34. ዬሱስ ቶራደ አፕላኤ ኮልሼ

ዬሱስ ቆተ መንክስቴተ አሞንታት ዴሰ ቶራደ አፕለ ሌከየ ኮልሼ፡፡ ፐሀነኤ አሴ ክዴ፥ ‹‹መንክስቴተ አዋቀ፥ ነመ ዱላድፐ ኡቅንቴተ ሌየ አይላዴ ፐሀተ፡፡ እሼተ ኾተ አይላመ ፕሰ ኬለኸተ ሸክ፡፡››

‹‹መ ኾር ኾቶሴን አሌየ ኦቶ ዴሀን ከመዬ፥ እኩተን ከ ቆረ ከፐንዴሰ ቸ ፕሰ ቀረ ጫል፥ ኸምፕረ ኔፎከ ቀረ ሳተ ሳተን፡፡

ዬሱስከ ቶራ አፕለ ሌሌው ከ ክዴ፥ ‹‹መንክስቴተ ዋቀ ሀደየ አእስከቴተ ተከ ቄቴ ከ አክመ ፑሎተ ፐለይሸኔኤ ዳመ ኦልን ፖርጭቴኤ ፐሀተ፡፡

‹‹ከ አሴው መንክስቴተ ዋቀ፥ ነመ አቴየንተ ዱሎፐ ጩቴ ፐሀተ፡፡ ነመ አፕለከ ቴየንቶሴ ቀረ ከዬ ከ ኤኖው ቀሮፐ ፒት ኦርሼ፡፡ ቆተ አከተ ኸሶዴ መለ፥ እኣኔ ከ ዋ ቀፐ ፕሰ ከትከቴ ከ ካጨሴኔትን ዱለሴ ፕደዴ፡፡››

‹‹ከ አሴው መንክስቴተ ዋቀ፥ ፉሮተ ሄረን አከተ ኮኮከኤ ፐሀተ፡፡ ነካትተ ፉሮተከ ኤቴ አኬዬ፥ ዋ ቀፐ ፕሰ ከትከቴ ከ ፉሮተሴትን ፕዴ፡፡››

ሴከመዬ ዬሱስከ ቶራ ኦረ ተከ ተከ አኮዳይሾ አፐኻረትን አንሀንቄለየ ኪኖ ከ ኦረ ፕለ ፑየኖት ዴሰ ሃሰወዴ፡፡ ከ ክዴ፥ ‹‹ነመ ለክ ትከ ቁልቁሎተ ኬሎፐ ቅንሴተ ኣኔ፡፡ ተከ ነመ ቀረተ ቀረትኖ፤ ተከኤው ሳረ አአመንቴተ።››

‹‹ሳረሴ አአመንቴተ እቅንሰዴ ከ ክዴ፥ ‹ዋቆ፥ አንት ቆተን አኦረ ፕለ ምነ ዮዮመይተ ከ ኝረመይተ እሾ አልመልተ አንኮድንን መለ፥ ከ ነሞሴ ቀረተ ቀረትኖ አንፐሀንን መለ፥ እንኬ ከለተይሰን፡፡››

‹‹ፐሀነኤ፥ አንት ቶርፓፐ ኩየተ ለክን ደምተ ሙሰን፤ ከ ካጨ እሾ ዋን ቀፐ ፕሰ ቀረዬ ኩመ ኩንደተ ኬ ከልን፡፡› ››

‹‹ነመሴ ቀረተ ቀረትኖ ኾር፥ ሳረሴ አአመንቴተ ከፐዬ ለከዴሰ ቀአዴ፤ ኡመ ሞንቶፔለ ኔፎን ቶየኔ፡፡ ሴዴ ከፐዬ፥ ኬሶፐ ቶቶመዴ ከ ክዴ፥ ‹ዋቆ፥ ቆተን ጩፖለይተ ኮዴ መለ፥ አተረ አነ ሱረይሰዶ፡፡›››

ሴከመዬ ዬሱስከ አሴ ክዴ፥ ‹‹ዱካተን እሽነ ኪን፥ ዋቀ ቅንሴተ ነሞሴ ቀረተ ቀረትኖትእ ደከዬ ከ አሀንቄልተ እሽ ክዴ፡፡ ኾር ቅንሴተ ሳረ አአመንቴተ እንጫለኔ፡፡ ዋቀ፥ ነመ ሞንቶፔለ እስ ኩትኖ ፕሰ ኸተ ሸክሸ፤ ነመ መታድ ሸክኖ ኾር ሞንቶፔለ ኩትሸ፡፡››