48. ዬሱሲ ታሥ ጋሂ ኤስቱ ማስሀ ኪርስቶሳ ጊዝዎ

ዬሪ ዶዳ ጫራ ድያዱⶥ አባም ካንጉⶥ ቃይጺ ባ ካንግ ሶያን ይስቱዌ። ጩቡይንድ ካይጉዌ። አዳማ ሄዋናይ ባ ባርቅን ⶡናም ሶይ ይሢ ይስቴንዴ። ኢሣይቅኒ ዬሪ ይሡⶥ ኩሥካን ይስቴንዴ። ፑጋ፥ ዎጣይ ካይጉዋን ይስቱዌ። ዬሪ ዶዳ ኡⶦጥናን ይስትንሱⶢስ ኮዪይ ይስቱዌ።

ሼጣኒ ጋናትካን ሄዋኒስ ባ ብያሥንሱዌሽን ጾጥንባብ ሀርካንቂ ው ዳድን ዬኡ። ኡⶣም ሄዋና አዳማ ኤንዲ ዬርጋ ዴብም ጩቡ ቃይጼንዴ። ኢሣይቅኒ ጩቡ ቃይጹ ናባም አሥ ዶድ ቶሕኑⶢ ካንግ ፑርስቲ ይስኩዌ፤ ሀይቅንድ ሀይቂ ይስኩዌ።

አዳማ ሄዋና ጩቡ ቃይጹ ናባም ኤንዳጋ ቤሽን ኢት ቃይጽንዲ ዶድ ዴብም ፔቱዌ። ኢሣይቅኒ ዬራጋ ጋግናስንድ ፔቴንዴ። ኡⶣም ዶንቱⶥ አባ ኡⶥን ኡጥንሲ አሥ ካንግ ጎብቃን ሺዳን ማይቃን ጩቡ ቃይጽ ዶሲ ይስኩዌ። ዬራጋ ጋግናንሲንድ አሢ ፔቱዌ። ዬራ፥ አሣ ዴንትካን ይስቱ ሶያጋ ዲያሚ ጩቡ ናባም ባ ዶጉዌ። ይ ፔታስን ዬሪ ድያማ ኡⶢስ ካርሳ ባ አሥንሱዌሽን ታሢ ይስቱዌ።

ሄዋናጋ ዛርቃን ማጢ ሼጣናጋ ዴቢስ ይሲ ጣንጭን ሼጣኒንድ ይ ቶእ ዡንግቃን ሳኢ አዳስንሱዌ ማኪ ዬሪ ታሥ ኡሥንሲ ይስቱⶣ ጊዝዎ። ኡⶥ ይሲንድ ሼጣኒ ማስሂስ ዎጣስንሱዌ፤ ይ ፔታስን ዬሪ ዎጥቃን ካርሲ ይ ዶሥንሱዌ ማስቱⶣ ጊዝዎ። ኡⶣጋ ጌሽን ማስሂ ሼጣናጋ ጊዲስ ካንግዎይናም ሀክ ዴክኒ ቁምⶻⶢ ቦክንሱዌ። ⶦዳ ቤርግንድ ጌሽን ዬሪ ማስሂ ዬሱስ ኪርስቶስ ፔቱⶢስ አሢስ ካንግ ቤሱዌ።

ዬሪ ዶዲስ ካንግ ባይሳጉⶥ ሶአም ባ ባይሳጉⶥን ይያም ጊባትኒ ይስኬንድ አሥንዴሽን ማርካብ ቃይጻሲ ይያም ኢሣይቅን ፕያሡዌ። ኡⶢዎጥኑⶥ ቦዳም አሢ ባ ካንግ ባ ጩቡ ናባም ሀራን ሀይቂ ባእንሱⶣጊስን፣ ዬሪ ይያም ጊባትኒ ይስኬንዲስ ካንግ ባ ፕያሥንሱዌሽን ዬሱሲስ ኡሡዌ።

ⶦዳጋ ባል ቤርግንዳም ጋድንሲ ዬር ኬት ቆምብንዲ አሣጋ ጩቡ ማጋጪስ ባ ኤርሳስንሱዌሽን ዶብ ኤትኩ አሥ ቆድን ኡዲስ ዬርን ኡዲ ይስቴንዴ። ይ ፔታስን ኡዳ ኤንዲ አሥ ጩቡ ባ ባይስንሱዌሽን ሀካርጌንዴ። ዬሱሲ ኤዛጋ ቆምባ ጉዳ ጊዝዎ። ዱማርንዳጋ ቆምብንዴሽን ባድ አታንቂ ይስኩ ቦዳም ዶድ ቶሕን ይስኩ አሥንድ ካንግ ጩቡ ባይስኒ ሀክንሱⶥ ኡድ አሢ ባ ዴቢስ ዬርን ሺርሹዌ። ዬሱሲ አሣ ኦናጎን ቃይጹ ጩቡዋጋ ማቃጪስ ይ ማጥማጣም ባ ኤቱዌሽን ይሲ ኢባራሙⶥ ቆምባ ጉዳ ጊዝዎ።

ዬሮሥንዲ አብርሃሜሽን፣ «ዶድ ቶሕን ይስኩ አሢ ባ ካንግ ኒያም ዲርስንሱዌ» ማኪ ሀይጡ። ዬሱሲ ዬይስኩⶢ አብርሃም ዛርቃና ጊዝዎ። ይ ቦዳም አሣ ዶድ ቶሕን ይስኩ ዛሪ ባ ካንግ ዲርስካንቁዌ። ይ ናቢንድ ዬሱሳም ጊባትኒ ይስኩ አሢ ባ ማጥማጣም ባ ጩቡቃን ፕያጻንቁዌ። ኡⶣሚንድ ማⶣሙⶥ አብርሃማጋ ዬይንት ሺዳን ይ ዛር ፔትንሴንዴ።

ዬሪ አብርሃሚ ባናሣ ይስሀቂ ኡድ አሢ ኡሥንሱዌሽን ባ ይ ኦጩⶣም፣ ይስሀቅ ቆድን ዶሪስ ዬሪ ዬሻሱዌ። ኒኒ ኒሕ ካንጊ ኒ ጩቡ ናባም ሀራን ዎጥ ማጋጪ ኒሕ ዴብም ቦስትንሱዌ። ይ ፔታስን ዬሪ ኒሕ ቆድን ኡድ አቲ ይሲ ሀይብምሱዌሽን ዬራጋ ዶር ፔቱⶥ ዬሱሲስ ኡሡዌ።

ዬሪ ጊብጻጋ ዴብም ይ ውርኑⶥ ዬማትስ ባ ትሡⶣም ይ ጉዝቃን ኢቲ ካይጉ ዶር ⶾባሊስ ⶡኪ ይ ሱታም ባ ሜግ ቆንጻላታ ሀይቅናርሳ ዶድናርሳን ኢሣይቅኒ ቦጥንሱዌሽን ኢስራኤል አሥንዴሽን ካንግ ሀይጣስኑዌ። ዬሪ ሱታ ኡⶥ ቤቅንሲ ኬታ ኡⶥን ኤጋም አቲ ሀንቁዌ። ይሲንድ ኢሣይቅን ንያአ ኡዚስ ዎጣርጉዌ። ይሣ ዲሢ ይስኩⶥ ኡⶢ ማዳካም ባር ማስቱዌ።

ዬሱሲ ኒሕ ማዳካም ዶራ ጊዝዎ። ይሲ ማዳካም ባራም ጎቅን ኤር ጩቡ ቃይጻራጊ ይስቲ ሀይቁዌ። አሣ ኦናጎን ፔቲ ዬሱሳም ጊባትንሲ ይስታን ዬሱሳጋ ሱቲ ናሳ ኡⶣጋ ጩቡ አሺስ ቆጹⶣ ጊዚዎ። ዬራጋ ባጭ ማጋጪ ናሳ ኡⶥ ዴብም አትንሳርጉዌ።

ዬሪ ኩርስኬንድኢስራኤል አሥንዳ ባና ዎግ ይሡዌ። ይ ፔታስን ሀⶥ ዬሪ አሣ ካንጉⶥን ፔትንሱⶥ ቃያጋ ቃይ ዎግ ይሣንቁዌ። ቃያጋ ዎጋ ኡⶣም አሣ ሀኑⶣጋ ዛራጎን ባ ፔታን ዬሱሳም ጊባትኒ ዬራጋ አሥ ፔትኒ ሀክንሱዌ።

ሙሴይ ዬራጋ ሀይጢስ ኤይሲ ሀይጡ ኤዛጋ ኮናሳ ጊዝዎ። ይ ፔታስን ዬሱሲ ካንጉዌሽን ቤሺ ይስኩ ኮናስ ፔቱዌ። ይሲ ካሐ ጊዝዎ። ይሲ ይሤንዳ፥ ይሲ ሀይጤንድ ጋሂ ባ ካንግ ዬራጋ ቃይጻ ዬራጋ ሀይጥንዳ ጊዝዎ። ኡⶤሽን ዬሱሲ ዬራጋ ሀይጣ ጊዝዎ ማስቲ ጼስቲ ይስኩዌ።

ይ ዛርንድቃን ማጢ ትያት ፔቲ ዬራጋ አሥንድ ዴብም ካንግዎይን ትያትንሱⶢስ ዬሪ ትያታ ዳዊቴሽን ታሥ ኡሢ ሀይጥንሲ ይስቱዌ። ዬሱሲ ዬራጋ ናንሥ ማስሂ ባ ፔቱዌሽን ካንግዎይን ዳዊት ዳፕም ትያትንሱⶥ ይ ዛራ ጊዝዎ።

ዳዊቲ ኢስራኤል ትያታ ጊዝዎ። ይ ፔታስን ዬሱሲ ድያድንዳ ዶድ ቶሕን ይስኬንድ ካንግ ትያታ ጊዚዎ! ይሲ ካርቲ ዬኢ ኢባር ባሣማ፥ ሶያ ዲጋማ ዶድ ቶሕን ትያትንሱዌ።