5. ታሥ ይሣንቂ ባርስቲ ይስኩⶥ ንያእ

ታሕም ቤርግ ጌሽን አብራማ፥ ሶራ ሀንቂ ካናአን አቴንድ። አባ ኡⶥ ሀክ ኢሣይቅኔሽን ናያኢ ካይጉዌ። ኡⶤሽን አብራም ማሽታ ሶራ «ዬሪ ንያእ ታ ዬልንሳርጉዌሽን ታም ንያእ ናጋም ሀⶥ ታና ኤርጋንቁዌ፤ ኤስን ታ ቃይጽና አጋራ ሀⶥ ይስኬናዳ ው እያርሴን ንያእስ ታም ዬልማካ» ማካ ሀይጤን።

ኡⶣም አብራሚ አጋሪስ እያርሱ። አጋር ውሲንድ አብራሜሽን እያን ናይእ ዬሌኔ። አብራሚ ባ ናንሣ ኡⶢስ «ኢስማኤል» ማኪ ሱምሡ። ይ ፔታስን ሶራ አጋሪስ ኢታም አይና ⶻንቄኔ። ኢስማኤሊ 13 ቤርግ ንያእ አታጉⶥ ዬሪ አብራሜሽን ካሲ ጋህ ሀይጡ።

ዬሮሥንዲ አብራሚስ «ታና ኤልሻዳያ ጊዛዎ። (ታና ካንጉⶥ ሀካ ይስኩⶥ ካሐ ጊዛዎ።) ኒያ ታና ዎግ ይሥንታኑዌ፤» ማኩ። ኡⶣም አብራሚ ዶድን ፕሽካር ይቲ ጉራትኑ። ካሲ ዬሮሥንዲ አብራሜሽን «ኔና ⶦዳጋ አሥንድ ባብ ኔ ፔትንሱዌ። ካናአን ዶዲስ ኒዬሽና ኒ ዛርንዴሽን ግያስ አሣ ኡሥንታኑዌ፤ ታኒንድ ካንግዎይናም ሀክ ይንታይቅን ካሕ ታ ፔትንሱዌ። ኤስን ሀⶥ ኔና ኒ ኬትን ይስኬንድ እያኒስ ካንግ ሲትን ኬሶ» ማኪ ይስን ሀይጡ።

ካሲ ዬሮሥንዲ አብራሜሽን «ኒ ማሽታ ሶራ እያን ናይእ ዬልንሴኔ። ይሲንድ ታሥ ታና ኡሡⶥ ንያአ ጊዝዎ፤ ይ ሱሚስ ይስሀቅ ማካ ኔ ሱምሥንሱዌ። ታ ዎግስ ይያ ታና ይሥንታኑዌ። ይሲ ኤዛጋ አሥንድ ፔትንሱዌ። ኢስማኤሊንድ ኤዛጋ አሥንድ አሥንታኑዌ። ይ ፔታስን ዎጊስ ሂስሀቃ ታና ታ ይሥንሱዌ።» ማኪ ሀይጡ። ኡⶥ ጌሽን ዬሮሥንዲ አብራም ሱሚስ ሻዲ «አብርሃም» ማኪ ይ ዎዙ። ይ ፖርሽንድ «ⶦዳስንድ ባባ ጊዝዎ» ማክያን ይስኩዌ። ካሲ ዬሮሥንዲ ሶራ ሱሚስ ሻዲ «ሳራ»ማኪ ዎዙ። ይ ፖርሽንድ «ⶦዳስንድ ባያ ጊዛዎ» ማክያን ይስኩዌ።

አባ ኡⶣም ጎቅን አብርሃሚ ባ ኬትን ይስኩⶥ እያኒ ካንግ ሲትን ጌሱ። ማጥ ቤርግ ጌሽን አርሃም ቤርጊ 100 አታ ሳራ ቤርጊ 99 አታጉⶥን አርሃሜሽን እያን ንያእ ዬሌኔ። ዬሪ ኢሣይቅኔሽን ሀይጡⶢዎጥን ይሱሚስ ሂሳቅ ማኪ ሱምሤንዴ።

ይስሀቂ ኢቂ ሀይቅን ዣንጋር አታጉⶥን ዬሪ አብርሃም ጊባትስ ውⶢ (ዎንሳሲ) ቤቅኒ ይ ኦጩ፤ ዬሪ «ዎ አብርሃሞ! ኒ ናንሣ ማጣፓ ሀⶢስ ታም ኡዳ አሣ ሺርሾ» ማኩ። ኡⶣም አብርሃሚ ዬሪ ሀይጡⶢስ ይሥኒ ባ ናንሢስ ኡድ አሣ ባ ሺርሽንሱዌሽን ዬሻሱዌ።

አብርሃሚ ባናሣ ይስሀቂስ ይስን ባና ኡድንሱⶥን እንቻ ቂጻ ኤቲ ሀንቂ ይስታጉⶥን ይስሀቂ ባ ባቢስ «ዎ ባቦ! ኡዲ ይስን ኡዳስኑⶥ እንቻ ታማ ሀⶥ ይስኮዳ ኡዳስንሱⶥ ዶሪ ሀናጌዎ?» ማኪ ኦጩ። አብርሃሚ ባ ናንሤሽን «ዎ ታ ናንሦ! ኡዳስንሱⶥ ዶሪስ ዬሮሥንዲ ዬሻስንሱዌ!» ማኪ ይስን ሀይጡ።

ኡዲ ይስን ኡዳስንሱⶥ ኩሥን ኢሣይቅኒ አታጉⶥን አብርሃሚ ባ ናንሣ ይስሀቂስ ጽያጺ ኡዳጋ ኩሥን ሱሣሱ። ይሲንድ ባ ናንሢስ ⶡፕምሚ ዱሊስ ዶንሡ፤ ኡⶣም ዬሮሥንዲ «ዎአብርሃሞ! ኒ ናንሢስ ሺቾ፤ ሀይቃ ይ ዴብም ኤር ይሣሺዶ! ኔና ኢባሪ ታ ሼርቃ ይስኩⶣ፥ ኒ ናንሣ ማጣፒስ ሳሳታ ታም ኔና ናባርጉⶣይስ ሀⶥ ኤርታኑዌ» ማኩ።

አብርሃሚ ባ ዳድን ሺክ ዶራ ማጢ ጉርብም ጎብቃን ቱስታንቂ ይስት ቤቁዌ። ዬሮሥንዲ ይስሀቃጋ ቆድን ኡዳስንሱⶥ ዶሪስ ዬሻስንሲ ይስቱ። አብርሃሚ ካዥቂ ይስቲ ዶራ ኡⶢስ ኡድ አሢ ዬርን ሺርሹዌ።

ኡⶣጋ ጌሽን ዬሮሥንዲ አብራሜሽን፣ «ኒ ናንሣ ማጣፓጎን ናባርጉ ኒም ይስኩⶢስ ይ ካንግ ታም ኔ ኡሥንሱዌሽን ⶡና ኔ ይስኩዌ፤ ታኒንድ ኒ ዲርንታኑዌሽን ኒም ዎግቃን እያርንታኑዌ። ኒ ዛርንዲ ሀይቅን ጫርኑⶥ ሻይትንድ ቤሽ ጌብምሴንዴ። ኔና ታም ጎስታ ታ ትዛዚስ ይሡዌሽን ዶድ ቶሕን ይስኬንድ አሥንዲ ባ ካንግ ንያም ዲርስንሴንዴ!» ማኩ።