46. ጳውሎስ ማስቱⶥ ሳውሊ ክርስትያን አቱ

ሳውሊ ኢስጢፓኖሲስ ዎጤንድ አሥንዳጋ ሲማር ባቂ ይስቱⶥⶤት ንያአ ጊዝዎ። ይሲንድ ዬሱሳም ጊባትናርጉⶣን ይስቱዌ። ኡⶤሽን ጊባትኔንዲስ ብያርትኒ ኢራታሲ ይስቱ። እያና ማይናይስ ኡጣሲ ጽያጽ ኬንትካን እያርሳሲ ዬሩሳላም ካታምቃን አሥ ኬት ፕያድ እያርዲ አሥ ኡጢ ይስቱ። ቆምባ ጉዲ ዴማስቆቃን ዬሱሳም ዬር ጊባትንሲ ይስኬንዲስ ኡጢ ዬሩሳላም ይሲ ኤቲ ውንሱዌሽን ሳውሊስ ዎሲ ቲሡዌ።

ሳውሊ ዴማስቆቃን ሀንቂ ይስታጉⶥን ሀይቅን ጫርቃን ይስቲ ይ ⶦራም ጮብቲ ጮብቱ። ይሲንድ ዶድን ዎጣንቂ ይስታጉⶥን ማጣጋ አሢ፣ «ዎ ሳውሎ! ዎ ሳውሎ! ሀሬሽናን ታ ብያርትና ይስታጋዎ?» ማኪ ይስኩⶥካሢስ ሲስኩ። ይሲንድ «ዎ ትያቶ! ኔና ኦናጋዎ?» ማኪ ኦጩ። ኡⶣም ዬሱሲ፣ «ታና ዬሱሳ ጊዛዎ! ኔና ታሐን ብያርትና ይስኩዌ!» ማኩ።

ሳውሊ ዶድን ይስቲ ዶንታጉⶥን ይ አፒ ያፓርጉ ሺዱ። ይያ ባና ይስኬንድ ይ አሥንዲ ይ ኩችካን ኡጢ ይ ጎⶭ ኤቲ ዴማስቆን ሀንቁ። ሳውሊ ካዝዎይን ኤር ሙአርጉ ኡⶣርጉ ይስቱዌ።

ኡⶢ ኤስ ይስታጉⶥን ሀናንያ ማስቲ ይስኩⶥ ማⶥ ንያኢ ይስቱ። ዬሪ ሀናንያዬሽን፣ «ዶንታ ሳውሊ ይስን ይስኩ ኬትን ሀሞ! ይ አፒ ኖትንሱዌሽን ኒ ኩቺስ ይ ዴብም ይሥንሳ ጾኮ!» ማኩ። ይ ፔታስን ሀናንያይ፣ «ዎ ትያቶ! ናሳ ኡⶢ ጊባትኔንዲስ ዎሳሳን ብያርትኒ ኢራታሲ ይስታሳን ሲስክታኑዌ» ማኩ። ዬሪ ይዬሽን «ዶንታ ሀሞ! አይሁዴሽና፥ዱማርንድ አሥንዴሽና ታ ሱሚስ ይሲ ኤይሲ ሀይጥንሱዌሽን ታ ኩርሱዌ። ታ ሱሜሽኒንድ ⶦድ ኢራቲስ ይሲ ቤቅንሱዌ፣» ማኩ።

ኡⶣምሀናንያይዶንቲሳውልዳድንሀንቁዌ።ባኩቺስይዴብምይሥንሲ፣ «ዎታኢቻሳውሎ! ዬአኔይስትንኒያባናቦድንድያምሚኒምቤስቱⶢዬሱሳጊዝዎ፤ይሲሀⶥኒአፒኖትንማⶣሀናሳምኔⶾንሱዌሽንኒዳድንታዎሱዌ፣» ማኩ።ሳውልአፒግያርንኖቱ።ሀናንያይንድይጣማቅኑ።ኡⶥጌሽንሳውሊሙእሙኢዞልቁዌ።

ሳውሊ ዬሱሳም ባ ጊባትኑⶣም ዴማስቆን ይስኬንድ አይሁድ አሥንዴሽን «ዬሱሲ ዬራጋ ናንሣ ጊዝዎ!» ማኪ ሚጥኒ ጋዱ። ዬሱሳም ጊባትኔንዲስ ታሽ ባይስኒ ዶንቱⶥ ናሲ ካርቲ ዬሱሲ ዬር ናንሤ ማኪ ይስታጌ! ማኪ ዲቴንዴ።ሳውሊ ዬሱሲ ማስህ ፔቱⶢስ ሀይጢ አይሁድንዲስ ጊባታሲ ይስቱዌ።

ⶦዳጋ ጌሽን አይሁድንዲ ሳውሊስ ዎጥኒ ታሤንዴ። ቦድን ባቂ ይስቲ ይ ዎጥንሴንድ አሥንዲስ ካታም ሜግን ቲሤንዴ። ኢሣይቅንጋሀ ኡⶢስ ሳውሊ ሲስኩ። ይ ኢንግንዲ ይስን ጋሥኒ ይ ፖታስንዴ። ማጥን ጎቅን ጡማስን ሳንታም ካታም ማግ ዴባም ይ ዎርሳሲ ቲሤንድ። ሳውሊ ዴማስቆን ኬስኪ ፖትና ባ ሀንቁⶣም ዬሱሲስ ሚጥኒ ሀይጢ ይስቱዌ።

ሳውሊ ማⶥ ንያእንዳ ባና ድያምሚ ዬሩሳላምም ሀንቁ፤ ይ ፔታስን ኢሣይቅኒ ይ ሼርቄንዴ። ኡⶣም ባርናባስ ማስቲ ይስኩ ማⶥ ንያኢ ሳውሊስ ዎስኪ ቲሤንድ ዳድን ኤቲ ሀንቂ አሥንሲ ዬሱሲ ዎሳሳማን ዴማስቆ ቦድን ይያ ባና ድያምሚ ይ ካርሳሳን ኢሣይቅኔሽን ሀይጡ። ኡⶥ ጌሽን ዎስኪ ቲሤንዲ ሳውሊስ ባ ዳድን አሤንዴ።

ዬሩሳላምም ይስቱ ብያርቴሽን አሽቲ ሀንቄንድ ማጥማጥ ጊባትኒ ይስኬንዲ አንጾክያን ሀንቂ ዬሱሴሽን ሚጥኒ ይስቴንዴ። አንጾክያን ይስቴንድ ⶦድ አሥንዲ አይሁድ አሥንድ ኤሳርጌንዴ። ኢሣይቅንቃን ⶦዳስንዲ ጊባትኔንድ። ኡⶢስ ባ ሲስኩⶣም ባርናባሳ፥ ሳውላይ ኢሣይቅኒስ ባ ኤርሳስንሱዌሽና ቤታክርስትያኒስ ባ ዞይስንሱዌሽን አንጾክያን ሀንቄንዴ። ዬሱሳም ጊባትኔንዲ ይ ጋድን አንጾክያን «ኪርስትያንድ» ማስቴንዴ።

ማጥን ጎቅን አንጾክያን ይስቴንድ ክርስትያንዲ ጾሚ ጾኪ ይስታጉⶥን ማⶣ ሀናሲ፣ «ታ ቃይጽ ኢሣይቅኒ ቃይጽንሱዌሽን ባርናባሳ፥ ሳውላይስ ታም ባድ አሥንዴ!» ማኪ ሀይጡ። ኡⶣም አንጾክያ ቤታኪርስትያን ኤርግንዲ ባርናባሳ፥ ሳውላዬሽን ባኩች ኢሣይቅን ዴብም ይሥንሲ ጾኬንድ። ኢሣይቅኒስ ዱማርንድ ኩሥን ዬሱሳም አሢ ጊባትንሱዌሽን ሚጥኒ ኢሣይቅኒ ኤርሳስንሱዌሽን ዎሲ ቲሤንዴ። ኢሣይቅኒንድ ኬስኪ ሀንቂ አሣጋ ዛርንዴሽን ካንግ ካዥ ሀይጥ ሚጥኒ ኤርሳሴንዴ። ኡⶣም ⶦዳስንድ አሢ ዬሱሳም ጊባትንኔንዴ።