31. Yesuus Bisaan Gubbaa Ideeme.

Achiin duuba Yesuus adoo kolbaa geegessiisatti jiruu, akka isaan hoboloo keessa seenanee bisaan laaqaa gamatti bu’anu barattoota ifiititti hime. Yesuus kolbaa geegesseen duuba, daadimatiisaaf gara gaaraa ol baye. Yesuus qofuu achi turee, haga halkan wodhakka’aa daadimate.

Yennuma tana, barattooti isaa bisaan laaqiisaan hoboloo ifii oofiisatti jiraniiyyu; isaan haga halkan wodhakka’aa, abbayaa wodhakkaa qofa geyane. Qilleensi hunnaan gara isaanii waan dhowuuf, isaan rakkinnaan bisaan laaqane.

Yennaa san Yesuus daadimatiisa fixatee gara barattoota ifii dhaqe. Bisaan gubbaa ideema abbaayaa keessa gara hoboloo isaanii dhaqe.

Barattooti isaa yennaa Yesuus dhaggane guddoo rifatane; sababille isaan waan ekeraa dhaggane sayane. Yesuus akka isaan sodaatane beeke. Tanaaf, inni waamee, <<Hin sodaatina’a. Wonni ana>> isaaniin jedhe.

Yennaa san Pheexroos, <<Barsiisaa kiyya; yoo si teetee, akka ani bisaan gubbaa gara keeti dhufu ajaji>> Yesuusiin jedhe. Yesuus, <<Koyi!>> Pheexroosiin jedhe.

Tanaaf, Pheexroos hoboloo keessaa bayee bisaan gubbaa gara Yesuusii ideemiisa jalqabe. Te’uu malee haga diqqaa ideemeen duuba ila ifii Yesuusirraa deebifatee, danbalii ilaaliisa, qilleensa jabaalle caqasiisa jalqabe.

Yennaa san Pheexroos sodaatee lixiisa jalqabee, <<Barsiisaa kiyya, na baasi!>> jedhee iyye. Yesuus yennuma san harka ifii diriirsee isa qabe. Achiin duuba Pheexroosiin, <<Ati nama dhugeeffannaa diqqo’oo! Maaf mante?>> jedhe.

Pheexroosii fi Yesuus gara hobolo’oo yennaa seenane, qilleensi sun yennuma san dhowiisa lakkisee gabbi jedhe. Barattooti isaa baaseffatanee, <<Ati dhugumaan ilma Waaqaa ti>> jedhanee, Yesuusiif sagadane.