42. ዬሱሲ ሀይቅን ጫርቃን ካርቲ ሀንቁ

ዬሱሲ ዎጥቃን ዶንቱ ጎቅን ይ ማⶥ ንያእንድቃን ናማሲ ዬሩሳላም ካታም ሺክን ይስኬን ካታምቃን ሀንቂ ይስቴንድ። ኢሣይቅኒ ቦድን ሀንቂ ይስቲ ዬሱስ ዴብም ይሡⶥ ኢራታ፥ ዎጣ ጋሂስ ጋሂ ይስቴንድ። ይሲ «ማስሄ ማኪ አሢ ታሥ ይሥንሲ ይስቴንዳዳ፣ይሲ ሀⶥ ኤስን ሀይቃንቁዌ። ካስ ማይንዲ ዎጥቃን ፕያጺ ዶንታንቁዌ ማኪ ሀይጢ ይስኬንዴ» ማኪ ጋሂ ይስታሲ ባ ሲስኩⶥ ጋሂስ ጊባትናርጉⶣን ይስቴንዴ።

ኡⶣም ዬሱሲ ዬኢ ኢሣይቅን ዴንትካን አታንቂ ኢሣይቅና ባና ሀንቂ ይስቱ። ኢሣይቅኒ ይ ኤራርጌንዴ። ሀሬሽናን ኢሣይቅኒ ጋሂ ይስታሳን ኦጩ። ኢሣይቅኒ ኮት አብ አፓርቅን ዬሱስ ዴብም ይሡⶢስ ካንግ አኪ ይስን ሀይጤንድ። ካሲ ዲሢ ይስኩⶥ ቃይጻ ባ ሲስኩⶢንድ ሀይጤንዴ። ኢሣይቅኒንድ ዬሩሳላምቃን ይሡⶥ ጋሀ ኡⶢስ ጪር ኤራርጉⶥ አሤሽናን ሀይጣ ባ ይስኩዌ ማኪ ታሤንዴ።

ኡⶥ ጌሽን ዬሱሲ ማስሄሽን ጻፑⶥ ዬራጋ ሀይጢስ ካንግ ኢሣይቅኔሽን ሀይጡ። ኪርስቶሲ ኢራት ቤቂ ሀይቂ ይ ካዝ አቅ ጎቅን ዎጥቃን ዶትንሱⶢስ ኮናስንዲ ሀይጡⶢስ ኢሣይቅን ታሣሱ። ኢሣይቅኒ ይስን አቅና ባ ታሡⶥ ካታም አቴንድ። ዶዲንድ ሶኪ ጡሚ ይስቱ።

አሥንዳ ኤንዲ ኢሣይቅና ባና ይሲ አቅንሱዌሽን ይ ቆሌንድ፤ ይሲንድ ሶዬ ማኪ ኬትን እያርዱ። ሶክ ሙኢስ ሙእኒ ኢሣይቅኒ ኤቲ አሣጉⶥን ዬሱሲ ቡዲስ ዶንሢ ኡጥንሲ ዬሪስ ጋላትኑ። ኡⶥ ጌሽን ዲርሺ ኢሣይቅኔሽን ይሲ ኡሣጉⶥን ቱታል ዬሱስ ይሲ ፔቱⶢስ ኤሬንድ። ይ ፔታስን ይሲ ኢሣይቅን አፕካን ባኡዌ።

ኡⶣም አሥንዳ ናማስንዲ «ሀንቻን ቦድን ይሲ ዬር ሀይጢስ ሀይጣጉⶥን ኒሕ ማይቃን ሳንቂ ይስቱⶢ ባም ዬሱሳ ጊዝዎ!» ማኬንድ። ግያርን ዬሩሳላም ካርቲ ሀንቄንዴ። ኢሣይቅኒ ሀንቃ ዬሩሳላምም ባ አቱⶣም «ዬሱሲ ዎጥቃን ፕያጺ ዶንታንቁዌ! ኑኒንድ ይ ቤቅኑኑዌ!» ማኪ ሀይጤንድ።

ይ ማⶥ ንያእንዲ ኡⶢስ ባ ባርቅን ጋርትኒ ይስታጉⶥን ዬሱሲ ቱታል ኢሣይቅን ዴንትካን አቲ ቤስታንቂ፣ «ዲጊ ይንታይቅኔሽን ፔትማኬ!» ማኩ። ኡⶣም ማⶥ ንያእንዲ ማⶢስ ቤቁⶦጥን ኢሣይቅኔሽን ሀርኩ። ዬሱሲ ኢሣይቅኔሽን፣ «ሀሬሽን ሼርቂ ናም ታሢ ይስታጌዎ? ታ ኩቻ፥ ታ ቶአይስሀⶥ ቤቅንዴ። ማⶢ ታዎጥን አⶫ ሜርታይ ይ ጉዝን ካይጉዌ» ማኩ። ይሲ ማⶥ ፔታርጉⶢስ ኢሣይቅኒ ጊባትንሱዌሽን ሙስትንሱⶢስ ኦጩ። ኢሣይቅኒንድ ሚቻስኑⶥ ኦሩ ይስን ኡሥን ኢሣይቅን አፕም ሙኡዌ።

ኡⶣም ዬሱሲ፣ «ዬራጋ ሀይጣ ታዬሽን ካንግ ጻፑⶢ ይሢ ቤስትንሱዌ! ማካ ሀይጥንሳ ታ ይስቱዌ!» ማኩ። ኡⶥ ጌሽን ዬራጋ ሀይጢስ ኢሣይቅኒ ኤርንሱዌሽን ኢሥ ማይ ታሢስ ፒርቁ። ካሲ «ማስሂ ኢራት ቤቂ ሀይብሱዌ፣ ይ ካዝ አቅ ጎቅን ዎጥቃን ዶንትንሱዌ፤ ማስቱⶥ ሀይጢ ጳዳጋ ቤርግንድ አፓርቅን ኮናስኒ ሀይጣስናንቂ ይስኩዌ» ማኩ።

ካሲ «ማጻፕካን ባ ጩቡ ማር ባ ያፕምሱዌሽን አሢ ባ ካንግ ሶይቃን እያርድንሱዌሽን ማⶥ ንያእንዲ (ዎስኪ ቲሤንዲ) ኤይሲ ሚጥኒ ሀይጥንሱዌሽን ጻፓንቂ ይስኩዌ። ኢሣይቅኒንድ ዬሩሳላምም ጋድንሲ ኡⶢስ ይሥንሴንዴ። ኡⶣሚንድ ዶድ ቶሕን ይስኬንድ አሥ ዛርንድ ዳድን ካንግ ሀምምሴንዴ። ይንታይቅኒንድ ጋሀ ኤንዴሽን ሚጥንዳ ጊዝዎ!» ማኪ ሀይጡ።

ኡⶣጋ ጌሽን ዬሱሲ 40 አቅ ⶦድ አብ ባ ማⶥ ንያእንዴሽን ቤስቲ ይስቱ። ካሲ ማጥ ካል 500 ዴብም አትንሴንድ አሥንዴሽን ቤስቱ። ዎጥቃን ዶንታ ባ ፕያጽን ባ ይስኩⶢስ ⶦዳጋ ቦዳም ኤርሳሱዌ። ዬራጋ ጫር ባሴሽና ዬሪ አሥ ቶሕን ትያትንሱዌሽን ኤርሳሱዌ።

ዬሱሲ ባ ማⶥ ንያእንዴሽን፣ «ሀኪ ሀይቅን ጫርና፥ ዶድና ታም ኤስታንቁዌ፤ ኤስን ሀⶥ ሀንቅንሲ አሢስ ይ ካንግ ዬራ ባባ፣ ዬራ ናንሣ ዬራ ማⶣ ሀናሳ ሱማም ጣምቅኒ፣ ታና ኡሡⶥ ትዛዚስ ካንግ ኢሣይቅኒ ይሥንሱዌሽን ኤርሳሲ ይስቲ ታ ማⶥ ንያእንድ አሥንዴ። ታና ካንግዎይናም ሀክ ይንታይቅና ታና ጊዛዎ! ማካ ታ ሀይጡⶢስ ታሥንዴ!» ማኪ ሀይጡዌ።

ዬሱሲ ዎጥቃን ባ ዶንቱ 40 አቅ ጌሽን፣ «ማⶣ ሀናሲ ይንታይቅን ዴብም ዎርትናጉⶥ ሀካ፥ ታ ባቢ ይንታይቅኔሽን ጊዲስ ኡሣጉⶥ ሀክ ዬሩሳላምም ይስቴንዴ» ማኩ። ኡⶣጋ ጌሽን ዬሱሲ ሀይቅን ጫርቃን ኬስኩ፤ ዱልዱልንድ ኢሣይቅን አፕካን ይ አቹዌ። ዬሱሲ ድያድንድ ካንግ ዴብም ባ ትያትንሱዌሽን ዬራጋ ኡⶫርን ዎጉዌ።