4. ዬሪ አብራማ ባና ዎግ ይሡ

ቆጢ ባይሳጉ ሶኢ ኖሀጋ አባም አቲ ዶዳ፥ አሣይስ ባይሱ ⶦዳጋ ቤርግ ጌሽን አሢ ዶድ ቶሕን ዬስኪ ጌቡዌ። ኡⶣጋ አባም አሣ ዶድ ቶሕኑⶢ ማጥፕ ኖን ጋህ ካያማን ጋሂ ይስቴንዴ። ዬሪ ኢሣይቅኔሽን ቲዛዝ ኡሢ ሀይጡⶥ ጋሀም ዶዱዋም ባና ጮንሱ ሺችንሲ ማጥ ካሥ አቲ ዱብድናንቂ ካታሚስ ቃይጼንዴ።

ኢሣይቅኒ ቃጽ ጌጻስንዳ ዬሪ ሀይጡⶥ ሀይጢስ ጢሻም ይሣርጌንዳ ይስቴንዴ። ኢሣይቅኒንድ ሀይቅን ጫርን አትንሱⶥ ጳዳጋ ፖቅ ኬትስ ጊጺ ጋዴንዴ። ኡⶣም ዬሮሥንዲ አሥንዳ ኤንዲ ኢታጋ ቃይጺስ ቃይጺ ሀንቂ ይስኩⶢስ ቤቁ። ኢሣይቅኒንድ ኡⶥ ቤሽ ይስኩ ጩቡ ቃይጽኒ ሀክንሴንድ ፔቱⶢስ ኤሩዌ።

ኡⶣጋ ናባም ዬሮሥንዲ ኢሣይቅን ኖን ጋሂስ ⶦድ ኖን ጋሀ ባቄራም ቄራሙⶥካን ሻዲ አሥንዳ ኤንዲ ዶድ ቶሕን ካሽካሲ ቲሡዌ። ኢሣይቅኒ ጊጺ ጋዱ ካታም ሱሚ ባብሎን ማስቲ ይስኩዌ። ይ ሱም ፖርሽን ባ ሳቁⶥ ሺዳን ጉድኒ አዳርኑⶥ ማክያን ይስኩዌ።

ኡⶢ ኤስ ፔቱⶥⶦድ ባል ቤርግንድ ጌሽንዬሮሥንዲአብራም ማስቲ ይስኩⶥ አሢስ ጼጊ ይያ ባና ጋርትኑ። ዬሪ አብርሃሚስ «ኒ ዶዳ ኒ ኬት አሥንዳይስ ሺችንሳ ታና ኒም ቤሳ ይስኩⶥ ዶድን ሀሞ። ዶዳ ኡⶥን ኒ ዲርንታኑዌ፤ ኤዛጋ አሥንድ (ኤዛጋ አሣ አክ) ኒ አሥንታኑዌ፤ ኒ ሱሚንድ ኤዝ አሣ ዎብሳ ጼስንታኑዌ፤ ኒ ዲሬንድስ ዲርንታኑዌ፤ ኒ ዱርትኔንዲስ ዱርትንታኑዌ፤ ኒ ቦዳም ዶድ ቶሕኑⶥ አሢ ባ ካንግ ዲርስንሱዌ።

አብራሚንድ ዬሪ ይስን ሀይጢ ኡሡⶥ ትዛዛም ባ ማሽታ ሶራ፥ ባ ቃይጻስንዳ፥ ባ ጊዝንዳ ካንግ ኤቲ ዬሪ ይስን ቤሱⶥ ካናአን ዶድን ሀንቁዌ።

አብራሚ ካናአን ዶድን ይሲ አቱⶣም ካሲ ዬሪ፣ «ኒ ⶦራም ይስኩⶢስ ይ ካንግ ኖታ ቤቆ። ኔና ቤቃ ይስኩⶥ ዶዲስ ካንግ ኒዬሽና፥ ኒ ዛርንዴሽን ይንታይቅን ግያስ አሣ ኡሥንታኑዌ፤» ማኪ ሀይጡ። አብራሚንድ ዶዳ ኡⶥንቶኩዌ (ዎጉዌ።)

ማጥን ጎቅን አብራሚ ማልካ ጼዴቅ ማስቲ ይስኩⶥ ዬራጋ ቆምባ ጉዳ ኤዝ አሣ ባና ድያምሙ። ማልካ ጼዴቅንድ አብራሚስ ዲሩ። ይሲንድ «ሀይቅን ጫራ፥ ዶዳ ትያታ ዬሮሥንዲ አብራሚስ ዲርማኬ!» ማኩ። ኡⶣም አብራሚ ማልካ ጼዴቄሽን ባምም ይስኩⶥካን ካንግ ባ ጊዝ ባሪስ ታሕምቃን ማጥ ኩች ኡሡዌ።

አብራማ፥ ሶራ ⶦዳጋ ቤርግ ፓሽትኒ ይስታሲ ንያእ ዬላርጌንዴ። ካሲ ዬሪ አራሃሜሽን ካርሲ ታሥ ኡሡ። ንያእስ ይሲ ዬልንሱⶣ፥ ይ ዛርንዲ ሀይቅን ጫርኑⶥ ሻይቶጥን ጌቢ አትንሱⶣይስ ይስን ሀይጡዌ። አራሚንድ ዬሪ ኡሡⶥ ታሥ ጋሀም ጊባትኑዌ። አብራሚ ዬሪ ኡሡⶥ ሀይጣም ባ ጊባትኑዌሽን ሶይናሴ ማስቲ ፕያሡዌ።

ዬሪ አብራማ ባና ዎግ ይሡ። ዎጊ ናማስ አሥንድ ዴንትካን ይሢ ይስኩⶥⶡና ጊዝዎ። ካሲ ዬሮሥንዲ «ኒ ጉራትካን ይሣ ኒም ንያእ ኡሥንታኑዌ፤ ኒ ዛርንዴሽኒንድ ካናአን ዶዲስን ኡሥንታኑዌ» ማኩ። ኡⶣጎን ይ ፔታስን አብራሚ ኡⶣጋ አባም ንያኤትኩⶣን ይስቱዌ።