41. ዬሮሥንዲ ዬሱሲስ ዎጥቃን ዶንሡዌ

ዎታዳርንዲ ዬሱሲስ ባ ሶቱ ጌሽን ጊባትናርጌንድ አይሁድ ኡካርንዲ ጲላጦስ ዳድን ሀንቂ «ናሳ አጣጣሳ ኡⶢ ጋሥ ሀይባርጉ ይስቲ ካዝ አቅ ጎቅን ዎጥቃን ታ ዶንትንሡዌ! ማኪ ሀይጥንሲ ይስቱዌ። ይ ማⶥ ንያእንዲ ይ ዱባኒስ ዙኪ ኤቲ ሀንቅንሲ ዎጥቃን ዶንታንቁዌ! ማኪ ሀይጥንሳርጉዌሽን ዎታዳርንዲ ይ ፖⶥን ባቅንሱⶢ ኮይስቲ ይስኩዌ፣» ማኪ ሀይጤንድ።

ኡⶣም ጲላጦሲ፣ «ዎታዳርንዲስ ኤቲ ሀንቂ ይንታይቅኒ ሀኩⶦጥን ዞልቃንቂ ባርስንዴ!» ማኪ ትዛዝ ኡሡ። ኡⶤሽን ኢሣይቅኒ ሀንቂ ይ ባምም ኖን ይሡⶥ ንያል ዴብም ማታም ዴክኒ ኦናጎን አቲ ዙክኒ ሀክንሳርጉዌሽን ዎታዳርንዲስ ዞይሲ ጢሻም ባርሴንዴ።

ዬሱሲ ይያም ሶሡⶥ አቢ አይሁድ አሥንድ ⶣምባታን ይስቱ። ኡⶣም ጎቅን አሢ ዳይንን ሀምሱⶢ ናስካንቅያን ይስቱዌ። ኡⶤሽን ⶣምባት አብ ጌሽን ይ ዎንሣን ዱታ ኤንታም ማይና ⶦዳስንዲ ዬሱስ ጉዝን ሺቱይስ ቃዝቃ ባ ዎህንሱዌሽን ማኪ ፖⶥን ሀምሚ ዬሼንድ።

ኡⶢ ኤስ ፔታንቂ ይስታጉⶥን ቱታል ዶዲ ጉርጡ፤ ኢሣይቅን ጉዚ ሻምቶጥን ሳንቂ ይስኬንድ ናማስ ዎሳስንዲ ዬኢ ንያላ ባም ኖኑⶢስ ጋርሲ ቦክንሲ ይ ዴብም ዎግንሲ ይስቴንድ። ዬሱስ ፖⶥ ባቂ ይስቴንድ ዛባንዲ ሼርታም ሀይቁⶦጥን ⶦርቂ ቆንግ አታንቂ ዶድን ዎጤንዴ።

ማይንዲ ዬኢ ዬሱስ ፖⶥን አቴንድ፤ ንያል ዴብም ዎግንሲ ይስቱ ዎሳሲ ኢሣይቅኔሽን «ሼራሺድንዴ! ዬሱሲ ሀⶥካን ካይጉዌ፤ ይሲ ባና ሀይጦⶢዎጥን ዎጥቃን ዶንታንቁዌ! ዬኢ ይ ባሚስ ቤቅንዴ!» ማኪ ሀይጡ። ማይንዲ ዬኢ ባምቃን ኢሣይቅኒ ኖታጉⶥን ባማጊ ባ ካይ ይስቱዌ። ዬሱሳጋ ዱባኒ ይቃን ካይጉⶢስ ቤቄንዴ።

ኡⶣም ዎሳሲ ማይንዴሽን፣ «ኤስን ሀⶥ ሀንቅንሲ፣ ‘ዬሱሲ ዎጥቃን ዲንታንቁዌ! ይንታይቅን አፓርቅን ጌሊላቃን ሀምምሱዌ!’ ማኪ ይ ማⶥ ንያእንዴሽን ሀይጥንዴ» ማኪ ሀይጡ።

ማይንዳ ኤንዲ ኤዛጋ ካዣም ካዥቂ ይስቲ ካዥ ሀይጣ ኡⶢስ ይ ማⶥ ንያእንዴሽን ሀይጥኒ ዎጽካያም ሀንቄንዴ።

ማይንዲ ጋሥ ቦድን ሀንቂ ይስታጉⶥን ዬሱሲ ኢሣይቅኔሽን ቤስቱ። ኢሣይቅኒንድ ይዬሽን ይቲ ይ ቶቃን ጉራትኔንዴ። ይሲንድ፣ «ሼራሺድንዴ! ታ ማⶥ ንያእንዲ ጌሊላቃን ሀምሱዌሽን ሀይጥንዴ፤ ኢሣይቅኒ ጌሊላን ታ ቤቅንሴንዴ!» ማኪ ኢሣይቅኔሽን ሀይጡ።