43. ቤታክርስትያና ጋዳስና ጊጼኔ

ዬሱሲ ጫርቃን ካርቲ ሀንቁ ጌሽን ይ ማⶥ ንያእንዲ ዬሩሳላምም ይስቴንድ። ኡⶣጋ አባም ይስቴንድ አሥንዳ ጊባትንሲ ይስኬንዲ ዶባርጉ ዱብድናንቂ ጾኪ ይስቴንዴ።

አይሁድ አሥንዲ ቤርጋም ቤርጋም ማዳካም ባር ጌሽን 50 አቅ ጎቅን ጴንጤቆስጤ ማስቲ ይስኩⶥ አብስ ዎብሲ ይስቴንዴ። ጴንጤቆስጤ አቢ አይሁድ አሥንዲ ሙእ ጋክ ባሪስ ይሢ ባሪ ይስቱ አባ ጊዝዎ። አይሁድ አሥንዲ ጴንጤቆስጤ ባሪስ ማጥን ባ ዎብስንሱዌሽን ዶድ ቶሕን ካንግ ይስቲ ዬሩሳላም ዬኢ ይስቴንዴ። ቤርጋ ኡⶣም ዬሱሲ ሀይቅን ጫርቃን ሀንቁ ማጥ ⶣምባት ጌሽን ጴንጤቆስጤ አቢ አቱ።

ዬሱሳም ዬር ጊባትንሲ ይስኬንድ አሥንዲ ባ ካንግ ማጥን ዱብድናንቂ ይስታጉⶥን ቱታል ኢሣይቅኒ ይስን ዱብድናንቂ ይስኩ ኬቲ ኤዛጋ ናርሳማ፥ ታም ሳማማⶾንቁ። ኡⶥጌሽን ጊባትንሲ ይስኬንድ ዴብም ካንግ ታም ሳሚ ዎጉዌ። ኢሣይቅኒ ባ ካንግ ማⶣ ሀናሳም ⶾንቃንቂ ቃያጋ ኖናም ጋሂ ጋዴንድ።

ዬሩሳላምም ይስኬንድ አሥንዲ ጋሀኡⶣⶦብታይስ ባ ሲስኩⶣም ሀራጊ ፔቲ ይስታን ቤቅኒ ባ ካንግ ዬኤንድ። ጊባትኒ ይስኬንዲ ዬር ቃይጻ ዲሢ ይስኩⶢስ ኤይሲ ሚጥኒ ሀይጣጉⶥን ባ ዶድ ኖን ጋሀም ሲስክንሲ ቃዝቂ ቃጽ ዲቴንድ።

ማጥማጥ አሥንዲ አሥንዳ ሀንዲ ኤንታም ጎⶵቅያን ይስኬንዴ ማኬንድ። ኢሣይቅን ዴንትካን ይስቲ ጴጥሮሲ ዶንቲ ይጥንሲ፣ «ዎ አሥንዳ ዱብድኔንዶ! ሲስንዴ! አሥንዳ ሀንዲ ጎⶳርጌንዴ። ዬሮሥንዲ ኮናሳ ኢዩኤላም፣ ‘ይ ውርኑⶥ አባም ታ ማⶢስ ዎሎጥን ቡስንታኑዌ!»ማኪ ሀይጡⶥ ኮኒ አቲ ቤስትንሱዌሽና ጊዝዎ።

«ዎ ዬሩሳላም አሥንዶ! ሀⶥ ይንታይቅኒ ቤቂ ይስኩⶦጥና፥ አፓርቅን ዴሣሲ ይንታይቅኒ ኤሪ ይስኩⶦጥና ዬሱሲ ዬራጋ ጊዳም ኤዝ ኤዝ ቃይጻ ዲሢ ይስኬንዳ፥ ማላትንዳይስ ይሢቃይጺ ቤሱ አሣ ጊዝዎ። ይ ፔታስን ይንታይቅኒ ይ ሶቲ ዎጡዌ።

«ዬሱሲ ሀይባጎን ይሲ ሀይቃስን ዬሪ ዎጥቃን ይ ዶንሡዌ። ኡⶢ ፔቱⶢ፣ «ሀናሲ ዎጥ ባምቃን ስያፕምሱዌሽን ይ ሺችንሳርኔኑዌ!» ማስቲ ጻፓንቂ ይስኩⶥ ኮኒ ቤስትንሱዌሽና ጊዝዎ። ዬሮሥንዲ ዬሱሲስ ዎጥቃን ፕያሢ ዶንሡዌሽን ኑና ሚጣ ጊዛዎ!»

«ዬሱሲ ሀⶥ ዬራ ባብ ኡⶫርን ኮንቅ ማኪ ዎግንስያን ይስኩዌ። ካሲ ዬሱሲ ታሥ ባና ኡሡⶢዎጥን ማⶣ ሀናሲስ ሀⶥ ቲሡዌ። ሀⶥ ይንታይቅኒ ቤቂ ይስኩⶣ፥ ሲስኪ ይስኩⶣይስ ማⶣ ሀናሲ ይሢ ይስኩዌ።

«ዬሱሳ ኡⶣን ይንታይቅኒ ሶቱዌ። ይ ፔታስን ኢባራም ዬሮሥንዲ ዬሱሲስ ትያታ ማስህ አሡⶢስ ኤርንዴ!» ማኪ ሀይጡ።

ጴጥሮሲ ሀይጡⶢስ ሲስኪ ይስቴንድ አሥንዲ ቃጽ ያብስታንቂ አይኔንድ። ኡⶣም ጴጥሮሳ ማⶥ ንያእንዳይስ፣ «ዎ ኑ ኢችንዶ! ኤስን ሀራን ኑ ይሥንሱዌዎ?» ማኪ ኦጬንድ።

ጴጥሮሲ ካሲ፣ «ዬሪ ይንታይቅን ጩቡ ማርንሱዌሽን ይንታይቅን ማጥማጣም ሶይቃን እያርዲ ዬሱስ ኪርስቶሳ ሱማም ጣማቃስንዴ! ኡⶣጋ ጌሽን ማⶣ ሀናሳጋ ኡሢስ ይንታይቅኔሽን ይሲ ኡሥንሱዌ!» ማኩ።

3000 አትንሴንድ አሥንዲ ጴጥሮሲ ሀይጡⶥ ጋሀም ጊባትኒ ዬሱስ ዳባጌንድ ፔቴንዴ። ኢሣይቅኒንድ ጣማቃስኒ ዬሩሳላምም ይስኬን ቤታክርስትያን አሥንዳ ዬሱሳም ዬር ጊባትናጌንድ ፔቴንዴ።

ዎስኪ ቲሤንዲ ዶባርጉ ኤርሳሲ ሀይጢ ይስኩⶥ ጋሂስ ጊባትኔንዲ ሲስኪ ይስቴንዴ። ኢሣይቅና ባና ማጥን ይስቲ ሙኢ ኡⶥኬንዴ። ማጥናሲ ባ ማጥናሴሽን ጾኪ ይስቴንዴ። ጎሕ ፕያድ ጊባትኒ ይስኬንዲ ኢሣይቅን ዴብም ቃስቲ ጊባት አሥ አቲ ይስቴንዴ።