36. ፕሰ ዬሱስ አከ ፑርሰሜ

ኩያተ ተከዬ ዬሱስ ተማሬዋድ ሴሰ ፔትሮስ ከ የእቆፕ እሾ ዮሀንስ እስቁደ ቄዴ ከ እሮተ ተከ ቀሮፐ ቅንሴተ ፈየዴ፡፡ (ተማርቶሴ ዮሀንስ ክደሜ እሳሴ ዬሱስ ፕሸን ጨቄን፡፡)

አዬሱስ ቅንሴተ ቀረ ቾዬ፥ ፕሰ ፉላድከ አከ ፒርቶተ ምነ ኦፐዬ፤ ሜሀዳድከ አከ አቶተ ምነ አታዴን፤ አነመ ፒተ ቀረ ቾ አይኖ ኔፎ ኮድቴ፥ አተሰን ኤተንንን ቀሮፔለ አከተ ወርወር፡፡

ስትይ ሙሴ እሾ ኹመምፐይተሴ ኤልያስከ አካዴን፡፡ ኦሮሴ ኤዬ ቾ፥ ኦረ ፐራደ ድፐደ ቱሮፐ ፒተ ቀረ ከላዴ፡፡ ክሴተ ዴሀ ኦፐኤ፥ ዩርሳሌም ከረኤ ቆተ ቶታድት ዴሰ ወ ኮደኤ ዬሱስ ኦል ሃሰወን፡፡

አሙሴ እሾ ኤልያስ ኦል ቶራተ ቀረ ቻኔዬ ፔትሮስ እዬሱስ ክዴ፥ ‹‹አሬ ተዌተ እእኖ ፐኻርይ፥ ሻከ ሴሰ ቁፐነ፤ ተከን ኻይት፥ ተከን አሙሴ፤ ከ አሴው ተከን አኤልያስ ኮደን።›› ፔትሮስ ስትይ ዋ ሃሰወነ እንኡፖ፡፡

አፔሮስ ሃሰወተፐ ቾዬ፥ ኡረተ አአተ ዴኤ ከ እሾተ ቀረ ልጵሼ። ኡረተ ከረዴሰ ኔሰ ከ ክዴ፥ ‹‹እን እናዮ አን እሽን ኻሶነ አንጫለነኤይ፥ እሽ ደከየ።›› ተማሬዋሴኔ ሴሰከ ፉሬን ከ ፒቶፐ ሴሄን፡፡

ስትይ ዬሱስከ እሾተ ቁደ ቀፐዴ ከ ክዴ፥ ‹‹እንፉረን፥ ኸአ!›› ኤቴ እስከፐንዴሰ ቶይናኔዬ፥ ዬሱስ መልይ ነመ ተከ ኔፎ እንቾ፡፡

ዬሱስ እሾ ተማሬዋሴኔከ እሮተ ቀረ ሌከዴን፡፡ ስትይ ዬሱስከ እሾተ ክዴ፥ ‹‹ወ አሬ ቀረ ኮዴ፥ አመዴሰ ነመ ተከ ኔፎኤን ሌለን፡፡ አንት እረ ቀረን ቶአ፥ ከ ቶቶፐ ኸአ፡፡ አውሴ ከመዬ፥ ኦረ ሌሌተ እኤተንሰን፡፡››