6. ዬሪ ይስሀቄሽን ማሽት ዬሻሹ

አብርሃሚ ቃጽ ኤርጉⶣም ይስሀቂⶤትኒ ማሽት እያርስንሱⶦጥን አቱ። ኡⶣም አብርሃሚ ባ ቃይጻንስድቃን ማጥናሲ ባ አሥንድ ዶድን ሀንቂ ባ ናንሣ ይስሀቄሽን ይሲ ማሽት ጋሂ ኤቲ ውንሱዌሽንዎሲ ቲሡ።

ናሳ ኡⶢ ጳዳጋ ቦድ ሀንቂ ይ ኢንግንዲ ይስን ቶክንሲ ይስኩⶥ ዶድን አቱ። ዬሮሥንዲ ዎስኪ ሀንቁⶥ አብርሃማጋ ቃይጻሲስ ሪብቃ ዳድን ቤሲ ቲሡዌ። ሪብቃ አብርሃማጋ ኢቻጋ ናማ ጊዛዎ።

ሪብቃ ባ ኬት አሥንዲስ ሺችንሳ አብርሃም ቃይጻሳ ባና ይስሀቅ ዳድን ሀምማ ⶡኔን። ውሲንድ ሀንቃ ይ ዳድን አቱⶣም ሂሳቂ ው እያርሱዌ።

ጳዳጋ አብ ጌሽን አብርሃሚ ሀይቁ፤ ዬሪ አብርሃማ ባና ዎግና ታሥ ባ ኡሤንድ ጋህንዲስ ካንግ ይስሀቄሽን ይሡዌ። ዬሮሥንዲ አብርሃሜሽን ፕያሢ ውርንሳርጉⶥ ዛሪስ ኡሥኒ ሀይጥንሲ ይስቱዌ። ይ ፔታስን ካሲ ይስሀቅ ማሽታ ሪብቃ ንያእስ ዬልንባኑ ሀካራጋ ዝያጳ ሺዴኔ።

ይስሀቂ ባ ማሽታ ሪብቃዬሽን ዬር ዳድን ጾኩ፤ ዬርንድ ምያንት ንያእስ ውሳ ቃንቅንሱዌሽን ውስን ኡሡዌ። ንያእንዳ ኤንዲ ጋሥ ባ ባያ ሪብቃ ⶢልቃን ቃን ይስቲ ባ ባርቅን ዴንሥኒ ቅያፕሚ ባ ባርቅን ጡርትኒ ው ኢራትሲ ይስቴንዴ። ሪብቃ ው ⶢልቃን ይስኩⶥ ው ቃኒ ዎሳሳን ባ ቃይጺ ይስታን ዬሪስ ኦጬን።

ዬሪ ሪብቃዬሽን፣ «ኒ ⶢልቃን ይስኬንድ ንያእንዲ ናማጋ አሥንዳ አክ አትንሴንዴ። ኢሣይቅኒ ኒ ⶢልቃን ይስቲ ዴንሥኒ ቃያፕሚ ይስኩⶢ ኤዛ ኡዚ ጉሣሴሽን ጎስትንሱዌሽና ጊዝዎ» ማኪ ውስን ሀይጡ።

ሪብቃ ንያእንዲ ባና ዬይስኩⶣም ው ናንሣ ኡዚ አራ ታሀጊ ይ ጉዚ ኩስት ካይ ይስቲ ዬይስኩ። ይሱሚንድ «ኤሳው» ማኪ ሱምሤንዴ። ጉሣሲ ባ ኤዝን ቶእ ድርንድችካን ኡጥንሲ ዬይስኩ። ይ ሱሚስ «ያይቆብ» ማኪ ሱምሤንዴ።