሼ፡፡ ሴከመዬ፥ አከን ደሞ ከ ኸሶኖኤ ሜርተ ቄደ ከ ቀለ፤ ማነ መለ፥ እኖሴን ኸዮ እቶኤን ከ አመ ቻዴኔይ! እፐቴን፤ አመ ኾር እአካዴኔይ!› ››

‹‹ሴመለ ነመ ፕሰከ ኸሶተ ፓዬ፡፡ አአኩታትእን ጨርን መልይ፥ ቃርተከ ዱለሴ አኦፐ ሶከዴዬ ዴሰ ትኮፐ ከሌ፡፡ ከ ኔሰ አኬሀይተ እሾ አኦረ ክርፕኖ ደከዬ፤ ከ ኦፐ ቀዋዌ ከ ክዴ፥ ‹ካተ ማነ ኮድተ?› ››

‹‹ቃርተ ኤቴ አከ እናሶ ከሌ እከ መለ አሴ ኸሶነን ደከዬዬ፥ አከተ ሚሮዴ ከ ትከ ከሮፐ ኔፎ ኩለ ቲቴ፡፡ ኣፐይሾከ ኻሮፖፐ ሶኬ ከ አከ ኩሎ ከ እሾተ ኦል ኸሶዶ ናፐዴ፤ እሸ ኾር እቲቴ፡፡››

ቃርተከ ኣፐይሾት ክዴ፥ ‹‹ፐሮሴን ፕሰን አመነመን ኬ ኬለ ኮደ ኮዴ! ኡመ አፐር አጨጫይት ቀረኔ አንተርፕኔ፤ ኡመ ሀከ አመትእ አከን ኼልያዮ ኦል ኸሶዶኤ፥ እነየ ቆልፐይተ ተከን ኔፎ አነኤ አዳኔ፡፡ መ ኾር እናሴኔ ኻይት ጩፖተ ኮደን ካጨሴኔ ኻይት ፕሬ ኤቴ ትኮፐ ከሌኔዬ፥ ሜርተ እሽ ቀልቴ!››

‹‹ኣፐከ እሽ ኦርሼ ከ ክዴ፥ ‹እናዮ፥ አት አውተ ፕሰ አሬ አነ ኦል ክተ፤ ዋን ቀፐ ፕሰከን ኸይትው፡፡ ሀ ኸሶትኖ ፈያፐ ቸ፤ ማነ መለ፥ እኖሴን ኻይሽን እቶኤን ከ አመ ቻዴን፤ እፐቴን፤ አመ ኾር እአካዴን!››