47. ጳውሎሳ፥ ሲላሳ ፊልጵስዩስን ሀንቄንድ

ሳውሊ ሮም አሥንድ ዶድ ጎብቃን ዎብታ ባ ይኩⶣም ካንግ ሮም አሥንድ ሱም ፔቱⶥ ባ ሱማ ጳውሎሳም ጼስቲ ጋዱዌ። ማጥን ጎቅን ጳውሎሳ ሲላሳይ ዬሱስ ጋሂስ ሀይጥኒ ፍልጵስዩስ ካታምም ሀንቄንድ። አሢ ይስን ጾኬሽን ዱብድናንቂ ይስቱ ሶእ ጌⶭን ይስኩ ኩሥን ሀንቄንዴ። ኩሣ ኡⶥን ጊጥኒን ፔቴን ሊድያ ማስታ ይስኬን ማይና ማጣ ይስቴን። ውሲንድ ዬሪስ ቃጽ ⶡና ጎይና ይስቴኔ።

ዬሱሴሽን ሀይጣስኒ ይስኩⶥ ጋሂስ ውሳ ጊባትንሱዌሽን ዬሪ ልድያ ማይስ ፒርቁ። ውሳ ው ኬት አሥንዳይ ጊባትኒ ጣማቃስኔንዴ። ጳውሎሳ፥ ሲላሳይ ባ ኬትን ሀንቂ ይስትንሱዌሽን ኢሣይቅን አታልና ቆሌን። ኡⶣም ኢሣይቅኒንድ ው ኬትን ሀንቂ ይስቴንዴ።

ጳውሎሳ፥ ሲላሳይ ⶦድ አብ አሥንዳ ባና ጾክ ኩሣ ኡⶥን ድያምሚ ይስቴንድ። ጎሕ ፕያድ ኢትናስ ማⶣም ⶾንቃንቃ ይስኬንዎር ንያአ ማጣ ኢሣይቅን ያፓርቃን ዎብታ ኬአ ይስቴን። ውሲንድ ኢትናስ ማⶣ ኡⶣም ኮን ሀይጣ ባ ትያትንዴሽን ጾምሣ ⶦድ ጊዝ ያብሳ ይስቴኔ።

ዎር ናማ ኤና ጳውሎሳሜንድ ያፓርቃን ጉድና ዎብታ «አሥንዳ ሀንዲ ትያታ ዬሮሥንድ ቃይጻስንዳ ጊዝዎ! ፕያጻጋ ቦዲስ ሀይጢ ቤሲ ይስኬንዴ!» ማካ ኬአ ሀይጣ ይስቴን።ውስንድ ኡⶢስ ⶦድ አብ ሀይጣ ይስቴኔ።

ማጥን ጎቅን ናሙሳ ኬአ ሀይጣጉⶥን ጳውሎሲ ው ዳድን ካርታንቂ ው ጉዝቃኑⶥ ማⶢስ፣ «ዬሱስ ሱማም ው ጉዝቃን ይስታ ኬሶ!» ማኩ። ኡⶣም ግያርን ኢትናስ ማⶣ ኡⶢ ው ፖንሢ ኬስኩዌ።

ዎር ናማ ኤናጋ ትያትንዲ ቃጽ ያንቂ ባጬንድ። ውሲንድ ሀⶥ ጌሽን ኮን ኮና ኢሣይቅኔሽን ጾምሥንሳርጉⶢስ ኤሬንድ። አሢ ኤስን ሀⶥ ጌሽን ው ዳድን ዬኢ ጾምሢ ኢሣይቅኔሽን ጊዝ ቆጽንሳርጉⶥ ፔቱⶥንድ ኤሬንዴ።

ኡⶣጋ ናባም ናሙ ትያትንዲ ጳውሎሳ፥ ሲላሳይስ ሮም አሥንድ ኡካርንድ ዳድን ኡጢ ኤቲ ሀንቄንድ። ኢሣይቅኒስ ዴክኒ ጽያጽ ኬትካን ቦኬንዴ።

ኢሣይቅኒንድ ጳውሎሳ፥ ሲላሳይስ ጽያጽ ኬትካን ዴቃን ኤቲ ሀንቂ አሥንሲ ኢሣይቅን ቶእስ ማንታላም ጽያጼንድ። ኢሣይቅኒንድ ኤሲ ጽያሥናንቂ ይስቲ ዶዲ ዴንት ጾጽ አታጉⶥን ዬሪስ ጋላትኒ ይስቲ ሻሌንዴ።

ኡⶢ ኤስ ፔታንቂ ይስታጉⶥን ቱታል ዶዲ ጉርጡ። ጽያጽ ኬታጋ ሜግንዲ ካባል ባ ፒርቂ ጋል አቱ። ጽያጻስንዲ ይያም ጽያሣስናንቂ ይስኩ ጡር ግያዳ፥ ማንታላይ ባ ካንግ ባ ሀቱዌ።

ጽያጽ ኬት ባቂ ይስኬንድ ኡካሪ ጊስካን ይስቲ ቡባጭኒ (ዱዲ ጡንጋልኒ) ዶንቱ። ጽያጽ ኬት ሜጊ ባ ካንግ ጋል ይስትን ባ ቤቁⶣም ቃጽ ሼርቁ። ይሲንድ ጽያጻስንዲ ባ ካንግ ኬስኪ ፖትኒ ሺቻንቄንዴ ማኪ ታሡ። ኡⶣም ባ ኩቻም ባ ዎጥኒ ታሡዌ። ይሲንድ ኤስ ታሢ ይስታጉⶥን ጳውሎሲ ቤቅንሲ፣ «ሀይቃ ኒ ዴብም ኢት ቃይጽ ይሣሺዶ!ኑና ኑ ካንግ ሀⶥ ይስኩዌ!» ማኪ ባ ካሥ ጋልን ማስንሲ ሀይጡ።

ጽያጽ ኬት ኡካር ይስንድ ጳውሎሳ ሲላሳ ዳድን ጉርጢ ይስቲ ዬኢ አታንቂ፣ «ዎ ታ ትያትንዶ! ታ ፕያጽንሱዌሽን ኤስን ሀራን ታ ይሥንሱⶣጌዎ?» ማኪ ኦጩ። ጳውሎሲ፣ «ትያታ ዬሱሳም ጊባትኖ! ኔና ኒ ኬት አሥንዳይ ፕያጽንሲንቱዌ» ማኪ ይስን ሀይጡ። ኡⶣም ጽያጽ ኬት ኡካሪ ጳውሎሳ ሲላሳይስ ባ ኬትን ኤቲ ሀንቅንሲ ኢሣይቅን አዲስ ማስኩ።ጳውሎስንድ ዶንቲ ይ ኬትን ይስኬንድ አሥንዴሽን ካንግ ትያታ ዬሱስ ጋሂስ ሀይጢ ካዥ ሀይጢስ ሚጥኑዌ።

ኡⶣም ኡካራ ኡⶣ ይ ኬት አሥንዳይ ባ ካንግ ዬሱሳም ጊባትኒ ጣማቃስኔንዴ። ኡⶥ ጌሽን ናስ ይሲ ሙእ ዳግ ይሢ ኢሣይቅና ባና ማጥን ሙኢ ካዥቄንዴ።

ይ ዱታም ፒልጵስዩስ ካታም ኡካርንዲ ጳውሎሳ ሲላሳይስ ጻያጽ ኬትካን ሀቲ ኬስንሲ ፒልጵስዩስካን ይስቲ ኢሣይቅኒ ኬስኪ ሀምምዱዌሽን ሀይጤንድ። ኡⶣም ጳውሎሳሜንዲ ካታሙቃን ይስኬንድ ሊድያ፥ ዱማርድ ጊባትኔንድ ባ ኢንግንዲስ ባና ጉድና ቤቃ ዞይሱ ጌሽን ካታሙ ፖንሢ ኬስኪ ሀንቄንዴ። ዬሱሴሽን ሀይጣስኒ ይስኩⶣ ካዥ ሀይጣይ አኪ ሀንቁ። ቤታክርስትያኒንድ ኢቃ ባ ቶሕን ቃስታ ሀንቃ ይስቴኔ።

ጳውሎሳ ዱማርንድ ክርስትያንዳይ ዬሱስ ጋሀ ካዥ ሀይጣይስ አሤሽን ካንግ ሚጥኒ ኤርሳሲ ይስቲ ⶦዳጋ ካታምም ጉድኒ ዎብቴንዴ። ካሲ ቃዝቂ ቤታክርስትያንቃንይስኬንድ ክርስትያንዲስ ዞይሳሲ ኢሣይቅኒስ ኤርሳሲ ይስቲ ⶦድ ዎሲስ ጻፔንዴ። ኢሣይቅን ዎሳ ጻፔንድቃን ማጥማጥንዲ ሀናስ ማጻፕካን ጻፓንቂ ይስኬንዳ ጊዝዎ።