44. ጴጥሮሳ፥ ዮሀንሳ ቆሊ ሙኢ ይስቱ ናሲስ ፕያሤንዴ

ማጥን ጎቅን ጴጥሮሳ፥ ዮሀንሳ ዬርን ጎይን ኬትን ሀንቂ ይስቴንድ። ጎይን ኬታጋ ሜግን ኢሣይቅኒ ሺካጉⶥን ጊዝ ቆሊ ይስቱ ናሳ ኢንታ ማጢስ ቤቄንድ።

ጴጥሮሲ ናሳ ኢንታ ኡⶢስ ፒካሲ ኖትንሲ፣ «ታና ኒም ኡሥንሱⶥ ጊዚ ታ ዳድን ካይጉዌ! ይ ፔታስን ታም ይስኩⶢስ ኒም ኡሥንታኑዌ! ዬሱሳጋ ሱማም ዶንታ ዎብቶ!»ማኩ።

ግያርን ዬሪ ኢንታ ኡⶢስ ፕያሡዌ። ይሲንድ ግያርን ዶንቲ ጦልቂ ዎብቲ። ዬሪንድ ጋላትኒ ይስቲ ጎይን ኬትካን እያርዱዌ። ኩሣ ኡⶥን ይስቴንድ አሥንዲ ዬሪስ ጋላትኔንዴ።

አሢ ናሳ ፕያጹⶢስ ቤቅኒ ዱብድኔንድ። ኡⶣም ጴጥሮሲ፣ «ናሳ ሀⶢ ፕያጹዌሽን ይንታይቅኒ ሀሬሽን ዲቲ ይስታጌዎ? ኑና ኑ ጊዳማ፥ ኑ ሀካማ ይ ፕያሣርጉዌ።ናሳ ሀⶢ ፕያጹⶢ ዬሱስ ጊዳማ ይሲ ኡሡⶥ ጊባታማ ጊዝዎ!» ማኩ።

«ዬሱሲ ኡስቲ ሀይብምሱዌሽን ሮም ትያቴሽን ሀይጢ ዎጣሱⶢ ይንታይቅና ጊዝዎ። ካሣጋ ጋዳ፥ ቱናይስ ዎጥንቱዌ። ይ ፔታስን ዬሮሥንዲ ዎጥቃን ይ ዶንሡዌ። ይንታይቅኒ ቃይጹⶢ ሶይ ኤሳርጎዳ፣ ማስህ ፔቱⶥ ኪርስቶሲ ኢራት ቤቂ ሀይብምሱዌሽን ኮናስኑⶥ ኮኒ አቲ ቤስቱዌ። ኤስን ሀⶥ ይንታይቅን ጩቡይ ማስንሱዌሽን ብታሲ ሶይቃን እያርዲ ዬር ዳድን ካርትንዴ!» ማኩ።

ዬርን ጎይን ኬት ኡካርንዲ ጴጥሮሳ፥ ዮሀንሳ ሀይጢ ይስኩⶥ ጋሀም ቃጽ ያንቄንዴ። ኡⶣም ኢሣይቅን ኡጢ ጽያጽ ኬትካን እያርሴንዴ። ይ ፔታስን ⶦድ አሥንዲ ጴጥሮሲ ሀይጡⶥ ጋሀም ጊባትኔንዴ። ዬሱሳም ጊባትኔንድ አሥንድ ፕያዲ 5000 ዴብም አቱዌ።

ይ ዎንሣን ዱታም አይሁድ ኡካርንዲ ጴጥሮሳ ዮሀንሳይስ ቆምባ ጉዳ፥ ዱማርንድ ኡካርንዳ ዳድን ኤቲ ዬኢ አሤንድ።ኢሣይቅኒንድ ጴጥሮሳ፥ ዮሀንሳይስ፣ «ናሳ ኢንታ ሀⶢስ ኦናጋ ጊዳማን ፕያሣዴዎ?» ማኪ ኦጬንድ።

ኡⶣም ጴጥሮሲ፣ «ናሳ ሀⶢ ማስህያ ዬሱስ ጊዳ፥ ይ ሱማማን ፕያጺ ይንታይቅን አፕም ይጡዌ። ይንታይቅናንጊ ዬሱሲስ ሶቱዌ። ይ ፔታስን ዬሪ ዎጥቃን ይ ዶንሡዌ! ይንታይቅኒ ይያም ጊባትናርጊንቱዌ። ፕያጺ ይሱሳጋ ጊድማ፥ ይ ሱማማ ባ ፔታሺዳንፕያጻጋ ቦዲ ዱማርስ ሀኑⶣማጎን ካይጉዌ!» ማኪ ኢሣይቅኔሽን ሀይጡ።

ጴጥሮሳ፥ ዮሀንሳይ ሼራርጉ ሀይጢ ይስኩⶥ ጋሀም ኡካርንዲ ዲቴንድ። ይ ናቢንድ አሥንዳ ኤንዲ ታማርናርጌንድ አሥንድ ፔቱⶢስ ባና ቤቁⶣማ ጊዝዎ። ኢሣይቅኒንድ ዬሱሳ ባና ይስቴንድ አሥንድ ፔቱⶢስ ኤሬንድ። ኡⶣም ጴጥሮሳ ዮሀንሳይስ ቃጽ ሼርሻሲ ዬሱስ ሱማም ኢሣይቅኒ ሀⶥ ጌሽን ሀይጥንሳርጉዌሽን ኢሣይቅን ኬንዛስንሲ ፖንሤንዴ።